Byltyr kúzde Túrkistan oblysynyń Arys qalasynan memlekettik «Eńbek» baǵdarlamasy aıasynda Aıagózge kóship kelgen otbasy bir emes, eki birdeı jylyjaı ashyp tastapty. Aınaldyrǵan eki sotyq jerdegi jylyjaıda ósirilgen qııarlardy eshqandaı pııarsyz, jarnamasyz-aq qala turǵyndary úıden kelip, ózderi alyp ketedi eken. «Qııar kóshetterin sáýirdiń basynda otyrǵyzdyq, mamyr aıynyń sońynan bastap aqyryndap sata bastadyq. Eki jylyjaı kúnara 25-30 kelige deıin ónim berip jatyr. Aıagózge syrttan ákelinetin qııarlardyń baǵasy 400 teńge bolǵandyqtan, biz de osy baǵaǵa toqtadyq. Qansha degenmen úı qııarynyń jóni bólek qoı. Sodan da bolar, qazir qııarlarymyzǵa suranys kóp. Jubaıym ekeýmiz kóktemde 2 jarym myńǵa jýyq qyzanaq kóshetterin sattyq. Bir tańǵalǵanymyz, qyzanaq kóshetterin jármeńkede jarty saǵat bolmaı talap alyp ketti. 50 teńgeden berdik. Bul jaqta baǵasy jaqsy eken. Áıtpese ońtústikte eń jaqsy degen kóshetterińiz eki-úsh teńgeden ázer ótedi» deıdi otaǵasy, bes balanyń ákesi Tólegen Bekturǵanov.
Eńbekqor otbasynyń jylyjaı turǵyzýyna «Bastaý bıznes» jobasy arqyly berilgen 505 myń teńge qaıtarymsyz granttyń septigi tıipti. Tústikten kelgen azamatqa Aıagóz aýdandyq ákimdigi de qoldaý bildirip, jylyjaı turǵyzý úshin 90 sotyq jer beripti. Tólegen aǵamyzdyń endigi oıy sol jerdi jaqsylap ıgerip, qysy-jazy jumys isteıtin jylyjaı salý, kásibin odan ári keńeıtý. «Negizi jubaıym ekeýmiz basqa óńirge qonys aýdarýdy burynnan oılastyryp júrgenbiz. Byltyr Arysta jarylys bolǵannan keıin osy oıǵa nyqtap bekindik. Onyń ústine kishkene qyzymyz jarylystan keıin ózinen ózi shoshynatyndy shyǵardy. Áli de boıynda qorqynysh bar. Sóıtip júrgende, Shyǵystan adamdar kelip, olarmen sóılesip, osy jaqqa kelýdi uıǵardyq. Bul da qazaqtyń bir qasıetti jeri ǵoı» deıdi keıipkerimiz.
Tólegen aǵamyzdyń jubaıy Meıramgúl Ydyrysova «Aıagóz qalaı eken?» degen suraǵymyzǵa «Jeli bizben birge turyp, birge jatady eken. Keıde jel qatty soqqanda «Beker keldik pe?» dep oılanyp qalasyń. Sosyn qaıta basylady. Aıagózdiń jeli qyzyq» dep ázildeı kele, Aıagóz qalasynyń Arysqa uqsaıtyn tustary kóp ekendigin aıtty. «Toǵyz joldyń torabyndaǵy shahar eken Aıagóz. Poıyzy da bar. Áskerı qalashyq ta munda bar eken. Áıteýir, ózimizge unap jatyr. Meniń negizgi mamandyǵym – hımııa pániniń muǵalimi. Alaıda 10 jyldan astam ýaqyt bala tárbıesimen otyryp, jumys isteı almadym. Jergilikti ákimdik maǵan jumys jaǵynan kómektesemiz dep otyr» deıdi bes balanyń anasy.
Bes bala demekshi, balalarynyń aldy Qudiret bıyl Aıagózdegi №1 mektepti bitiripti. Osy bir jyl ishinde «Abaı oqýlaryna» jáne robototehnıkaǵa qatysyp, jaqsy nátıjelerge qol jetkizipti. Volonter bolyp, Jastar ortalyǵynan Alǵys hat alypty. Qazir kún-tún demeı UBT-ǵa daıyndalyp jatyr eken. Búginde jaldamaly úıde turyp jatqan otbasy aldaǵy ýaqytta ózderi satyp alǵan jańa úıge kóshetindikterin aıtady. «Qalaı bolatynyn ýaqyt kórsetedi. Qazirgi josparymyz – ákimdik bergen jerdi ıgerý. Joldasym ekeýmiz jylyjaı ashýdy burynnan armandaıtynbyz. Bir ǵana másele, sol jerdi óńdeýge qarajatymyz jetińkiremeı tur. Ákimdik jerdi tegistep, sý, elektr tartýǵa kómektesse, ári qaraı ózimiz alyp ketemiz ǵoı» deıdi Meıramgúl Ydyrysova.
Jalpy, «Eńbek» baǵdarlamasy aıasynda Aıagóz aýdanyna 2019 jyly Almaty, Túrkistan, Qyzylorda oblystarynan 18 otbasy (63 adam), 2020 jyly Almaty oblysynan 7 otbasy (20 adam) qonys aýdarypty.
Shyǵys Qazaqstan oblysy,
Aıagóz aýdany
