«Maqsat – qalanyń barlyq azamattaryn tekserip, ınfeksııa juqtyrmaǵanyna kóz jetkizý. Sonymen qatar kún saıyn 6 zerthanada 4 500 taldaý jasalady. Jalpy, qalada materıal jınaýmen aınalysatyn memlekettik jáne jeke zerthanalar bar. Ortalyq ta yńǵaıly ornalasqan. Azamattar áýejaıǵa kelgennen keıin test tapsyra alady. Avtokólikterge arnalǵan turaqtar jetkilikti», dedi Baqtııar Máken.
Qala ákimi orynbasarynyń aıtýynsha, bolashaqta joba qalanyń basqa da bólikterinde ashylýy múmkin.
Mobıldi ortalyq kúnine 100-den astam test alýǵa qabiletti. Prosedýra tek 3-5 mınýt alady. Sondaı-aq mamandar atap ótkendeı, bul ádis barlyq avtokólik úshin yńǵaıly jáne eshqandaı kezekti qajet etpeıdi. Test quny – 10 myń teńge.
Test tapsyrýshy epıdemııalyq faktorlar men sımptomdarǵa qatysty jeke aqparattar kórsetilgen saýalnama toltyrady. Kabınada dene temperatýrasy janasýsyz termometr kómegimen ólshenedi. Nátıje 6 saǵat ishinde belgili bolady. Test tapsyrýshy óz nátıjesin elektrondy poshta nemese Whatsapp nómiri arqyly ala alady.
Test tapsyrýshy COVID-19-ǵa kúdikti bolǵan jaǵdaıda mamandandyrylǵan aýrýhanaǵa aýystyrylady.
Mobıldi skrınıng ortalyǵy 08.00-den 20.00-ge deıin demalyssyz jumys isteıdi. Ol «MEGA Silk way» saýda ortalyǵy aýmaǵynda, ıaǵnı №2 aýrýhana men «MEGA Silk way» saýda ortalyǵy arasynda ornalasqan.
Sarapshylardyń pikirinshe, Nur-Sultan qalasynda osyndaı pýnkttiń ashylýy turǵyndar arasynda aýrýdyń jasyryn oshaqtaryn anyqtap, asqynýlardyń aldyn alý úshin ýaqtyly sanıtarlyq-epıdemııalyq jáne aldyn-alý sharalaryn júrgizýge múmkindik beredi.
Esterińizge sala keteıik, elordada koronavırýsqa jedel jáne joǵary dáldiktegi PTR-skrınıng júrgizý úshin birinshi modýldik zerthanalyq keshen iske qosyldy. Bolat О́temuratov qory Densaýlyq saqtaý mınıstrligi men Nur-Sultan qalasy ákimdigine ǵylymı-zertteý prosesin avtomattandyratyn biregeı zerthanany syıǵa tartty.
Zerthanada mynadaı sanattaǵy tulǵalar úshin tegin skrınıng júrgizedi: jumyssyzdar, az qamtylǵan jáne kópbalaly otbasylar, múgedektigi bar adamdar, stasıonarǵa josparly emdeýge jatqyzylatyn pasıentter, tynys alý organdary, endokrındik jáne júrek-qantamyr júıeleri aýrýlarymen dınamıkalyq baqylaýda turǵan 50 jastan asqan pasıentter; epıdemııaǵa qarsy is-sharalarǵa tartylǵan arnaıy kontıngent – volonterler men belsendiler, patrýlder; qarttar úılerindegi, ınternattyq jáne ózge de mamandandyrylǵan mekemelerdegi azamattar; mektepke deıingi mekemelerdiń qyzmetkerleri.
