Ipotekalyq qaryzdardy jeke-jeke qaraıdy

Agenttiktiń habarlaýynsha, búgingi tańda ekinshi deńgeıdegi bankter men ıpote­ka­lyq uıymdar 256,7 mlrd teńge somaǵa 37 191  ıpotekalyq qaryzdy qaıta qarjylan­dyrý­dy maquldaǵan. Baǵdarlama birneshe blok­tan turady. Ipotekalyq qaryzdy qaıta qarjylandyrý baǵdarlamasy borysh­kerlerdiń jalǵyz baspanasyn saqtaýǵa, borysh júktemesin tómendetýge jáne olardy  valıýta baǵamdarynyń qubylýynan qorǵaýǵa baǵyttalǵanyn aıta keteıik.

 2004-2009 jyldary baǵdarlamanyń birinshi blogynda Ulttyq bank boryshker­lerdiń bereshegin jeńildetý úshin 130 mlrd teńge bóldi. Ol qarjyny bankter ıgerdi. Endigi kezekte qaıta qarjylandyrý buǵan deıin qaryzdardy óteýden túsken aqsha esebinen júzege asyrylýda. Qazir jalpy kólemi 174,7 mlrd teńgeni quraıtyn 28 117 ótinish maqul­dandy, 161 mlrd teńgeni quraıtyn 27 006 qaryz qaıta qarjylandyryldy.

Baǵdarlamanyń ekinshi blogynda 2016 jylǵy 1 qańtarǵa deıin alynǵan jeke tulǵa­lar­dyń valıýtalyq ıpotekalyq qaryz­daryn Ulttyq bank 2015 jylǵy 18 tamyzdaǵy teńge baǵamy boıynsha teńgemen qaıta qar­jylandyrmaq. 1 maýsymdaǵy jaǵdaı bo­ıynsha 82 mlrd teńge somaǵa 9 074 ótinish ma­qul­­danyp, 68,4 mlrd teńgeniń 7 750 valıý­­ta­lyq ıpotekalyq qaryzy qaıta qar­jylan­dyryldy.

Bıylǵy qańtar aıynan bastap Qarjy na­ry­ǵyn retteý jáne damytý agenttigi ha­lyq­­tyń áleýmettik osal toptary sanatyna ja­ta­tyn qaryz alýshylardyń ıpoteka­lyq jú­k­te­mesin tómendetýge, sondaı-aq aza­mat­tar­­dyń jalǵyz baspanasyn banktiń bala­nsy­­­nan kepil berýshiniń menshigine qaı­tarýǵa ba­ǵyt­talǵan qosymsha sharalardy engizgenin atap ótken lázim. Bul baǵdarla­manyń úshinshi blogy sheńberinde atqarylǵan jumys.

Valıýtalyq ıpotekalyq qaryzdardy qaı­ta qarjylandyrý merzimi 2020 jylǵy 31 jel­toqsanǵa deıin uzartyldy. Qaryzdyń baǵ­dar­lama talaptaryna sáıkestigin anyqtaý úshin azamattar kredıtor-bankke júginýi qajet.

Agenttik bankterge baqylaý júrgizedi, elimizdiń barlyq óńirlerinde banktiń qaryzdy qaıta qarjylandyrýdan bas tartýynyń zańdylyǵy týraly qaryz alýshylardyń shaǵymdaryn qaraıtyn arnaıy komıssııalar qurylǵan. 2020 jylǵy 1 maýsymdaǵy jaǵdaı boıynsha komıssııalar qaryz alýshylardyń 5 094 shaǵymyn qarady. Qoǵamdyq birlestikterdiń ókilderi óz kezeginde komıssııalardyń ókilettikterin keńeıtýdi jáne ekinshi deńgeıdegi bankterdiń ıpotekalyq qaryzdar boıynsha ótinishterdi qaraý merzimin jedeldetýdi usyndy.