Táýelsiz Qazaqstannyń bolashaq jalaýyn, Memlekettiń Eltańbasyn kóz aldyna elestetken qalyń kópshilik mamandyǵyna, jasyna, qyzmetine qaramastan, osy tusta ártúrli nysandaǵy jobalaryn jumys tobyna joldap jatty. Jumys toby bul jobalardy ret-retimen komıssııa otyrystarynda qaraýǵa daıyndap, qaraý nátıjeleri boıynsha iriktep, qazylardyń talqysyna qaıta usynyp otyrdy.
Osyndaı jan-jaqty jáne sarabdal saralaýdyń nátıjesinde baryp aqyrǵy joba paıda boldy. Qazir Qazaqstannyń álemge áıgili Kók Týy men Memlekettik Eltańbasyn kórgende, bulardyń bastapqy nusqalaryn, alǵash túsken basqa da júzdegen «atalas aǵaıyndaryn» joba kúıinde ózimiz avtorlarynan qabyldap alyp, bólmeden bólmege tasyp, komıssııanyń qaraýy úshin oryn-ornyna qoıyp ornalastyryp degendeı, sol kezde atqarylǵan uıymdastyrý jumystary kózge elestep ótedi...
Elimizdiń rámizderi týraly sóz bolǵanda, qoǵam qaıratkeri, belgili qalamger marqum Erbol Shaımerdenulynyń esimi erekshe hám qurmetpen atalýǵa tıis. Sol kezeńde Joǵary Keńestiń baspasóz hatshysy bolyp istegen Erbol Shaımerdenuly jańa qazaq rámizderi paıda bolýynyń bastaýynda júrip, onyń tarıhı, ǵylymı jáne praktıkalyq negizderin zerdelep, óziniń bilimi men biligin arnap, uıymdastyrýshylyq qabiletin aıryqsha kórsetti. Onyń 1993 jyly ardaqty Ábish aǵa Kekilbaıulynyń alǵysózimen jedel basylyp shyqqan tuńǵysh kitaby táýelsiz el rámizderin tanytýǵa birinshi bolyp jol ashty.
Joǵarǵy Keńestiń baspasóz qyzmetinde Erbol Shaımerdenulymen birge qyzmettes bolǵan jýrnalıst Erkin Zikibaev ekeýmiz sol kezde Jandarbek Málibekov pen Shota Ýálıhanovtyń shyǵarmashylyq-avtorlyq birliginen týǵan memlekettik Eltańba beınesin Joǵarǵy Keńes sessııasynyń sahnasyna alyp shyqqan sýretimiz sońynan aqparat quraldarynda jarııalandy, birqatar kitapta da jaryq kórdi.
Sonyń biri – Elbasy Nursultan Ábishuly Nazarbaevtyń memlekettik tý bekitiletin kezde sýretshi, Qazaqstannyń eńbek sińirgen qaıratkeri Sháken Ońlasynuly Nııazbekov ázirlegen, osy kúngi tý jobasynyń ár bólshegin depýtattarǵa túsindirip otyrǵan sáti edi. Bul – «Egemen Qazaqstan» gazetiniń fototilshisi Shúkir Shahaı 1992 jyly túsirgen, memlekettik rámizderdiń qabyldaný shejiresin baıandaıtyn eńbekterge, avtorlyq jınaqtarǵa engen sýret. Kógildir aspan tósinde, altyn kúnniń aıasynda erkin qalyqtaǵan qyran beıneli Qazaq eliniń berekeli bolashaǵyn osy kezdiń ózinde aıqyn elestete alǵan Elbasymyz sol kúni kók tústiń, «kók» sóziniń halyq sanasynda saqtalǵan qasıetterinen bastap, el týynyń erekshe belgilerin izeýirtti baıandap, baıypty uǵyndyrǵany umytylmastaı este qaldy.
Táýelsiz elimizdiń memlekettik rámizderiniń ázirlený jáne qabyldaný prosesin bastan keshirý baqyty buıyrǵany álbette kóńildi árkez marqaıtyp otyrady. Tarıhtyń osynaý bir sátinde – jas táýelsiz Qazaq memleketiniń negizin qalaýshy Tuńǵysh Prezıdent – Elbasymyzdyń janynda memlekettik týdyń sýretin alǵash kórsetip turǵan, otyzdyń bel ortasyndaǵy buıra shashy burqyraǵan jigitińiz biz bolamyz desek, árıne senersizder.
Serikqalı BAIMENShE,
Eýrazııalyq ekonomıkalyq komıssııanyń bólim bastyǵy,
fılologııa ǵylymdarynyń doktory, Qazaqstannyń qurmetti jýrnalısi
MÁSKEÝ
