Úkimet pen sala kóshbasshylarynyń birlese atqaratyn bul jospary boıynsha kómektiń alǵashqy bóligi – 7 mlrd eýro Air France áýe kompanııasyna berilgen. Sondaı-aq qorǵanys salasyna jumsalatyn qarjy kólemin de arttyrý qarastyrylady. Bul jospardy iske asyrý úshin Airbus pen Dassault Aviation ushaq óndirýshileri, qozǵaltqysh óndiretin Safran jáne Thales tehnologııalyq kompanııasy 1 mlrd eýro kóleminde ınvestısııa quımaq.
Fransııanyń Qarjy mınıstri Brýno Le Mer sala kóshbasshylarynyń biri eýropalyq Airbus kompanııasy halyqaralyq naryqta amerıkalyq Boeing-qa ne qytaılyq COMAC ushaq óndirý kompanııasyna ese jibermeıtinin aıta kele, eldegi aeroǵarysh ónerkásibin barynsha qoldaýymyz kerek dedi.
Fransııa aldaǵy úsh jyl ishinde ekologııalyq taza tehnologııany zertteýge 1,5 mlrd eýro jumsaýdy josparlap otyr. Osylaısha eldiń Azamattyq avıasııa ǵylymı-zertteý keńesine (Corac) bólingen qarajat kólemi kúrt ósken.
Qomaqty qarajatty quıǵandaǵy maqsat – Eýropada suranysqa ıe A320 ushaǵynyń kómirtekti beıtarap úlgisin jasap shyǵarý. Bul degenimiz ushaqtarǵa energııa kózi retinde búgingi munaı-gaz týrbınalarynyń ornyna sýtegi qoldanylady. Eldiń qarjy mınıstri bul ushaqty josparlanǵan 2050 jyldan erterek 2035 jyly jasap shyǵarý basty maqsat ekenin aıtty.
