Alakólde týrıstik maýsym ashyldy

Ázirge qonaqúıler demalýshylardyń 50 paıyzyn qabyldaıdy

Tórtkúl dúnıeni álekke salǵan in­detke baılanysty bıyl Alakóldegi demalys úıleriniń ıelerine de qatań talaptar qoıylyp, úlken jaýapkershilik júktelip otyr. Juqpaly dert oblys­ aýmaǵynda azaımaı turǵandyqtan olar­ǵa ázirge demalýshylardyń tek 50 paıy­­zyn qabyldaýǵa ruqsat berilgen.

Ja­qynda Alakóldiń týrıstik maýsymǵa daıyndyǵyn tekserýge О́skemennen arnaıy kelgen oblys ákimi Danıal Ahmetov kásipkerlermen kezdesý ótkizgende demalýshylardyń qaýipsizdigi birinshi orynda turýy kerektigin qadap tapsyrdy. «Demalys úılerimiz ashylmaı qala ma dep alańdap otyrǵandaryńyzdy da túsinemiz. Eger 13-23 maýsym araly­ǵynda kól jaǵalaýynda koronavırýs ınfeksııa­sy tirkelmese, demalys oryn­darynyń basshylaryna qonaqúılerdiń jobalyq syıymdylyǵyna sáıkes 75 paıyzǵa deıin adamdardy ornalastyrýǵa ruqsat etiledi. Odan keıingi ýaqytta jaǵalaýdaǵy jaǵ­daı turaqty bolsa, barlyq nysan 1 shil­deden bastap tolyq jumysqa kirisedi. Biz óz tarapymyzdan bar­lyq jaǵdaıdy jasap otyrmyz. Endi sizder ózderińizge júktelgen mindetti laıyqty deńgeıde atqarýlaryńyz qajet. Eń mańyzdysy, ha­lyqtyń densaýlyǵy. Sondyqtan bar­lyq sanıtarlyq talaptar saqtalýy tıis» deıdi aımaq basshysy.

Sanıtarlyq talaptar demekshi, kól jaǵalaýyndaǵy demalys úıleriniń barlyǵy tekserýden ótkizilgen. 5 maýsym­nan bastap arnaıy úsh monı­torıngtik top Alakólde jumys isteýde. Olar kól jaǵasyndaǵy 175 qonaqúıdiń da­ıyndyǵyn, sanıtarlyq talaptardy qan­shalyqty oryndap jatqandyǵyn tekserýde. «12 maýsymdaǵy reıd qo­ry­tyndysy boıynsha 60 demalys ornynyń ishinara daıyn ekenine kóz jet­kizdik. Qazir osy 60 demalys ornynda sanıtarlyq-epı­­demııalyq nor­malardy saqtaý ju­mystary júrgi­zilýde. 14 demalys ornyna «Týrısterdi qabyldaýǵa daıyn» degen akti berildi. Atalǵan demalys oryndarynda kelý­­shilerdiń 50 paıyzy (712 adam) or­­na­lasa alady. 101 demalys orny da­ıyndyqty ázirshe bastaǵan joq. Sebebi bul demalys oryndarynyń deni 2-3 jaǵalaýlarda ornalasqan. Sáı­kesinshe, olar 20 maýsymǵa taman ashylady» deıdi oblystyń bas sanıtar dárigeri Marat Ismaılov.

Alakólde týrısterdi qabyldaýǵa eń birinshi bolyp ruqsat qaǵazyn al­ǵan «Parýs» demalys ornynyń ıesi Janna Ramazan barlyq sanıtarlyq-epıdemııalyq talaptardy oryn­daýǵa daıyn ekendikterin aıtady. «Res­mı túrde jumys isteýge ruqsat aldyq. Ár­bir shyǵaberis esikte sanıtaızerler qo­ıylyp, áleýmettik qashyqtyq saq­talǵan. Qorǵanys quraldary da bar. Qazaqstandyqtarǵa aıtar ótinishimiz, je­del testten ótkenińiz týraly anyqta­ma­ny umytpaı ala kelýlerińizdi suraı­myz» deıdi ol.

Iá, kásipkerler jaýapkershilik júgi salmaqty ekendigin túsinip otyr. «Demalys ornyn ashpastan buryn ar­naıy dezınfeksııalyq quraldar, dezınfeksııalyq kilemder, qolǵa arnal­ǵan antıseptıkter, maskalar men bas kıimder alyndy. Sonymen qatar demalýshylar qaýipsizdik sharalaryn bilsin dep jadynamalar shyǵardyq. Bizdiń bas­ty mindet – adamdardyń densaýlyǵyn saq­taý. Biz úshin adamdardyń emin-erkin demalýy mańyzdy» deıdi «Rassvet» demalys ornynyń ákimshisi Tatıana Kalýgına.

