Tanym • 26 Maýsym, 2020

Jýrnalıstıka jampozy

168 ret kórsetildi

Essemizdiń álqısasyn beınelep órnektesek, búgingi tańda qazaqtyń rýhanı-mádenı álemi «Egemenmen» birge tynystap turǵandaı. Qasıetti shańyraqtyń tabaldyryǵynda esim-soıynan at úrketin talaı tarlandar men jaısańdardyń óshpes izderi saırap jatyr. Rasynda, Otanymyzdyń bas gazetine kimder kelip, kimder ketpedi deseıshi?! Sol sóz sardarlarynyń qaı-qaısysy haqynda syr tıegin aǵytsańyz, nebir eleń etkizer jaǵdaıattarǵa tap bolasyz. Sóıtse-daǵy «Egemen Qazaqstannyń» kıeli tórine bir emes-aý, eki márte kóterilgen jýrnalıstıka jampozy Myńbaı Ilesov tóńireginde sherter lebizimiz alabóten-aý. Sonymen...

SÝRETTE: Myńbaı Ilesov, Janat Elshibek, Januzaq Ábdiqulov, Baqtııar Erimbetov jáne Aǵaıdar Ysymov. 1982 j.Almaty.

 

Júregi jyly, júzi jarqyn

Uzyn ǵu­myr jolynda jadyńda álsin-álsin jań­ǵy­ryp, aıryqsha áser­ge bóleıtin órkeshti oqıǵalar bolady. Sondaı sáýleli sát­terdiń biri – «Sosıalıstik Qazaqstan» gaze­tiniń tabal­dyryǵyn attaǵan kún. Sá­ýir­­diń mól­diregen on ekinshi juldyzy. Máńgi umyt­paıtyn syqyldymyn. Adam­­zattyń tyl­sym álemge – ǵaryshqa sam­ǵa­ǵan kúni «SQ»-ǵa qyzmetke ornalastym. Ishimnen yrymdap «Bul meniń de jýr­na­lıs­tik joldaǵy samǵaýymnyń jańa bir be­lesi bolǵaı...» degenim esimde.

Redaktor Sapar Baıjanov redkollegııa músheleri men bólim basshylaryn tú­gel jınap, meni eki-úsh aýyz sózben ta­nys­­tyrdy:

– Jańa qyzmetker alyp otyrmyz. Aty-jónin ózderińiz jaqsy bilesizder. Buǵan deıin «Lenınshil jasta» bólim meń­ge­rýshisi bolyp istegen.

– Sonda, Sapeke, qaı bólimge kel­mek­shi bul jigit? – dedi redaktordyń sózin bólgen uzyn ústeldiń arǵy betinde otyr­ǵan qap-qara kisi qyjyrta til qatyp. – Shashyńdy qys­qartqanyń jón. Bul jer «Lenjas» emes, SK-nyń arjaǵy...

– Sydyq Aldabergenov joldas, óndi­ris­tik jınalystar men lezdemelerde san márte aıtyp júrmiz ǵoı. Kórkemdeý-bezen­dirý bólimin ashsaq dep, sol bólimge meń­gerýshi etip redkollegııa Janat Elshi­be­kovti bekitip otyr. Orynbasarlar da, alqa músheleri de ózimen áńgimelesip, ta­nys­ty. Joǵary jaq ta habardar. Biraz oı-josparlary bar. Aldaǵy ýaqytta birtindep júzege asyrmaqshy. Eń bas­ty­sy, gazetimizdiń kelbetin ózgertip, aja­ryn ashý­ymyz qajet. O jaǵyn men ózim egjeı-teg­jeıli túsindirip, qadap-qadap tapsyr­dym. Tyń jańalyqqa, jaq­sy ıdeıaǵa bá­riń­iz de muryndyq bol­ǵan­daryńyz durys, – dedi Sapar aǵa baısaldy qalpyn ózgertpeı.

– Janatty osynda otyrǵandardyń deni jaqsy biledi. – Ornynan sóıleı kóterilgen jaýapty hatshy Myńbaı aǵa tóńiregine janar júgirte jymyń­da­dy. – Syqa, Janattyń shashynda neńiz bar. «Lenjastyń» bastyǵy Berdi­qu­lovtan bas­tap barlyq jigit­te­ri­niń shash­tary uzyn. Anaý Oralhan men Jaryl­qap­tarynyń shashy ıyqtaryn jaýyp júrse, Jaqaý men Áshirbekteri saqal qoıǵan. О́zderine jarasady... Endigi jerde biz birigip jumys isteımiz. Álginde sekre­tarıat­tyń búkil jigitterin jınap alyp sóılestik. О́zara mindetterimizdi jilik­tep jiktep, bólistik. Bólimderdiń jeke-jeke toptamalary men materıaldary boıynsha aldyn ala usynystaryn, arnaý­ly betterdiń bezendirilýi jónindegi oılaryn budan bylaı jańa bólimmen aqyl­dasyp, birlesip júrgizsek, quba-qup. Sondyqtan qasymyzǵa kep jatqan Janat­qa sáttilik tileımin.

– Durys. Sóıtińder, – dedi Sapekeń qolyndaǵy qalyń kúntizbe-dápterge áldeneni shuqshııa jazyp.

Myńbaı aǵadan keıin Sarbas Aqtaev, Bekbolat Ádetov, Zulqarnaı Saqıev, Keńeshan Zákenov sekildi ózim syrttaı jaq­sy tanıtyn jigitter oı-pikirlerin ortaǵa salyp, izgi tilekterin aıtyp, usy­nys­taryn bildirdi. Buǵan deıin kil alaý­la­ǵan, jalyndaǵan jastar ortasynda emin-erkin eńbek etip, bula kún keshken maǵan jańa orta múldem bólekshe kóringeni ras. О́ńkeı syqyrlaǵan, syz­da­ǵan shirender. Kekse keýdelerdiń kos­tıým-galstýkterine sheıin uqsas. So­ıyp qaptap qoıǵandaı shetinen mańǵaz, saý­saq ushymen amandasyp, erinderin áreń-áreń jybyrlatyp tildesedi. «Oı, Alla-aı deseıshi, syqıǵan «SQ» dese, syqıǵan «SQ».

Qasymda otyratyn sýretshi-retýsher Januzaq Ábdiqulov aǵa men fototilshi Saılaý Pernebaev máz. Burynnan júz­ta­nys ekeýi de:

– О́stip óziń sekildi jastardy biz­diń gazetke kóptep alý kerek qoı, – deıdi jarysa. – Ádebıet bóliminde Saýytbek Abdrahmanov, nasıhat bóli­min­­de Erjuman Smaıylov qana bar. Qal­ǵan­dary birin-biri mensinbeıtin siresken shal­dar.

Budan qyryq jylǵy alǵashqy áserdi ádeıi táptishtep, búge-shigesine deıin tek­ten-tek eske túsirip otyrǵanym joq. Zamanyna qaraı adamy. Áıtpese, bul qa­ǵıdany oryndaryn aýystyryp, ke­ri­­sinshe aıtýǵa da bolatyn tárizdi. Meıli, qalaı desek te qatań júıeniń qatal tártibiniń salqyny belgili bir mólsherde adamdardyń minez-qulqyna, is-áreketine yqpal etkeni sózsiz. Abyroı bol­ǵanda qysyltaıań shaqta jińishke jol­dan júregi jyly, júzi jarqyn Myńbaı Ilesov sııaqty qalamdas ári árip­tes aǵanyń arqasynda aman-esen ótke­nimdi endi ǵana sezgendeımin. Asa bilim­di, adamgershilik qasıetteri odan da joǵary, parasatty aǵamen mańyzdy da jaýapty jumystarda qas-qabaǵymyzben uǵys­tyq. Sekretarıatqa tikeleı qatysty onda­ǵan jigittiń bárimen birdeı til tabysa almaǵanymdy jasyra almaımyn. Maket syzý kezinde, aptalyq jospardy talqylaý sátinde, lezdeme ústindegi qıǵash pikirlerdiń bir qýanyshtysy – júz sha­ıysýǵa jetkizbegeni. Qazirgideı azat oıdyń shideri tas-talqan etilip, demokratııa men pikirtalas alýandyǵynyń súle sáý­lesiniń de kórinbegen kezi. Jasyna jetpeı qartaıǵandardyń oılary tuqyl, qııal­dary qasań. Sonysyna qaramaı ishki esepteri shytyrman. Osyndaı qaǵaberis bógetterden kóbine Myńbaı aǵanyń aqyly alyp shyǵatyn.

– «Sabyr túbi – sary altyn» degendi atalarymyz bekerge aıtpaǵan. Asyq­pa­ǵaısyń. Tyń ıdeıany, makettegi jańa­lyqtardy, eń aqyry bezendirý ele­mentteri sanalatyn «vozdýhtar» men túr­li qalyńdyqtaǵy syzyqtardy kóbi uǵa bermeıdi. Sondyqtan shyda. Kóz­de­rin birte-birte úıretý kerek, – deıtin Myńbaı aǵa ońasha pikirleskende.

Az ýaqyttyń ishinde Myńbaı aǵanyń ózge de qyrlaryn anyq baıqadym. Sekre­ta­rıattyń, ıaǵnı bas shtabtyń ju­my­­syn bes saýsaǵyndaı jetik biletin onyń sheber aýdarmashy ekenine kózim jetti. Ortalyq Komıtetten tikeleı kel­gen mańyzdy qu­jat­tard­y, jaýapty adam­­dardyń maqal­a­laryn, partııa ple­ným­­darynyń qaýly-qararlaryn orys tilinen qazaqshaǵa aýdaratyn sanaýly jýrnalısterdiń biri Mákeń edi. О́te shap­­shań ári sapaly aýdaratyn oǵan oqta-tekte sol kezdegi asa bedeldi aq­pa­rat­­tyq mekeme – QazTAG qolqa salyp, kómektesip jiberýin suraıtyn. Qazir­gideı elektrondy poshta men kompıýter joq. Jýrnalıst aǵaıyndardyń bar súıeneri qarapaıym máshińke men teletaıp. Tipti, faks ta shy­ǵar­mashylyq ortaǵa etene kirmegen shaq. Almatynyń basqa bir buryshynda ornalasqan áıgili QazTAG-qa baryp, tapsyrylǵan aýdarmany tastúıin oryndaıtyn Mákeń túndeletip redaksııadaǵy jaýapty ju­my­syn odan ári jalǵastyrady. Osy tusta reti kelip turǵanda aıtaıyn. Má­keń zeınet demalysyna shyqqannan soń biraz jyl QazTAG-ta aýdarmashy bo­lyp qyzmet istedi.

Qym-qýyt jumystan murnynan shan­shy­lyp júrse de syltaý aıtyp syr­ǵaq­ta­maı­dy, barlyq sharýany meniń moı­nyma artyp qoıdyńdar dep kúń­kil­de­meıdi. Kómeıine kelgen oıyn oń­taı­ly tusta búgejektemeı, bastyq demeı, úlken demeı týra betine aıtyp salady. Árıne, bireýler jaqtyrady, qaısybireýler unat­paı­dy. Pora-pora terlep júrip bárin de atqaryp tastaıdy, bárin de tyndyrady. Dıktovkadan qalt etkende shahmatyn oınap, tennıstiń sharyn úıirip, redaksııa jigitteriniń qýanyshtaryn bó­li­­sip, súıikti kásibine qushtarlana kiri­se­di-aı! Keshki resmı materıaldardy túgendep, baspahanadaǵy tehnıkalyq re­daktorlar Ahan Kópbaev pen Bolat Jaısańbaevtarmen habarlasyp, kezekti betterdiń jaı-kúıimen ta­nysyp ta úlge­re­di. Redaktorattyń mú­shesi retinde túngi ýaqytta «úıdegi ja­typ­atar redaktorlyq» mindetin atqa­ra­dy.

Sonymen qatar Myńbaı aǵa redaksııada ótken óndiristik jınalystardyń hattamalaryn júrgizip, SK-ǵa jibe­ri­le­tin toqsandyq is-jospardyń oryssha nusqasyn tastaı etip ázirleıdi. Mu­nyń syrtynda aıyna eki ret redaksııa qyzmetkerleriniń tabelin toltyryp, eki ret qalamaqyny jasap, irgedegi baspa­ha­na­nyń ortalyqtandyrylǵan býhgalterııasyna der kezinde ótkizý de jaýapty hatshynyń moınynda. Besaspap Mákeń barlyq júktelgen mindetin qaı ýaqytta da zor jaýapkershilikpen, bıik abyroımen oryndaıtyn.

 

Sheraǵańnyń tańdaýy

О́z isine adal, prınsıpshil, qarymdy qalamger – naǵyz jýrnalıstıka jampozyn toqsan birinshi jyldyń basynda redaksııa ujymy bir aýyzdan bas redaktordyń orynbasary qyzmetine saılaýy tegin emes. Áńgime oraıynda aıta ketetin shtrıh. Eńbek demalysynda taýdaǵy shıpajaıda tynyǵyp jatqan Bas redaktorymyz Sheraǵań – Sherhan Murtaza jumys kúniniń keshki apaq-sapaǵynda dańǵaradaı kabınetine ujymdy tegis jınap alyp:

– Halderiń qalaı? Sóz qysqa, – dedi qatqyl únmen. – О́zderińiz jaqsy bile­siz­der. Meniń orynbasarymnyń biri Sabyrjan Shúkiruly jańadan ashylǵan «Suhbat» aptalyǵyna bastyq bolyp aýysqan. Endi sonyń ornyna zamredaktor saılaýymyz kerek. Týra qazir. Áıtpese bolmaıdy. Asyqpaı demalyp kelgennen soń qoısam ba dep edim. Telefon ábden mezi etti. Taýda jatqanymdy da bilip alypty. «Zamredaktorǵa anaý laıyq, mynaý laıyq» dep ótingender men buıryq bergisi keletinder tym kóbeıip ketti. Eshqaısysyn elegenim joq. Iá. Shynymen osy otyrǵan senderdiń ortalaryńda redaktordyń orynbasary bolatyn adam joq pa?

– Nege, Sheraǵa? Kóp qoı.

– Bar! Bar!

– О́zimizdiń ishimizde de tolyp jatyr. Bireýin qoısańyzshy...

Jınalǵandar shýlap qoıa bergen. Mun­daı­dy kútpegen Sheraǵańnyń álgin­de­gi­ge qaraǵanda júzi jylyushyrap, qabaǵy jazy­la túskendeı.

– Oı, páli! Beımezgil keshtetip, sol úshin kelip otyrmyn ǵoı, – dedi jadyraı kúlimsirep. – Káne, kimdi qoıasyńdar. Aıtyńdar.

Erterektegideı emes, demokratııaǵa boı úırete bastaǵan ujymnyń úlkeni bar, kishisi bar, jaı tilshiden bastap, mashı­nıs­tkalarǵa deıin óz kandıdatýralaryn usyn­ǵan. Qur ánsheıin aty-jónderin atap qana qoımaı, óz oı-pikirlerin ortaǵa salyp, ashyq talqylaǵan. Minekı, osyndaı talqylaý-saraptaýdyń qatań súzgisinen ótken tórt-bes jigittiń arasynan óte ta­lap­­shyl, ádiletti súıetin Sheraǵańnyń Myńbaı Ileske toqtaýy teginnen deısiz be.

– Myńbaı myrza bul orynǵa ábden laıyq. Bilimdi, óte tájirıbeli. Oryssha-qazaqsha birdeı jazady. Onyń ústine bir ornynda uzaq otyryp qalǵan sekildi. Áldeqashan zamredaktor bolýy kerek edi men bilsem. Sizder de qatelespegen sekildisizder. Osy usynysty qoldap qol kóterýlerińdi suraımyn...

Búkil ujym bir kisideı daýys berdi. Bul baǵa Myńbaı aǵaǵa berilgen bıik qur­­met­tiń, zor senimniń nyshanyn kór­set­se kerek.

 

Bir kúnde – eki toı

Qyzyq. Bireýler týraly áńgime órbite qalǵanda aýzyńa sóz túspeı, qalamyń da kibirtiktep, shoqyraqtaı beretini bar. Nege? Júregiń qalamaıdy demek. Kóbik lepesti kópirtip, kólgirsı almaısyń-aý. О́kinishtisi, ondaılar da ara-tura ushy­rasady. Amalyn taýyp kórinip, jaq­sy­atanyp jatatyndardy óz ortamyzdan da tabamyz. Meıli, júre bersin. Júrek, shirkin, sezip tur ǵoı. Al Myńbaı aǵa haqynda qalam terbegende baýyry jazylǵan sáıgúlikteı oıymdy tizgindeı alsamshy. О́zim biletin jaǵdaıattardyń bárin de qamtyǵym kelgen. Asyl aǵanyń adamgershilik qasıetterin úzip-julyp bolsyn ózgelerge jetkizýge umtylǵanym anyq. Kópke máshhúr belgili jaıttardy shıyrlap qaıtalamaı, dara qoltańbasyn, jazý stılin táptishtemeı, kerisinshe pendeshilik adamı qasıetterin jarqyratyp kórsetetin epızodty jańǵyrtqandy jón kórdim.

Alyp adam, batyr adam ańǵal keledi demekshi, birde Myńbaı aǵamyzdyń óz aýzynan estigen osynaý oqıǵa eriksiz eske túsken. Amalsyzdan ezý tartqyzyp, myr­syldatqan. Ańqaý aǵamyzdyń bir kúnde eki toıǵa baryp, eki márte shabyl­ǵa­ny ja­ıyn­daǵy qyzyqty kórinisti jana­ry­ńyz­ǵa elestetińizshi.

Ádettegi senbi. Túnniń bir ýaǵyna sheıin «Jalyn» jýrnalynyń tapsyrmasy boıynsha eki-úsh orys jazýshysynyń áńgimelerin tárjimalap, balkonǵa qısaıa salǵan Mákeń kún shyqpaı oıanyp ketedi. Almatynyń aptapty jazynda únemi balkonda uıyqtaıtyn ol taýdan lekigen tańǵy samalda raqattanyp, ájeptáýir sergip qalady. «Qoı búıtip ezilip jata bergenshe, saıajaıǵa baryp keleıin. Kúnuzaq ne isteımin. Keshki toıǵa úlge­re­miz…» Tezdetip jýynyp-shaıynyp, Klara jeńgeıdi mazalamaı tildeı zapıs­ka jazady da, erteletip saıajaıyna tartyp ketedi.

Reti kelip turǵanda Mákeńniń atyna aıtar ónegeli áńgimeniń biri o kisiniń eń­bek­qorlyǵy. О́mirbaqı qalada turyp, qalam ustap júrgen aqsaýsaqtardyń sanatyna jatpaıdy. Jer tyrmalap, jer emip ósken naǵyz ońtústiktiń súıel­ala­qan súı­kimdi sharýasyndaı. Kógildir kóktem shy­ǵysymen saryala kúzge deıin bir tynbaıdy-aý. Ulan jaz ony saıajaıdan tabasyz. Qalamnan bosaı qalǵan mezetin tekke jibermeı baý-baqshasyn baptap júrgeni. Ala shapanyn belinen býyp alyp, kúni boıy jer shuqyp, jemis aǵashtaryn sýaryp, erteli-kesh belin bir jazbaıdy. Sondyqtan da bolar, egemendikterdiń arasynan eń alǵashqylardyń qatarynda Myńbaı aǵanyń baý-baqshasy jaınap, órigi men almasy, júzimi men alshasy máýelep jemisin berdi. Úsh qabatty dańǵaradaı kirpish úı boı kóterdi. Birin aıtyp birine ketemiz. Qasıetti Otyrar topyraǵynda týyp-ósken ulaǵatty aǵamyzdyń qaı isi de, qaı eńbegi de eleń etkizerlik.

