Aımaqtar • 30 Maýsym, 2020

Aǵylshyn tiliniń úzdikteri anyqtaldy

16 ret kórsetildi

Aǵylshyn tilinen oqytatyn ustazdar úshin "Armanǵa aparar jol", 1-4 synyp muǵalimderine arnalǵan "Bastaýysh mekteptegi aǵylshyn tili: oıyn arqyly oqımyz" jáne joǵarǵy synyp oqýshylary arasynda "My best student’s book" atty respýblıkalyq saıystar óz máresine jetti, - dep jazady Egemen.kz

Qazaqstanda jańartylǵan bilim berý baǵdarlamasy boıynsha dáris beretin muǵalimder men oqýshylardy yntalandyratyn úsh birdeı baıqaý bıyl besinshi ret ótkizilip otyr. Bilim jobasynyń ereksheligi – onlaın sıpatynda qorytyndylanyp, úzdikterge halyqaralyq baspa kitaptarynyń avtorlary Bob Obbı men Djordj Kokolas Anglııadan arnaıy quttyqtaý joldady. Elimizde kóptildi bilim berýdi nasıhattaıtyn shara Bilim jáne ǵylym mınıstrligi, "Edu Stream" oqý ortalyǵy jáne qazaqstandyq mektepterdegi bazalyq aǵylshyn tili kitabyn daıyndaǵan "Express publishing" halyqaralyq baspasy uıymdastyrýymen qolǵa alynǵan bolatyn. Sheteldik sarapshylardyń biri onlaın-rejimde bilim alý búkil álemde qıyndyq týǵyzǵanymen  bilim salasy qyzmetkerleri kez kelgen jaǵdaıǵa beıimdele alatynyn alǵa tartsa, endi biri karantın saldarynan shashyn qysqarta almaı júrgenin aıtyp, tilegin qaljyńmen jetkizgen.

"Internet pen onlaın júıe barlyǵymyzdy bir shartqa baǵyndyrdy", – deıdi Soltústik Qazaqstan oblysy, Peskı aýylynda turatyn aǵylshyn tili pániniń muǵalimi Sabına Turmuratova. – Men 1-11 synyp oqýshylaryna aǵylshyn tilinen sabaq beremin, sebebi bizdiń shaǵyn keshendi mektepte nebary 100 bala oqıdy. Soǵan qaramastan shákirtterim talaı baıqaýda jeńimpaz atandy, endi mine, búgin ózim de sondaı báıgeden júldege ıe bolyp otyrmyn.

Aıta ketetin taǵy bir jaıt, respýblıkalyq baıqaý birneshe kezeńnen turady, saıysqa qatysýshylar yntalandyrý hattaryn, sabaqty beınetaspaǵa túsirip joldaǵan, aralarynda qoıylym usynǵandary da bar. Uıymdastyrýshylar barlyq oblystan baıqaýǵa myńnan astam ótinish kelip túskenin aıtady. Jalpy bilim báıgesinde Qyzylorda, Almaty, Qostanaı, Aqmola, Pavlodar oblystary men Nur-Sultan, Shymkent qalalarynyń ustazdary men oqýshylary belsendiligimen aıryqsha kózge túsken. Sonymen qatar jeńimpazdar qatarynda alys aımaqtan qatysqan úzdikterdiń bary qýantady.

"Baıqaý qyzyq, mazmundy, ádiletti ótti, – dep oıyn ortaǵa saldy aǵylshyn tili jeńimpazdarynyń biri, stepnogorlyq  muǵalim Veronıka Sherbına. – Qazylar alqasy – táýelsiz, qatysýshylardyń eshqaısysyn bóle-jarmaı, týra sheshim shyǵardy. Nátıjesinde, birinshiden bastap, sońǵy kezeńge deıin barlyǵy taza básekelestikpen ótti. О́kinishke qaraı, búginde mundaı jaǵdaı óte sırek kezdesedi. Keıde aldyn-ala barlyq oryn belgilenip qoıǵan baıqaýlarǵa qatysýdan bas tartyp jatatynymyz taǵy ras. Nege deseńiz, ondaı sharalar kásibı turǵyda qaryn ashtyryp, shabytty tunshyqtyrady. Baqytymyzǵa oraı, bul baıqaý – ondaı ala-qulalyqtan ada. Fızıka, hımııa, bıologııa jáne ınformatıka pánderin aǵylshynsha oqytatyn ustazdardy da keleshekte osy baıqaýǵa qatystyrsa, nur ústine nur bolar edi. Ádil qazylar alqasynyń quramyna engen lıngvıster, ádiskerler, psıholog-mamandar men jýrnalıster qatysýshylar eńbegin ereksheligine, jańashyldyǵyna, yńǵaılylyǵyna jáne kreatıv pen zamanaýı jetkizilgenine qaraı baǵalady.

Sonymen bilimniń alaman báıgesinde qara úzip shyqqan jeńimpazdarǵa kelsek, 1-4 synypqa aǵylshyn tilinen sabaq beretin ustazdar arasynda Almatydaǵy №32 mekteptiń muǵalimi Aqmaral  Musaeva jeńimpaz atansa,  «Úzdik teatrlyq qoıylym» atalymy boıynsha Aral aýdany Qamystybas stansasyndaǵy №21 mekteptiń muǵalimi Perızat Tynyshtyqbaeva («Aldar Kosse and Greedy farmer» qoıylymy úshin), Qostanaı qalasy №2 mektep-lıseıdiń muǵalimi Darıa Lozovaıa («Story time The fire Owl» qoıylymy úshin), «Eń belsendi mektep» atalymynda Qyzylorda qalasy daryndy balalarǵa arnalǵan mamandandyrylǵan synypta úsh tilde sabaq beretin «Murager» mektepteri, «Shyǵarmashylyqpen jumys isteıtin ustaz» nomınasııasy boıynsha Soltústik Qazaqstan oblysynyń Iаvlenka aýylyndaǵy T. Pozolotın at. №1 orta mekteptiń muǵalimi Valentına Trýshnıkova júldege ıe boldy. Al 5-10 synyp oqýshylary arasyndaǵy saıysta 1-oryn Almaty qalasy №121 mekteptiń oqýshysy Álııa Jumaǵulova (jetekshisi Evelına Lýsenko), Qyzylorda qalasy «Murager» mektebiniń oqýshysy Baldyrǵan Baımaǵambetova (jetekshisi Dilnaz Tólegen) enshisine tıdi. Pándi aǵylshyn tilinde oqytatyn muǵalimder arasynan bas júlde Qostanaı qalasy A. Gorkıı atyndaǵy gımnazııanyń ınformatıka pániniń muǵalimi Aleksandr Barmýtaǵa, 1-oryn Balqash qalasy №15 mektep-lıseıiniń ınformatıka pániniń ustazy Sátjan Omarovqa, Almaty qalasy №59 mektep-gımnazııasynyń ınformatıka pániniń muǵalimi Meıirgúl Qajytaevaǵa, Stepnogor qalasy L. Tolstoı at. №4 mektep-gımnazııasy bıologııa pániniń muǵalimi Veronıka Sherbınaǵa buıyrdy.

 

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar