Ońtústik Qazaqstan oblysy kásipkerleri úshin Reseıdiń Máskeý oblysynan saýda-logıstıka ortalyǵy salynatyn boldy. Bul týraly Otyrar.kz habarlady.
Bıyl ońtústikterdiń baqsha ónimi Máskeý oblysynyń jármeńkesinde satylǵan bolatyn. Sonda jergilikti turǵyndar jemis pen qaýyn-qarbyzdyń dámdiligine tánti bolypty. Árıne, osy óńirge basqa da aımaqtardan baqsha daqyldary tasymaldanady. Degenmen, jergilikti bılik Ońtústik Qazaqstan oblysynan kelgen ónimderdiń sapasyna joǵary baǵa berip otyr. «Qazaqstannyń Ońtústik Qazaqstan oblysynan jetkizilgen baqsha daqyldary turǵyndarymyzdyń suranysyn qanaǵattandyrdy. Sondyqtan biz sol jergilikti jerdiń kásipkerleri úshin ózimizden saýda-logıstıka ortalyǵyn salýdy uıǵardyq», - deıdi Máskeý oblysynyń gýbernatory Andreı Vorobev.
Danııar Túımebaı.
