Jobanyń negizgi maqsaty – ótkenniń tarıhı-mádenı murasyn saqtaý jáne kópshilikke taratý máselelerin ózektendirý, mýzeıdiń áleýetin tanytý jáne kelýshilerdi, ásirese jastar úshin ózindik damý men ózin ózi kórsetýdiń jańa mádenı-zııatkerlik múmkindikterin arttyrýdy kózdeıdi. Dástúrge aınalǵan taǵylymdy shara mýzeıdiń mańyzdylyǵyn arttyrýǵa, tarıhı jáne otbasylyq qundylyqtardy tanymal etýge, óskeleń urpaqqa patrıottyq, adamgershilik tárbıe berýge baǵyttalǵan. Is-shara eń aldymen, jastardyń jańashyl ıdeıalary men bastamalaryn qoldaýǵa baǵyttalǵan.
– Barshańyzdy búgingi Halyqaralyq mýzeıler kúni merekesimen shyn júrekten quttyqtaımyn. Aıtýly mereke jyl saıyn bizdiń elimizde ǵana emes, dúnıe júzi boıynsha barlyq mýzeılerde keń kólemde atap ótiledi. Bıylǵy «Mýzeı túni» merekesi onlaın formatqa aýysyp otyr. Halyqaralyq mýzeı kúni merekesi 1977 jyly Halyqaralyq mýzeıler keńesiniń Bas konferensııasynda bekitilgen. «Mýzeıler túni» aksııasy Ulttyq mýzeıde jyl saıyn dástúrli túrde uıymdastyrylyp keledi. Alǵash ret 2015 jyly uıymdastyrylyp, kópshilik tarapynan úlken qoldaý tapty. Bul shara tek Halyqaralyq mýzeıler kúni merekesinde emes, Ulttyq mýzeı bastamasymen «Naýryz» merekesine oraı «Naýryz – jańǵyrý nyshany» degen taqyryppen de uıymdastyrylyp júr, dedi Ulttyq mýzeı dırektory Arystanbek Muhamedıuly.
