Elordadaǵy L.N.Gýmılev atyndaǵy Eýrazııa ulttyq ýnıversıtetinde Qazaqstannyń halyq jazýshysy Ázilhan Nurshaıyqovtyń 90 jyldyǵyna arnalǵan «Ázilhan Nurshaıyqov jáne qazaqstandyq jýrnalıstıkanyń ózekti máseleleri» atty respýblıkalyq ǵylymı konferensııa bolyp ótti.
Elordadaǵy L.N.Gýmılev atyndaǵy Eýrazııa ulttyq ýnıversıtetinde Qazaqstannyń halyq jazýshysy Ázilhan Nurshaıyqovtyń 90 jyldyǵyna arnalǵan «Ázilhan Nurshaıyqov jáne qazaqstandyq jýrnalıstıkanyń ózekti máseleleri» atty respýblıkalyq ǵylymı konferensııa bolyp ótti.
Atalmysh is-shara «Bas redaktorlar klýby» qoǵamdyq birlestiginiń uıymdastyrýymen jáne L.N.Gýmılev atyndaǵy Eýrazııalyq ulttyq ýnıversıteti men «Beıbitshilik álemi» halyqaralyq qazaq shyǵarmashylyq birlestiginiń qoldaýymen júzege asyp otyr. Uıymdastyrylyp otyrǵan is-sharany ómiriniń sońyna deıin halqyna adal qyzmet etken atpal azamatqa degen zor qurmet dep qabyldaǵan jón. Jáne de bul basqosýdy Á.Nurshaıyqovtyń otandyq jýrnalıstıkanyń ornyǵýyna jáne qarqyndy damýyna qosqan úlesine, ol kisiniń eńbekqorlyǵyna, joǵary kásibı biliktiligine, óziniń mamandyǵyna adaldyǵyna berilgen úlken baǵa dep bilemiz.
Jazýshy-jýrnalıst, Qazaqstannyń halyq jazýshysy, Memlekettik syılyqtyń laýreaty Ázilhan Nurshaıyqovtyń qazaq ádebıeti men jýrnalıstıkasynda alar orny erekshe. Qalyń kópshilikke etene jaqyn «Mahabbat, qyzyq mol jyldar» men «Aqıqat pen ańyz» romandary jazýshy shyǵarmashylyǵynyń shyrqaý bıigi sanalady. О́lmes týyndynyń alǵashqysynda jastardyń qaınaǵan jastyq ómiri týraly baıandalyp, bul roman oqyrmannyń, ásirese, jalyndy jastardyń erekshe súıip oqıtyn kitabyna aınaldy. Al ekinshi roman-dılogııasy aty ańyzǵa aınalǵan ultymyzdyń uly tulǵasy, jaýynger jazýshy Baýyrjan Momyshuly týraly. Bul kitap ýkraın jáne cheh tilderine aýdarylyp jarııalansa, birqatar shyǵarmalary qyrǵyz, ózbek, tájik, moldavan, tatar, ıakýt tilderine tárjimalanǵan.
Osyndaı el qurmetine bólengen, artyna ólmes mura, jýrnalıstıka salasynda keıingi urpaqqa ónege bolarlyq ózindik izin qaldyrǵan aıaýly azamatqa arnalǵan respýblıkalyq ǵylymı konferensııa Ázilhan Nurshaıyqovtyń ómiri men shyǵarmashylyǵyn keńinen baıandaıtyn derekti fılm kórsetilimimen bastaldy.
Basqosýdy «Bas redaktorlar klýby» qoǵamdyq birlestiginiń prezıdenti Kenjebolat Joldybaı ashyp, bul ıgi sharanyń mán-mańyzyna keńinen toqtalyp ótse, Mádenıet jáne aqparat mınıstrligi Aqparat jáne muraǵat komıteti tóraǵasynyń orynbasary Arystanbek Nurmahanov konferensııaǵa sáttilik tiledi. Odan soń sóz alǵan zań ǵylymdarynyń doktory Beket Turǵaraev, «Beıbitshilik álemi» halyqaralyq qazaq shyǵarmashylyq birlestiginiń prezıdenti Áben Nurmanov, belgili qalamger Sultan Orazaly, «Egemen Qazaqstan» respýblıkalyq gazeti» aksıonerlik qoǵamynyń prezıdenti Saýytbek Abdrahmanov ataqty qalamger Ázilhan Nurshaıyqov jóninde estelikter aıtyp, óz oı-tolǵamdaryn ortaǵa saldy. Tilek-lebizderden soń konferensııada L.N.Gýmılev atyndaǵy Eýrazııa ulttyq ýnıversıtetiniń prorektory Dıhan Qamzabek, Jýrnalıstıka máselelerin zertteý ınstıtýtynyń dırektory Namazaly Omashev, belgili qalamger Qaısar Álim, Qazaqstan Ulttyq jaratylystaný ǵylymdary akademııasynyń vıse-prezıdenti Kárimbek Qurmanálıev, «Túgel medıa» birlestiginiń basshysy Sádibek Túgel, L.N.Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fakýltetiniń dekany Qaırat Saq kún tártibindegi máselelerge oraı arnaıy taqyryptarda baıandamalar jasady.
Sondaı-aq, shara basynda belgili qalamger Qaısar Álim qurastyrǵan «Qudaı-aý, qaıda sol jyldar?!» estelikter, esseler kitabynyń tusaýy kesilip, biraz qalamger-qaıratkerler «Bas redaktorlar klýby» qoǵamdyq birlestigi men «Beıbitshilik álemi» halyqaralyq qazaq shyǵarmashylyq birlestigi tarapynan marapattaldy.
Berik SADYR,
«Egemen Qazaqstan».