…Sodan Mákeńniń til-hatyn oqyp, tastúıin ázirlenip otyrǵan Klara jeń­gem­di keshki altyda apyl-ǵupyl taksıge mingizip, VDNH-nyń ishindegi «Dostyq» meıramhanasyna qoltyqtap kiredi. Dańǵur-duń­ǵy­r mýzyka. Toı áldeqashan bastalyp ket­kenge uqsaıdy. Maıly qa­syq­taı ly­pyp turǵan asaba jigit quraq ushyp qarsy alady. Keshigińkirep qal­ǵandaryna yń­ǵaı­syz­dan­ǵan Myńbaı aǵa keshirim ótinip, asabaǵa qo­lyndaǵy bir qushaq gúldi usy­na salady. «Jas­tardyń aldyndaǵy vaza­ǵa óziń aparyp jaıǵastyrasyń ǵoı…»

– O jaǵynan qam jemeńiz. Qaty­ra­myz, – deıdi álgi álekedeı jalanyp. – Káne, shtraf­noıdy tartyp jiberińiz al­dymen. Baqan­daı jarty saǵat keshigip kel­dińizder. Sosyn sóıleısiz…

Ile-shala Myńbaı aǵaǵa sóz beriledi. Ash ózegine túsip ketken «shtrafnoıdyń» býymen kósilip sóılegen ol jas jubaı­lar­ǵa tilekterin jaýdyryp:

– Myna azǵantaı syıymyzdy kópteı kórińizder, – dep kostıýminiń ishki qalta­sy­nan semizdeý konvertti alyp asabaǵa ustatady. – Tórdegi jastarǵa óziń tap­sy­rarsyń.

Dý qol shapalaqtap, mýzykanttar dabyrlatyp týshty uryp-uryp jiberedi. Eki-úsh rúmkeni óz ornyna qondyrǵan arqa-jarqa Mákeńniń qulaǵyna Klara jeńeshem birtúrli kúdiktene sybyrlaı­dy:

– Baıqadyń ba, úılenip jatqan jigit­tiń aty da Serik eken. Biraq bizdiń quda bala Serikke uqsamaıtyn sekildi.

Eki kózi sharasynan shyqqan Myńbaı aǵa tórdegi jas jubaılarǵa ańtaryla qara­ǵyshtaı beredi. Sonda baryp jańylysqanyn sezedi.

– Toılary osy «Dostyqta» emes pe edi. Shaqyrý bıletine qarashy…

– Shaqyrý qaǵazy jazý ústelińde jatyr edi ǵoı. Almaǵansyń ba? Menińshe, onda Dostyq dańǵylyndaǵy meıramhana dep jazylǵan tárizdi.

– Múmkin. Bá-s-e, quda-qudaǵılar da kórinbeıdi. О́ńkeı biz tanymaıtyndar… Júr, asabaǵa aqyryn ǵana aıtyp, tezdetip shyǵyp keteıik eshkimge bildirmeı…

Sóıtip, ańǵal aǵamyz jol-jónekeı gúl bazarynan taǵy da bir qushaq gúlin, syı-sııapatyn alyp Dostyq dańǵyly boıyndaǵy meıramhanada ótip jatqan ekinshi toıǵa qatysypty.

