Álemdegi eń baıyrǵy gazetterdiń biri – Londonda shyǵatyn «Lloyd’s List» óziniń qaǵazdyq nusqasyn jaýyp, birjola ınternet-basylym versııasyna kóshýge sheshim qabyldady. Bul týraly «Gazeta.Rý» saıty habarlady.
Búginde shyǵyp kele jatqanyna 280 jyl tolyp otyrǵan kóne gazet aldaǵy 20 jeltoqsannan bastap qaǵazdyq nusqasyn shyǵarýdy birjola toqtatady.
«Lloyd's List» - álemdik keme qatynasy salasy úshin jańalyqtardyń, analıtıka men basqa da málimetterdiń qaınar kózi - 2013 jyldyń 20 jeltoqsanynan tolyq sıfrly varıantqa aýysady», - delingen redaksııanyń ózi taratqan habarlamada.
Basylym basshylyǵy habarlaǵandaı, arnaıy júrgizilgen tekserýdiń qorytyndysynda gazettiń qaǵaz júzindegi nusqasyn oqyrmandar aýdıtorııasynyń 2 paıyzǵa da jetpeıtin bóliginiń ǵana oqıtyny anyqtalǵan. Sońǵy jyldary jahandaǵy teńiz saýdasy jańalyqtaryna mamandanǵan «Lloyd’s List» sıfrly jáne mobıldi platformalardy ınvestısııalap keldi. Alaıda, redaksııadaǵylar gazettiń qaǵazdyq nusqasyn shyǵarýdan bas tartý basshylyqqa bul baǵyttaǵy jumystardy belsendi túrde damyta túsýge jáne oqyrmandardyń suranysyn neǵurlym kóbirek qanaǵattandyrýǵa múmkindikter beredi dep esepteıdi.
«Biz sıfrly platformalardyń aqparatpen barynsha jan-jaqty jáne tıimdi almasýǵa múmkindikti molyraq beretinin moıyndaýǵa tıispiz», - delingen redaksııadaǵylar málimdemesinde. «Eger XVIII ǵasyrda gazet paraqshalary kofehanalardyń qabyrǵalaryna ilinip turǵan bolsa, - dep atap ótedi gazet habarlamasy, - qazir sol kofehanalarda árbir oqyrman óz planshetteri men smartfondary arqyly basylymdy oqı alady».
«Bizdiń gazetimizdiń úsh júz jyldyq tarıhy bar, al teńiz saýdasy - konservatıvtik sala, sondyqtan da biz táýekelge baryp otyrǵanymyzdy túsinemiz jáne onlaın-nusqaǵa kóshýge asa qaýiptenbeımiz», - deıdi gazettiń bas redaktory Rıchard Mıd.
«Lloyd's List» gazeti Londonda 1734 jyldan beri shyǵyp keledi. Onyń shyǵarýshysy brıtanııalyq Informa kompanııasy boylp tabylady.
Murat Aıtqoja.
