Suhbat • 29 Maýsym, 2020

Talǵat Musabaev: Abaı – janyma jaqyn eń jarqyn beıne

26 ret kórsetildi

«Astana Opera» teatry astana kúni qurmetine óz saıtynan jáne TengriTV-den qazaq ulttyq opera óneriniń jaýhar týyndysy – A.Jubanov pen L.Hamıdıdiń «Abaı» operasyn usynbaq. Qoıylymdaǵy basty partııany somdaý­shy, Qazaqstannyń eńbek sińirgen qaıratkeri, «Astana Opera» memlekettik opera jáne balet teatrynyń jetekshi solısi Talǵat Musabaev merekelik is-sharaǵa ne úshin bul spektakldiń tańdalǵany týraly aıtyp berdi.

 

– «Abaı» spektakliniń basqa qoıylymdardan erek­she­ligi nede?

– Birinshiden, qoıylym repertýarymyzdaǵy ulttyq klassıkamyzdyń eń shoqtyǵy bıigi. Sahnalyq ǵajaıyp týyn­dy úshin teatr ujymy Mem­leket­tik syılyqpen marapat­talǵany barshaǵa málim. Aty ańyzǵa bara-bar operalyq týyn­dy – elimizdegi basqa da opera oshaqtarynyń afıshasy­na sán berip, kórermen kózaıy­myna aınalǵan úzdik qoıy­lym. Ekinshiden, bıyl Abaı Qunanbaıulynyń 175 jyl­dyq mereıtoıyn atap ótýde­miz, astana kúninde dál osy spek­takl­diń kórsetilýi aıryq­sha mánge ıe dep oılaı­myn. Barsha kórermenge, sonyń ishin­de ásirese, teatrdyń birde-bir  kórsetilimin nazar­dan tys qal­dyrmaıtyn sheteldik kórer­men qaýym úshin mundaı jobalar Qazaqstan mádenıeti men ónerin keńinen nasıhattaýǵa múmkindik beredi. Úshinshiden, Abaı partııasy – qazaq operasyndaǵy barı­tonǵa arnap jazylǵan eń aı­týly dúnıe. Aqyn beı­ne­­sin somdaý ónerimniń shy­ńy dep esepteımin. Barsha qazaq­stan­dyqtar sııaqty, maǵan da oıshyl, aqyn, fılosof Abaı  rýhy etene jaqyn. Adam boıyndaǵy ıgi de asyl qasıettiń barlyǵy osy tulǵanyń minezinen kórinis tabatyny ras.

– Opera teatry sahnasyn­daǵy Abaıdyń beınesi nesi­men qymbat?

– Kim-kimge de mundaı kesek partııany oryndaý ońaı soqpaıdy, sebebi oryndaýshyǵa úlken jaýapkershilik artyla­dy ári beıneniń ishki tebire­nisin, tereńdigin pash etý júk­teledi. Mýzykalyq jaǵynan da bári sondaı jeńil oryndalyp, kez kelgenniń oń jambasyna ońaı ońǵaryla ketedi dep aıta almaımyn, óıtkeni partııa lırıkalyq barıton daýysqa emes, alymy keń aıryqsha barıton daýysqa arnap jazylǵan. Ony minsiz oryndap shyǵý úshin dramatýrgııa mýzykamen jaqyn jymdasyp, ózara úılesim tabýǵa tıis. Opera ánshisi ýaqyt óte kele kemeldiktiń sheksiz ekenine kóz jetkizip, sahnaǵa ár shyqqan saıyn erekshe reńkter tabýǵa talpynady, Abaıdy jańa qyrynan tanyp-bilgisi keledi.

– Elordanyń qazirgi keskin-kelbetine qandaı baǵa berer edińiz?   

– Munda 2007 jyly Elba­sy­nyń astana mádenıetin damytý úshin «Shyǵarmashyl jas­tar­dy tartý» baǵdarlamasy boıynsha qonys aýdardyq. El astanasy tarıhymen birge elimizdiń jańa dáýiri bastaldy.  Sózsiz, búginde ol – mádenıet, saıasat, ekonomıka ortalyǵy. Nur-Sultan meniń týǵan qalama aınaldy, dál osy jerde balalarym dúnıege kelip, ósip-ónip jatyr. Bas qalamyzda óz-ózińdi damytýǵa barlyq múmkindikter bar jáne eń bastysy, bul jerde shyǵarmashylyqqa arnalǵan keńistik bar. Túrli konsert zaldary salynyp, teatrlar, akademııalar boı kóterýde... Qalamyz burynǵydan da ór­kendep, abyroıy asqaqtap, kór­keıe berýin tileımin.

 

Áńgimelesken

Qarashash TOQSANBAI,

«Egemen Qazaqstan»

 

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar