Taıaýda partııa Tóraǵasy qazaqstandyq eń belsendi volonterlerge óz yqylasyn bildirip, Alǵys hattarǵa qol qoıǵan edi.
«Tótenshe jaǵdaı kezinde Jas Otan búkil el boıynsha bes myńnan astam eriktini jumyldyrdy. Olar demalyssyz jumys istep, muqtaj adamdarǵa kómek jetkizdi. Naǵyz patrıottardyń, jaýapkershiligi mol jas kóshbasshylardyń jańa býyny qalyptasqany qýantady. Olardyń eń belsendilerine arnalǵan Alǵys hattarǵa qol qoıdym», dedi Nursultan Nazarbaev.
Saltanatty shara barysynda Nur Otan partııasy Tóraǵasynyń birinshi orynbasary Baýyrjan Baıbek Jas Otan jastar qanatynyń volonterleri respýblıka boıynsha 250 myńnan astam otbasyna azyq-túlik sebetterin, maskalar men eń qajetti zattardy jetkizip bergenin atap ótti. Sondaı-aq jasotandyqtar alǵashqylardyń biri bolyp Maqtaaral aýdanyna attanǵanyn, 500-den asa jas áli de tabıǵı apattan zardap shekken aýyl turǵyndaryna aqysyz kómek kórsetýdi jalǵastyryp jatqanyn habarlady.
«О́zderińiz biletindeı, Elbasynyń bastamasymen Nur Otan partııasy Memleket basshysynyń qolǵa alǵan daǵdarysqa qarsy sharalaryna qosymsha muqtaj azamattarymyzǵa qarqyndy kómek kórsetip jatyr. Nursultan Nazarbaevtyń bastamasymen qurylǵan «Birgemiz» qorynyń jelisi boıynsha mesenattardyń qoldaýymen 470 myńnan astam otbasy 50 myń teńgeden birjolǵy tólemaqy aldy. Tuńǵysh Prezıdent Qorymen birge asa muqtaj otbasylarǵa ataýly qoldaý kórsetý uıymdastyryldy. Osynaý jumystardy atqarýda volonterlerimizdiń róli zor boldy. Bul rette Nursultan Ábishuly 2019 jyldy Jastar jyly dep belgilese, al 2020 jyldy el Prezıdenti Qasym-Jomart Toqaevtyń Volonter jyly dep jarııalaýy sımvoldyq mánge ıe boldy. Sizder Otanǵa degen súıispenshilikterińizdi, azamattyq pen janashyrlyqtaryńyzdy tanyta otyryp, búkil qazaqstandyq jastarǵa úlgi kórsettińizder», dedi Baýyrjan Baıbek.
Sonymen birge partııa Tóraǵasynyń birinshi orynbasary jastardy aldaǵy partııaishilik tańdaý – praımerızge qatysýǵa shaqyrdy.
«Jaqynda partııa Lıderi bıylǵy 17 tamyzdan 3 qazanǵa deıingi aralyqta Praımerız ótkizý týraly qaýlyǵa qol qoıdy. Bizdiń maqsatymyz – aldaǵy Májilis pen barlyq deńgeıdegi máslıhattar saılaýlaryna partııalyq tizimder qalyptastyrý úshin jańa lıderlerdi anyqtaý boıynsha barynsha ashyq ári básekelestik negizde irikteý ótkizý. Bul rette 35 jasqa deıingi jastarǵa – 20%, al áıelder úshin 30% kvota kózdelgen. Osy arqyly biz daryndy da bastamashyl jastarymyz úshin partııalyq «áleýmettik lıftini» qamtamasyz etpekpiz», dedi Baýyrjan Baıbek.
Osy aptanyń ishinde Nursultan Nazarbaevtyń atynan Alǵys hattarmen úsh myńdaı qazaqstandyqty marapattaý josparlanǵanyn atap ótken jón. Olardyń arasynda partııanyń óńirlik fılıaldarynyń volonterleri men belsendileri, sondaı-aq mesenattar bar.
«Tótenshe jaǵdaı rejimi engizilgen kezde qıyn jaǵdaıǵa tap bolǵan azamattar kóp. Meniń olarǵa qandaı da bir kómek bergim keldi. Áleýmettik jelilerden Nur Otan partııasy muqtaj azamattarǵa azyq-túlik jetkizip berip jatqanyn jáne bul iske kómek beretin eriktiler qajet ekendigin bilgennen keıin uıymdastyrýshylarǵa birden habarlastym. «Biz Birgemiz» sekildi aýqymdy aksııaǵa qatysqanyma sheksiz rızamyn», deıdi volonter Elmıra Aıǵalıeva.
Jas Otan jastar qanaty belsendileriniń biri Sergeı Matıýshenko óz kezeginde Elbasynyń Alǵys hatyn alý erekshe mártebe ekenin jáne onyń adamdarǵa kómek kórsetýge kúsh-jiger syılaıtynyn atap ótti.
«Elimiz úshin osynaý kúrdeli ýaqytta Nur Otan partııasy barsha aqjúrek azamattar men jastardy biriktire otyryp, jurtqa óziniń jaýapkershilikti arqalap, halyqtyń qamyn oılaıtyn saıası kúsh ekendigin kórsete bildi. Aldaǵy praımerız – partııanyń jastarǵa óz qabiletterin ashýlary úshin naqty jaǵdaı jasap otyrǵanyna taǵy da bir dálel», dedi ol.