 

Kóńildiń tórinde

Estelik eki ret jazylmaıdy. Son­dyq­tan da kóńildegi kórikti oılar sha­shyramaı turǵanda Myńbaı aǵa­nyń adamı beınesin ajarlandyryp, pen­de­shilik tulǵasyn tolyqtyrar eleý­siz­deý shtrıhtardyń bir-ekeýin túıip jetkizgim keledi.

Elgezek aǵanyń ómirge degen qush­tar­lyǵy, mańaıyndaǵy adamdarǵa degen yqylasy men nazary bólekshe-tin. Ýaqyt úderisine ilese bilgen aǵanyń inige izeti, úlkenge qurmeti aıryqsha baıqa­la­tyn. Júris-turysy, sóz saptaýy, eń aqyry kishigirim kóriner usaq-túıek is-áreketiniń ózinen tálim-tárbıe álippesin oqyǵandaımyz. О́nege órnekteriniń qarapaıym ádepten quralyp jatatynyna kóbine mán bermeımiz-aý. Mákeń búkil ujymnyń qurmettisi bola bildi. Redaksııa ómirinde bolyp jatatyn dýmandy keshter men toı-tomalaqtyń uıytqysy da edi. Án salyp, bı bılegende ónerpazdardyń kóshin bastaıtyn. Qazaq operalarynan arııalardy, halyq ánderin sheber de náshine keltirip oryndaıtyn. Klara jeńgeı ekeýi qosylyp syzylta án salǵanda keıingi tolqyn – jastar jaǵy tánti bolatynbyz.

Ne nársege de sergek qaraıtyn Mákeń sonaý bir jyldary daǵdarysty, tap­­shy­lyq kezinde Ońtústik Qazaqstan obly­syndaǵy menshikti tilshimiz Erkin Qydyrdy janyna ertip alyp Shym­kent­tegi áıgili «Voshodtan» óz baǵa­sy­na ondaǵan kostıým alyp kelgeni de este. Sóıtip, Mákeńniń arqasynda redaksııanyń búkil jigiti eki-úsh kostıýmnen kıip, bir jasap qalǵan. Res­pýb­lıkalyq teledıdardyń tikeleı uıym­das­tyrýymen ótkizilgen daryndylar men bilimdiler saıysynda da úzdikter sapy­nan tabylǵan – ózimizdiń Mákeń.

О́miriniń sońǵy jyldarynda dóń­ge­len­te shoqsha saqal qoıyp, ıman­dy­lyq jolyna bet burǵan Myńbaı aǵanyń elordadaǵy ekinshi úıi «Egemenge» bas suǵýy – biz úshin úlken qýanysh. Áli de osy áser ústindemiz.

Endigi jerde jaqsy aǵa haqynda tek estelik aıtarmyz. Kóńil tórindegi onyń asyl beınesin zamandastary qa­rym­dy qalamger, áriptesteri elgezek aǵa, urpaqtary ulaǵatty áke-ata retinde eske túsireri anyq. Buǵan da shúkirshilik. Bul pánıde qanshama adamdar eleýsiz, eske­rýsiz umyt bolyp jatyr deseıshi. Táýbe!..

 

Janat ELShIBEK,

Halyqaralyq «Alash» ádebı syılyǵynyń laýreaty

 

 

 

Sońǵy jańalyqtar

Pnevmonııaǵa basqa ataý berilýi múmkin

Koronavırýs • Búgin, 21:40

Qazir tek ómir men ólim bar - Bas sanıtar

Koronavırýs • Búgin, 19:10

Koronavırýs indeti 3 kezeńnen turady

Koronavırýs • Búgin, 17:35

О́z tanysyn tonap ketken ury ustaldy

Aımaqtar • Búgin, 14:30

Ustazdardan zańsyz aqsha jınalmaý kerek

Aımaqtar • Búgin, 12:32

Muhtar Shahanov aýyryp jatyr

Qazaqstan • Búgin, 11:56

Gongkongta mektepter qaıta jabylady

Álem • Búgin, 11:10

Aqsaılyq aýrýhana úsh kólikti boldy

Aımaqtar • Búgin, 09:00

Uqsas jańalyqtar