Qazaqstan Prezıdentine bıylǵy 5 aıdaǵy elimizdiń áleýmettik-ekonomıkalyq damýy, koronavırýs indetiniń taralýyna qarsy kúres jumystary jáne sanıtarlyq-epıdemıologııalyq ahýaldy jaqsartý jóninde esep berildi.
Memleket basshysyna daǵdarysqa qarsy sharalardyń júzege asyrylýy, 2020 jyldyń sońyna deıin ekonomıkalyq ósimdi qalpyna keltirý jónindegi keshendi jospardyń oryndalýy jáne 2025 jylǵa deıingi strategııalyq damý josparynyń ázirlený barysy týraly baıandaldy.
Asqar Mamın Qasym-Jomart Toqaevqa koronavırýs pandemııasynyń saldarynan álemdegi iskerlik belsendiliktiń birden tómendeýine baılanysty bıylǵy qańtar men mamyr aralyǵynda ulttyq ekonomıkanyń ósý qarqyny, byltyrǵy osy kezeńmen salystyrǵanda, 1,7% tómendegenin aıtty. Úkimet basshysynyń málimeti boıynsha, ekonomıkanyń birqatar salalarynda, atap aıtqanda, taý-ken óndirisi, óńdeý, aýyl sharýashylyǵy, qyzmet kórsetý salalarynda, sondaı-aq, negizgi kapıtalǵa ınvestısııa tartý baǵytynda ósimniń oń qarqyny baıqalady.
Asqar Mamın barlyq sala boıynsha kóktemgi egis jumystarynyń tolyq aıaqtalǵany týraly da málimet berdi.
Budan bólek Premer-Mınıstr Prezıdentke halyqty jumyspen qamtamasyz etýdiń keshendi sharalary bıyl elimizdiń 1,22 mıllıon azamatyn qamtıtynyn jetkizdi.
Qazaqstan Prezıdenti elimizdiń birinshi jartyjyldyqtaǵy damý qorytyndylaryn talqylap, daǵdarys saldaryn eńserý mindetin qoıý úshin bıylǵy shilde aıynda Úkimettiń keńeıtilgen otyrysyn ótkizýdi josparlap otyr.
Kezdesý qorytyndysy boıynsha Qasym-Jomart Toqaev Asqar Mamınge ekologııalyq týrızmdi damytý jóninde jáne basqa da birqatar naqty tapsyrma berdi.
