Osylaısha eldiń bas qalasynan Halıf Haftardyń áskeri alystatylyp, Trıpolı ákimshilik aımaǵy Ulttyq kelisim úkimetiniń baqylaýyna ótti. Oǵan qosa buǵan deıin Lıvııa ulttyq áskeriniń qaraýynda bolǵan Ál-Vashka, Ál-Bagla aýdandary da Ulttyq kelisim úkimetine qaıtarylǵan.
О́tken aptada azamattyq soǵysqa qatysyp jatqan qos tarap shetelge jańa kelisimder jasaýǵa attandy. Ulttyq kelisim úkimetiniń basshysy Faıze Sarradjdyń ózi Túrkııaǵa jol tartsa, orynbasaryn Reseıge jiberdi. Al Reuters agenttigi Halıf Haftar Mysyrǵa barypty dep jazady. Kelissózderge attanbas buryn F.Sarradj halyqaralyq Trıpolı áýejaıyn óz baqylaýyna ótkizip, el bıligindegi ornyn naqtylaı túsken.
Al eldegi azamattyq soǵysty ózderinshe qoldap otyrǵan derjavalar kóp. Sırııa máselesinde kelise almaǵan Túrkııa men Reseı taǵy da aımaqtaǵy shıeleniske «qyzyǵýshylyq» tanytyp otyr. BUU moıyndaǵan Faıez Sarradjdyń Ulttyq kelisim úkimetin Túrkııa resmı qoldasa, Qatar beıresmı túrde qoldaý kórsetýde. Al Lıvııanyń shyǵysyn baqylaýda ustap otyrǵan Haftardyń jaqtastary – BAÁ men Mysyr. Reseı bul shıeleniste beıtaraptyqty ustanyp, Ulttyq kelisim úkimetimen de, general Haftar tarapymen de baılanys ornatqan.
2011 jyldan beri Lıvııada ortalyqtandyrylǵan bılik joq. El BUU moıyndaǵan Faıez Sarradj úkimeti men Halıf Haftardyń basqarýyndaǵy Lıvııa ulttyq áskeri arasynda qalyp otyr. Kúshterdiń teketiresine tipti koronavırýs pandemııasy da tusaý bola almady.
BUU moıyndaǵan úkimettiń eldiń bas qalasyn qaıtaryp alýy Lıvııadaǵy beıbitshiliktiń nyshany emes. Kerisinshe lıvııalyqtardyń basyna qara bult úıirile túskendeı. Qos taraptyń qaqtyǵystarynan ádette qarapaıym halyq zardap shegýde. Gaz ben munaı sekildi resýrstarǵa baı memleket azamattaryn bilim, densaýlyq saqtaý sekildi adam ómirine mańyzdy alǵysharttarmen qamtamasyz ete almaı otyr. Odan da aýyry – qaýipsizdiktiń bolmaýy.
Aqparat quraldarynan Túrkııanyń Lıvııa aýmaǵynda eki turaqty baza salýǵa daıyndalyp jatqany belgili boldy. Ulttyq kelisim úkimeti Túrkııanyń bul jospary úshin Ál-Vatııa áýe bazasyn berýdi qarastyryp jatyr. Al ekinshi baza Mısrata portynda salynady degen jospar bar. Jańadan salynatyn portqa kemeler ákelinbek. Al bul óz kezeginde Túrkııany Lıvııanyń óndirisine ortaq etedi degen boljamdy týyndatýda.
AQSh bul jaǵdaıda da qarap qalmady. Jaqynda AQSh memlekettik hatshysynyń Taıaý Shyǵys isteri boıynsha kómekshisi Devıd Shenker Reseıdi Lıvııa isine aralasyp, nátıjesinde Túrkııa ıntervensııasyna ákeldi dep aıyptady. Alaıda bul aıybyna naqty dálelder keltire almady.
AQSh memlekettik hatshysy Maık Pompeo Lıvııadaǵy qos úkimettiń BUU sheńberinde kelisimge kelýi beıbitshilikke jasalǵan alǵashqy qadam dep oılaıtynyn aıta kelip, «Premer-mınıstr Faıez Sarradj ben marshal Halıf Haftardyń bıyl aqpanda Jenevada ótken kelissózderde ortaq mámilege kele alýy qýantty. Alaıda olar máselege basqa memleketterdiń aralasýyna jol bermeýi kerek. О́ıtkeni óz paıdasyn oılaǵan elder Lıvııanyń táýelsizdigine nuqsan keltirýi múmkin», dedi memlekettik hatshy.
Lıvııada syrtqy kúshterdiń áserimen qatar jergilikti toptardyń talasy baryn eskersek, aımaqtaǵy shıelenistiń sheshilýi uzaqqa sozylmaq. Eldiń burynǵy basshysy Kaddafıdiń óliminen keıin Lıvııada úlken toptar bılik júrgizýge kóshti. Qazir eldiń soltústik-batys aımaǵyndaǵy Mısýrat qalasynyń turǵyndary Ulttyq kelisim úkimetin qoldap otyrsa, kórshiles jatqan Zıntan qalasyndaǵylar Haftar áskeriniń jaǵynda.
