Sýret mýzeıden alyndy
Bul ıgi is búginde aýdan ortalyǵy Aqqýly aýylyndaǵy Balalar jáne jasóspirimder sport klýbynyń dırektory Toqtamys Kenjeǵalıevtiń bastamasymen jalǵasýda. О́tken jyl Sosıalıstik Eńbek Eri Jumabek Janǵojınge arnalypty.
Keıingi urpaq esimin bilsin degen Jumabek Janǵojınmen birge Sosıalıstik Eńbek Eri atanǵan Janpeıis Syzdyqov, Balǵabaı Ospanov, Jumahan Asylhanovtar bolsa, al Jolaman Qalymov, Kerimhan Ibragımovtar aýdandaǵy Besqaraǵaı asyl tuqymdy qoı zaýytynda eńbek etip, soltústik qazaq merınos qoıynyń tuqymyn shyǵarýǵa úles qosqan eken.
Al bıylǵy sporttyq sharalar Sosıalıstik Eńbek Erleri Kúláı Sharbaqbaeva men onyń balasy Ǵabdynasyr Erǵalıulynyń qurmetine arnalady.
– Men Kúláı Sharbaqbaevanyń nemeresimin. Apamyzdyń eńbek joly jalǵasýda. Urpaqtary da aýylda qalyp, mal sharýashylyǵymen aınalysýda. Aýdandyq sporttyq spartakıadanyń bıyl bizdiń áýletimizge arnalatynyn estip erekshe qýandyq, – deıdi Nursulý Sharbaqbaeva.
Biz de bir jyly apamyz jaıly jazý úshin aýdanǵa baryp qaıtqan edik. Kúláı apamyz 1958 jyly Sosıalıstik Eńbek Eri ataǵyn alǵan. On jyl boıy qoı baqqan adam. Jyl saıyn qozylar sanyn kóbeıtken qoı ósirýdegi bul ádisti búkil el «Sharbaqbaevtar konveıeri» dep ataǵan.
Keıin anasynyń aq taıaǵyn ıelengen uly Ǵabdynasyr da 1981 jyly Sosıalıstik Eńbek Eri ataǵyn alady.
Al Shabar aýylyna Dinmuhamed Qonaev kelgenin jurt osy kúnge deıin aıtady.
– Dinmuhamed Qonaev 1958 jyly oblysqa saparmen kelip, arnaıy bizdiń aýylǵa atbasyn buryp, sheshemizdiń úıine soqty. Úlken adamnyń kishkentaı aýylǵa kelýi mereke boldy. Ol kisi anamyzdyń joǵary marapatyna qutty bolsyn aıta kelipti. Sonda Qonaev aǵamyz eski úıimizdi kórip «batyr batyrǵa laıyq úıde turýy kerek» degen edi, – dep eske alǵan edi sol kezde kózi tiri Ǵabdynasyr ata.
Aqqýly aýylyndaǵy tarıhı-ólketaný mýzeıinde esimderi el esinde qalǵan adamdardyń qujattary, qoldanǵan zattary, fotosýretteri qoıylǵan.
– Bul jobada qaı jyly qandaı adamǵa qurmet kórsetiletini de belgilengen. Aýdandaǵy el aýzynda aty qalǵan adamdardyń esimderin jańǵyrtý, soǵys jáne beıbit kún batyrlarynyń erligin keıingi urpaqqa jetkizý – bizge mindet. Osy joba boıynsha 2014 jyly Ábilqaıyr Baımoldın zıratyna táý etip, Reseıdiń Nevel qalasyna deıin bardyq. Qala turǵyndary jerlesimizdi erekshe qurmetteıdi eken, – deıdi Toqtamys Jánibekuly.
Pavlodar oblysy,
Aqqýly aýdany
