О́tkenge sál sheginis jasasaq, Qazaqstannyń Tuńǵysh Prezıdenti – Elbasy Nursultan Ábishuly Nazarbaev 19 naýryzda jasaǵan tarıhı málimdemesinde: «Ol Qazaqstan táýelsizdiginiń alǵashqy kúnderinen bastap menimen birge jumys istep keledi. Men ony jaqsy bilemin. Ol – adal ári jaýapkershiligi joǵary azamat. Elimizdiń ishki jáne syrtqy saıasatyn jan-jaqty sezinedi. Ol barlyq baǵdarlamalardy ázirleýge jáne qabyldaýǵa atsalysty. Qasym-Jomart Kemeluly Qazaqstandy basqarýǵa naǵyz laıyqty azamat dep senemin», degen edi. Tarıhtyń tegershegi aınalar tusta Elbasy jasaǵan taǵdyrsheshti tańdaýdyń durys bolǵanyn mártebeli ýaqyttyń ózi ádil tóreshi retinde dáleldep berdi.
Baǵdarlamasy kópshiliktiń kóńilinen shyǵyp, kókeıge kóp úmit syılap, tartysty ótken saılaýda jeńiske jetken Qasym-Jomart Kemeluly ulyqtaý rásiminde Memleket basshysy retinde el damýynyń basym baǵyttaryn aıqyndap, zańǵa saı adal qyzmet etýge, jemqorlyqpen kúresýge, adam kapıtalyn damytýǵa, áleýmettiń áleýetin arttyrýǵa, ulttyq tabysty ádil bólýge, kópvektorly syndarly syrtqy saıasatty jalǵastyrýǵa, halyqtyń yntymaǵyn basty qundylyq retinde kózdiń qarashyǵyndaı qorǵaýǵa jáne sabaqtastyqty saqtaýǵa ýáde bergen edi. Osylaısha Prezıdent ishki-syrtqy saıasattaǵy strategııalyq sabaqtastyqty saqtaı otyryp, áleýmettiń áleýetin arttyratyn ádiletti qoǵam qalyptastyrýǵa batyl qadam jasady. Osy ýádelerdi oryndaý maqsatynda Ulttyq senim keńesin qurýdy, Prezıdenttiń kadr rezervin jasaqtaýdy jáne muǵalimder men dárigerlerdiń mártebesin kóterýdi qolǵa alatynyn málimdedi. Halyqqa jasaǵan alǵashqy Joldaýynda da bergen ýádege bolattaı berik ekenin baıqatty.
Bir jyl – baǵa berý úshin qysqa ýaqyt bolǵanymen, atqarylǵan qyrýar ister arqyly qoǵam Memleket basshysynyń tuǵyrnamasy bıik, tizgini berik, taqymy myqty tabandy tulǵa ekenin anyq ańǵardy. Osy jyldyń ishinde memlekettik basqarý júıesin jańǵyrtý maqsatynda azamattardyń ótinish-tilekterin jedel ári tıimdi qarastyratyn «Halyq únine qulaq asatyn memleket» tujyrymdamasy iske asa bastady. Jurtshylyqtyń jalaqysy kóbeıip, zeınetaqy men járdemaqy kólemi ulǵaıdy, turmysy tómen jáne kópbalaly otbasylardyń nesıeleri keshirilip, kórsetilgen ataýly áleýmettik kómek pen qosymsha qoldaýlar arqyly kedeıshilik deńgeıindegi eldiń eńsesi kóterildi. Ulttyq keńes qurylyp, qoǵamdy alańdatyp júrgen kóptegen kókeıkesti máselege qatysty naqty usynystar ázirlendi. Sonyń nátıjesinde saıası júıeni reformalaý jóninde birneshe zańǵa tolyqtyrýlar men ózgerister engizildi. Áleýmettik ádilettilik qaǵıdatyna basa mán berildi. Sybaılas jemqorlyqqa qarsy kúres kúsheıip, birinshi basshynyń jaýapkershiligi zańnamalyq turǵyda bekidi. Kadrlyq rezerv jasaqtalyp, bilikti, bilimdi jas mamandar memlekettik qyzmetke tartyldy. Syrtqy saıasattyń jańa tujyrymdamasy bekitildi. Alpaýyt memleketterge resmı saparlarmen baryp, senimdi seriktestik sheńberi shegelene tústi. Halyqaralyq yntymaqtastyqta ulttyq múdde men táýelsizdiktiń basty qundylyq ekeni basa aıtyldy. Qazaq tiliniń ultaralyq qatynas tili ekenine nazar aýdaryldy. Abaı men Farabı jylynda el rýhanııatyna qatysty eleýli jobalar qolǵa alyndy. Jer satylmaıtyn boldy, qymbat jobalar toqtatyldy. Bilim-ǵylymǵa, ásirese, densaýlyq saqtaý salasyna basa mán berildi.
Árıne, bir jyldyń bederinde atqarylǵan júıeli isterdi osylaı tizbeleı berýge bolady. Aıtýǵa ǵana jeńil bul ıgi bastamalardyń barlyǵy Arystaǵy alapat jarylys, Qordaıdaǵy jappaı tártipsizdik, tabıǵı apat, munaı baǵasynyń quldyraýy, jahandyq qarjylyq qıyndyq, jer dúnıeni jaılap, talaı memleketti tyǵyryqqa tiregen indet sııaqty qoldy baılaıtyn kúrmeýi qıyn kúrdeli kezeńinde iske asyrylǵany da belgili. Eń bastysy, Prezıdent osy synaqty jurtpen birge tapsyryp, elmen birge shyńdaldy.
El Prezıdenti qyzmetine kiriser tusta Qasym-Jomart Toqaev: «Men senimge sert berip, úlken úmittiń údesinen shyǵý úshin bar qajyr-qaıratymdy jumsaımyn!» degen edi. Sondyqtan Elbasynyń senimge sert bergen serigi, syndarly jylda synnan súrinbeı ótken sańlaq saıasatker, birneshe tildi jetik biletin ıntellektýal, ádilettiń aq jolynan aınymaǵan, amanat arqalaǵan tegeýrindi tulǵanyń elimizdi bıik belesterge bastap, damýdyń dańǵyl jolynda sabaqtastyqtyń saltanat quraryna bek senimdimiz.
