demek onyń kúdigi, kúlgeni ótti,
óksigeni, ópkeni, dúrmegi ótti,
án salǵany, árnege tamsanǵany,
qýanǵany, qajyǵan, sharshaǵany,
Shilde ishinde, qyrkúıek, qarashada,
kónermegen sezimin eske alǵany,
esteligin ótkenniń jastanǵany,
jumys kúni qurbyǵa keshikkeni,
dúısenbide jospary bastalǵany,
ádepkide áldekim «áı» degeni,
árirekte sýynǵan oı deregi,
ámııanyn salǵany tós qaltaǵa,
áýezimen ádemi sóılegeni,
О́tti bári, ókpesi ózge adamǵa,
úńilgeni sarǵaıǵan jazbalarǵa,
úńilgeni sarǵaıǵan albomyna,
saǵynyshtyń kúltesi mazdaǵanda,
Terezeden kúmisteı qar jaýǵany,
aldaǵany, ózinen aldanǵany,
alqaptaǵy jap-jasyl qarbyzdardyń,
tańdaı almaı bireýin dal bolǵany,
Aıly túnge, aq túnge kóz tikkeni,
kózildirik, kúrteshe, sózdikteri,
uıalǵany tuńǵysh ret jar aldynda,
únsizdikte janary úzdikkeni,
О́rilmegen, órilgen qyz burymy,
sybyr sózi, kóktemgi, kúzgi muńy.
ótti bári, baýyrlap kóshken bulttaı,
О́tpegeni –
bir ýys izgiligi..
Anamnyń únsiz jylap turǵany...
Daýyldy daýyl basyp kórgen be,
Jolbarystanyp jasyqtar jerde,
Shashynan syrǵyp aq oramaly,
Kórshi áıel úıge qashyp kelgende,
Kúrsinip, anam jylady,
Jyndy sý, – dedi – Kináli.
Sebep te tappaı kisińdi aqtaýǵa,
Sábıdeı qoly úsip jatqanda.
Alpamsa jigit aqyryp tónip,
Ákesin sabap tisin qaqqanda.
Jabyǵyp, anam jylady,
Jyndy sý, – dedi – kináli.
Jamaýsyz kóńil qazaqta bar ma,
Panasyz qaıtsin kózi aqpaǵanda?
Beıkúná jandy taǵdyrdyń ózi,
Jetimek qyz dep mazaqtaǵanda.
Qosylyp, anam jylady,
Sol, – dedi – Taǵy kináli.
О́mirdiń máni, murattyń máni,
Keýdeme tolyp suraqtyń bári.
Ishimdik kórsem, túsedi eske,
Anamnyń únsiz jylap turǵany.
Kim kináli?
Kózinde tartylys bar, qushtar ǵalam,
Aq monshaǵyn teńeýge tús qalmaǵan.
Aq saýsaǵy orynsyz ustalmaǵan,
Bul jaıly eshkimge de tis jarmaǵan,
Bir qyz bar-tyn aýylda,
Men biletin..
Esimine eleńdep el júretin,
Esigine kóp jigit telmiretin,
Essizderi tákáppar, pań kóretin,
Es bilgeni erekshe mán beretin.
Al bir kúni,
Jańa otaý jaryq shashty,
Selteń jigit,
Short minez,
Sharyq basty.
Erteńgilik erkeme es bildirmeı,
Kórkem qylyp kólikpen,
Alyp qashty!
Qaıran arý!
Qan týlap ketti betin,
Mahabbatty «súıisý» dep biletin.
Pák sezim jaılaýynan shet júretin,
Jat kózge jar tizginin usynbaq pa?
Artyń – jar,
Jolǵa bastar tusyń – qaqpa.
Qustaı aqqan kólikten, ózin-ózi,
Laqtyryp kep..
Qanatyn túsirdi otqa.
Tań ata zar jylatyp támám eldi.
Bir jolaýshy habaryn ala keldi.
Sán quryp úlgermegen sarǵaldaq qyz,
Máńgilik zaǵıp bolyp qala berdi.
«О́zin-ózi qorlaı ma, óstip adam?» -
Degen qartty kózge ilmeı kóshti zaman.
Odan soń ańǵarmady jat júregin,
Odan soń tańdanbady eshkim oǵan.
Esimine eleńdep el júretin,
Esigine kóp jigit telmiretin.
Júregi jalǵyzdyqqa bola týǵan,
Bir qyz bar-tyn aýylda..
Men biletin.
Batyrhan Sársenhan