Oblys ákimi kásipkerlermen kezdesýde monıtorıngtik top quramyna demalys úıleriniń ıeleri de kirip, sa­nıtarlyq-epıdemııalyq talaptardyń saq­talýyn teksere alatyndyǵyn aıt­qan bolatyn. «Kezdesýde aımaq bas­shy­sy monıtorıngtik toppen birge ju­mys is­teýdi usyndy. Qazir biz top mú­she­lerimen birge demalys orynda­ry­nyń qonaqtardy qarsy alýǵa qan­sha­lyqty daıyn ekenin tekserip jatyrmyz. О́ıtkeni demalýshylar men qyz­metkerlerdiń densaýlyǵy biz úshin birinshi orynda» deıdi «Injý» jáne «Alakól Arasan» demalys oryndarynyń ıesi Anar Batymova.

Úrjar úlgili aýdanǵa aınalady

Sońǵy jyldary Alakóldiń Shyǵys bóligi aıtarlyqtaı ózgergeni belgili. Ásirese jaǵalaýdy abattandyrý jumys­tary qarqyndy túrde júrgizilýde. «Kól jaǵalaýyn abattandyrýǵa 2016 jyl­dan beri 6,2 mlrd teńge qarajat jumsaldy. Bıyl bul baǵytqa tartylǵan ın­vestısııa kólemi 3,9 mlrd  teńgeni qurap otyr. Kól jaǵalaýynda 345 kásip­kerlik nysan tirkelgen. 11 myńnan as­tam orynǵa shaq­talǵan 175 demalys úıi, 36 qoǵamdyq tamaqtaný orny, 27 dúken, 104 dúńgirshek, 3 dárihana bar. Bıyl 8 demalys orny salyndy. 11-i aýmaǵyn keńeıtti. Sóıtip qosymsha 650 oryn paıda boldy. Sonymen qatar 200 oryndyq «Alakol love» týrıstik kesheniniń qurylysy bastaldy. Budan bólek «Jumyspen qamtýdyń jol kartasy» baǵdarlamasy boıynsha eki aýqymdy joba qolǵa alyndy. Joba aıasynda sý jáne elektr jelileri tartylady. Bıylǵy jańalyq, jalpy aýmaǵy 2,5 shaqyrymdy quraıtyn velojol men 5 jańa modýldi saýda pavılondarynyń qurylysy aıaq­taldy. Jaqynda kól jaǵalaýynda jańa dárethanalar, kıinýge arnalǵan kabınalar, qutqarýshy beketteri iske qosylady» deıdi Úrjar aýdanynyń ákimi Nurjan Toqseıitov.

Alakólge ınvestısııa quıyp, demalý­shylarǵa arnalǵan jańa nysandar turǵy­zyp jatqan kásipkerler de az emes. So­­lar­dyń biri – Arman Ahmetqanov. Kásip­ker ashyq aspan astynda 3,5 myń adam sııatyn ALAZONE ARENA atty shaǵyn qalashyq salýdy josparlap otyr. Iýrmala qalashyǵynyń úlgisimen boı kóteretin nysanda sahna, qonaqúı, qoı­ma, as úı, bı alańy, VIP terassa, balalar alańy, bar, kassa, avtoturaq, kórermen alańy, karaoke, jasyl gazon, demalý aı­maǵy bolady. «Oblys ákiminiń bastamasymen ınvestor retinde sáýir aıynda ju­mysty bastap kettik. Maqsatymyz – Alakóldegi týrızm deńgeıin kóterý, demalýshylar sanyn kóbeıtý. Joba eki jyl kóleminde júzege asady» deıdi kásipker.

Budan bólek taǵy bir ınvestısııalyq joba qolǵa alynbaq. Oblystyq Tý­rızm jáne syrtqy baılanystar bas­qar­masy basshysynyń orynbasary Inara Bodýkovanyń aıtýynsha, joba aıasyn­da tórt juldyzdy qonaqúı boı kótermek. Qazirgi ýaqytta onyń qurylys jumystary bastalyp ta ketken. Týrıstik nysanda demalýshylarǵa qajetti barlyq jaǵdaı jasalady. Sondaı-aq onda basseın men balalarǵa arnalǵan oıyn alańy salynady.

Alakólge jasaǵan jumys sapary barysynda oblys ákimi Danıal Ahmetov tek kól jaǵalaýyna ǵana emes, aldaǵy ýaqytta aýdan ortalyǵy – Úrjar aýy­lyna erekshe kóńil bólinetinin jet­kizdi. «Úrjardy qalaı abattandyramyz? Eń áýeli Úrjardaǵy áýejaıda qaı­ta jóndeý jumystary júrgiziledi. Ushý-qoný jolaǵy uzartylady. Bul óz ke­zeginde kez kelgen ushaqtyń munda ushyp kelýine múmkindik beredi. Osy baǵyttaǵy jumystar keler jyldyń sońyna deıin júzege asyrylady. Al Úrjar aýylyn abattandyrýǵa 2,2 mlrd teńge bólinedi. Úsh jyldan keıin Úrjar adam tanymas­taı ózgeredi» deıdi aımaq bas­shysy.

Shyǵys Qazaqstan oblysy,

Úrjar aýdany