2019 jyldyń qorytyndysy boıynsha aýyl sharýashylyǵy mashınalaryn jasaý óndirisiniń kólemi 41,2 mlrd teńgeni qurap, 381 kombaın jáne 895 traktor shyǵaryldy. 2010 jyldan bastap osy baǵyttaǵy ónim jelisin keńeıtý bastaldy. Aýyl sharýashylyǵynyń qajettilikterine arnalǵan aspaly jabdyqtar men tehnıkanyń túrlerin óndirý iske qosyldy. Traktorlar men kombaındar óndirisi artty.
Aýyl sharýashylyǵy mashınalaryn jasaý baǵytyndaǵy negizgi kásiporyn – «SemAZ» JShS. Zaýyt mamandary Qazaqstanda alǵashqylardyń biri bolyp dánekerleý men boıaýdy qamtıtyn tolyq sıkldi avtojınaýdy engizdi. Onda jumys Koreıanyń Daewoo Bus Global Corporation kompanııasy avtobýstaryn shyǵarýdan bastaldy. 2006 jyly Semeıde burynnan turyp qalǵan armatýra zaýyty ornyna avtoqurastyrý óndirisi quryldy. Jobaǵa bastapqy kezeńde quıylǵan ınvestısııalar kólemi 9 mln AQSh dollaryn qurap, onyń ishinde 7 mln. óndiristik alańdy kúrdeli jóndeýge baǵyttaldy.
Avtoqurastyrý zaýytynda 300-den astam jańa jumys ornyn ashyldy. Respýblıkanyń qatań klımaty úshin arnaıy ázirlengen jańa ónim - Daewoo Bus jańǵyrtylǵan serııaly avtobýstar shyǵarylyp, basqa da kóptegen mashına jasaý bastamalary úshin alańǵa aınaldy. Mysaly, «SemAZ» JShS sehtarynda búginde 25 tonnalyq Shacman jáne joǵary ótimdi «Oral» júk kólikterin, Foton az tonnalyq júk kólikterin qurastyrý jumystary júrgizilýde. 2009 jyly «KazAgroFınans» ulttyq kompanııasy» AQ birlesip qarjylandyrýynyń nátıjesinde «SemAZ» JShS Belarýstyń «Mınsk traktor zaýyty» respýblıkalyq birtutas kásipornynyń aýyl sharýashylyǵy mashınalaryn qurastyrý jelisin iske qosty. Bul ınvestısııalyq jobaǵa otandyq ınvestor 1,03 mlrd teńge saldy. Endi Semeıde «Belarýs» toǵyz modıfıkasııaly tartqysh kúshi 0,2-den 5 tonnaǵa jetetin traktorlar shyǵarylady. Munda olar úshin túrli aspaly jabdyqtar da jasalady. О́ndiristik qýaty jylyna 3 myń birlikti quraıdy.
Semeıde jınalǵan mashınalar suranysqa ıe. «QazAgroQarjy» UK lızıng sharttary boıynsha avtokólikterdi satýdy uıymdastyryp, zaýytqa júıeli túrde qoldaý kórsetedi. Otandyq traktorlardy Reseı jáne Mońǵolııanyń tapsyrys berýshileri satyp alady. Bul «temir tulparlar» - orman, kommýnaldyq sharýashylyq, qurylys jáne ónerkásipte taptyrmas qural.
Aıta ketý kerek, zaýytta tapsyrys berýshiniń qalaýy boıynsha kez kelgen túrdegi tehnıkany qurastyrýǵa bolady. Oǵan ár modelge sáıkestik sertıfıkattary dálel bolady. Zaýytta shyǵarylatyn avtobýstar men traktorlar jyl saıyn QR táýelsiz sarapshylarynyń synaǵynan ótedi. Zaýyttyń sapa menedjmenti júıesi ISO 9001: 2008 halyqaralyq standartyna sáıkes sertıfıkattalǵan.
«SemAZ» ónimderiniń joǵary sapasy eleýsiz qalmady. 2010 jyly Qazaqstannyń avtomobıl jáne mashına jasaý ónerkásibin damytýǵa qosqan úlesi úshin «Altyn belgi» altyn medalimen marapattaldy, 2018 jyly kompanııa Prezıdenttiń «Altyn sapa» syılyǵyn «О́ndiristik maqsattaǵy úzdik kásiporyn» nomınasııasy boıynsha ıelendi. Aldaǵy ýaqytta «SemAZ» JShS otandyq quramdaýyshtar, akkýmýlıatorlar men metall qurylymdaryn óndirýshilermen tyǵyz óndiristik kooperasııany jolǵa qoıýdy josparlap otyr. Bul qazaqstandyq qamtý úlesin, ıaǵnı Semeı avtomobılderi men traktorlarynyń básekege qabilettilik deńgeıin aıtarlyqtaı arttyrady.
