Onyń aıtýynsha, tasqyn sý 38 úıdi zaqymdaǵan. Alaıda, ol baspanalar tek aǵymdaǵy jóndeý jumystaryn talap etedi. Munan bólek 12 qora-qopsy qulaǵan. Qulaǵan nysandardyń qujaty bolmaǵandyqtan, qoraǵa memleket tarapynan ótemaqy tólenbeıdi. Sondaı-aq, eki bas iri qara mal sýǵa aǵyp ketken.
Jıynda sóz alǵan qala ákiminiń birinshi orynbasary Erbol Sadyr sý tasqynynyń saldaryn anyqtaý jáne keltirilgen shyǵyn kólemin esepteý jumystary arnaıy qurylǵan komıssııamen áli de júretinin atap ótti.
«Mamyr aıynyń 13-nen 14-ne qaraǵan túni 40 mınýtta jarty aılyq jaýyn jaýǵan. Sonyń nátıjesinde, Badam ózeni arqyly ótken sý mólsheri sekýndyna 146 tekshe metr bolypty. Iаǵnı, sý orta qalypty jaǵdaıdan jeti ese kóp bolǵan. Qazir bolsa, sekýndyna 49 tekshe metr sý ótip jatyr. Bul degenimiz, ózen sýy tómendep jatyr degendi bildiredi. Qaladaǵy jaǵdaıǵa baılanysty aýylsharýashylyǵy, energetıka basqarmasymen qaladaǵy qaýip tóndiredi degen jerlerdi anyqtap shyqtyq. Soǵan baılanysty, 4 aýdannyń ákimderine tapsyrma berildi. Máselen, Abaı aýdany Badam ózeniniń jaǵalaýyn bekitý boıynsha qajetti jumystardy júrgizip jatyr»,- dedi Erbol Sadyr.
Aıta keteıik, aýa-raıyn boljaýshylar Shymkentte aldaǵy kúnderi de jaýyn-shashyn bolatynyn aıtady. Sol sebepti, qala basshylyǵy tarapynan saqtyq sharalary kúsheıtiledi.
ShYMKENT
