Memleket basshysy Nursultan Nazarbaev “QazAgro” ulttyq holdınginiń basqarma tóraǵasy Asyljan Mamytbekovti qabyldady, dep habarlady Qazaqstan Respýblıkasy Prezıdentiniń baspasóz qyzmeti.
A.Mamytbekov Prezıdentti holdıngtiń 2009 jylǵy jumystarynyń qorytyndylary men aǵymdaǵy jylǵa belgilengen mindetteri týraly habardar etti. Atap aıtqanda, mal sharýashylyǵy salasy óndirisiniń ónimderin jáne Qazaqstannan eksportqa shyǵarylatyn ettiń mólsherin arttyrý jónindegi máseleler talqylandy. – Memleket basshysy agrarlyq azyq-túlik rynogyn odan ári turaqtandyrý, ımportqa táýeldilikti azaıtý, aýyl sharýashylyǵynyń eksporttyq áleýetin ulǵaıtý, sonymen qatar agrarlyq sektordaǵy eńbek ónimdiligin arttyrý boıynsha naqty tapsyrmalar berdi, – dedi A.Mamytbekov. * * * Memleket basshysy Nursultan Nazarbaev Qazaqstan Respýblıkasy Prezıdenttik mádenıet ortalyǵynyń dırektory Myrzataı Joldasbekovti qabyldady, dep habarlady Qazaqstan Respýblıkasy Prezıdentiniń baspasóz qyzmeti. M.Joldasbekov ortalyqtyń aǵymdaǵy jumysy, sonyń ishinde qazirgi Qazaqstannyń tarıhyna qatysty kitaptar shyǵarý isi týraly áńgimeledi. – Men búgin Prezıdentke alǵashqy 14 tomdy tabys ettim, olar “Táýelsizdik shejiresi”, “Elmen syrlasý”, “El basshysy joldady – eli qoldady”, “Álem Qazaqstan týraly, álem Prezıdent týraly” atty tórt serııadan turady. Biz bıyl osy jobanyń taǵy da 19 tomyn baspaǵa daıyndaımyz, jalpy 2015 jylǵa qaraı barlyǵy 138 tom shyǵarýdy josparlap otyrmyz. Bul basylymdar jas urpaqty Otanymyzdyń tarıhymen tanystyrady, olardyń boıyna otanshyldyq rýhyn sińirýge septigin tıgizedi. Prezıdent bizdiń bul isimizdi quptady, – dedi M.Joldasbekov. * * * Memleket basshysy Nursultan Nazarbaev Bilim jáne ǵylym mınıstri Janseıit Túımebaevty qabyldady, dep habarlady Qazaqstan Respýblıkasy Prezıdentiniń baspasóz qyzmeti. J.Túımebaev Prezıdentti bilim berý júıesiniń búgingi jaı-kúıinen jáne keleshek damý baǵytynan habardar etti. Qazaqstan barshaǵa bilim berý isin damytý ındeksi boıynsha 2009 jyly álemniń 129 eli ishinen birinshi oryn aldy jáne Ortalyq Azııadan Bolon úderisine tuńǵysh qosylǵan memleketke aınaldy. Kezdesý barysynda bilim berýdi damytýdyń 2020 jylǵa deıingi memlekettik baǵdarlamasynyń jobasy, Qazaqstan Respýblıkasy Parlamentiniń qaraýyndaǵy “Ǵylym týraly” jańa zań jobasy, sondaı-aq Astanada bıyl 26-27 sáýir kúnderi ótetin TMD elderi muǵalimderi men pedagogtarynyń birinshi sezin ótkizýge daıyndyq barysy jóninde áńgime boldy. – Sońǵy 19 jylda mundaı deńgeıdegi sezd birinshi ret Qazaqstanda óteıin dep otyr. Bul bizdiń TMD kólemindegi zor bedelimizdiń bir belgisi. Men buǵan qosa Túrki akademııasyn qurý úderisi týraly baıandadym. Akademııanyń ashylýy Túrik Respýblıkasynyń Prezıdenti Abdolla Gúldiń bıylǵy mamyr aıynda bolatyn Qazaqstanǵa sapary ýaqytyna josparlanyp otyr, – dedi J.Túımebaev. Mınıstr bilim berý salasyna erekshe kóńil aýdarylyp otyrǵany, bıylǵy 1 sáýirden bastap jalaqy men shákirtaqynyń 25 paıyzǵa ulǵaıtylǵany úshin barlyq muǵalimder, pedagogtar jáne stýdentter qaýymy atynan Memleket basshysyna alǵys aıtty.
