Shekteý sharalary kúsheıedi

Elimizdegi sanıtarlyq-epıde­mııalyq ahýal týraly Densaýlyq saqtaý mınıstriniń mindetin atqarýshy L.Aqtaeva, óńirlerdegi jaǵdaı týraly Nur-Sultan qalasynyń ákimi A.Kólginov, Almaty qalasynyń ákimi B.Saǵyntaev, Qaraǵandy oblysynyń ákimi J.Qasymbek, Aqmola oblysynyń ákimi E.Marjyqpaev, Túrkistan obly­synyń ákimi О́.Shókeev baıandady.

Qazaqstannyń birqatar óńirinde epıdemııalyq jaǵdaıdyń órshýin jáne koronavırýs ınfeksııasymen aýyrý kórsetkishiniń artýyn eskere otyryp, VAK bıylǵy 20-21 maýsym, demalys kúnderi mynadaı qosymsha shekteý sharalaryn engizý týraly sheshim qabyldady:

1. Nur-Sultan, Almaty, Qaraǵan­dy, Shymkent, Pavlodar, Ekibastuz qalalary boıynsha:

• saýda oıyn-saýyq ortalyqtarynyń, saýda úıleriniń, jelilik dúkenderdiń, jabyq azyq-túlik jáne basqa da bazar­lardyń qyzmeti toqtatylady;
• qoǵamdyq tamaqtaný oryndary tek dalada ári áleýmettik ara qashyqtyqty saqtap qana jumys isteýi tıis;
• qoǵamdyq kólikterdiń qyzmeti shekteledi;
• qoǵamdyq demalys oryndary: saıabaqtar, jaǵajaılar, akvaparkter qyzmeti toqtatylady;
• fıtnes-ortalyqtardyń qyzmeti toqtatylady;
• 65 jastan asqan adamdardyń dalaǵa shyǵýy shektelsin.

2. Turǵyndarynyń sany 50 myń­nan asatyn eldi mekender boıynsha:

• qoǵamdyq oryndardyń: saıabaqtar, jaǵalaýlar, jaǵajaılar, akvaparkter jumysy toqtatylady;
• 65 jastan asqan adamdardyń dalaǵa shyǵýy shektelsin.

3. О́ńirlerdiń bas sanıtarlyq dári­gerleriniń qaýlylaryna sáıkes Nur-Sultan, Almaty, Qaraǵandy, Shymkent, Pavlodar jáne Ekibastuz qalalaryna aýmaqtyq jaqyn ornalasqan týrıs­tik aımaqtarǵa kirýge tyıym salý, al atal­ǵan aımaqtardaǵy adamdarǵa – áleý­mettik qashyqtyqty saqtaý qajet.

Úkimet basshysy óńirlerdiń ákimdik­terine qysqa merzim ishinde myna máselelerdi pysyqtaýdy tapsyrdy:

• medısınalyq uıymdar bazasynda qosymsha zerthanalar ashý arqyly ha­lyqty PTR-testileýmen qamtýdy keńeıtý;
• aýrýhanalarda ınfeksııalyq jáne provızorlyq oryndar sanyn kóbeıtý;
• menshik nysanyna qaramastan, óńir­de bar resýrstardy tarta otyryp, naý­qas­tar­dy KT-zertteýmen qamtamasyz etý;
• jedel medısınalyq járdem stan­­salarynyń shuǵyl jáne kezek kúttirmeıtin shaqyrýlarǵa ýaqtyly qyzmet kórsetýin qamtamasyz etý;
• úılerinde jatqan pasıentterge ambýlatorlyq-emhanalyq kómek deń­geıinde sapaly dınamıkalyq baqy­laý jasaý (qashyqtan, mobıldi brıga­dalardyń kómegimen);
• halyqqa belsendi aqparattyq-túsindirý jumystaryn júrgizý.