Osynaý qıyn-qystaý shaqta Shymkent qalasyndaǵy «Hımfarm» kásiporny jáne «Zerde-Fıto» farmasevtıkalyq kompanııasy qaladaǵy dárihanalarǵa úzdiksiz dári-dármek jetkize bastady.
Bul birinshi kezekte shetelden keletin taýarǵa qarap qalmaı, óz ónimderimizben naýqastardy emdeýge septigin tıgizdi. Sonymen qatar medısınalyq kómekti óz ýaqytynda kórsetýdi qamtamasyz etý úshin biryńǵaı dıstrıbıýtor arqyly 207,1 mln teńgege qosymsha dári-dármekter men medısınalyq quraldarǵa tapsyrma berildi. Búgingi kúnde 76,8 mln teńgege taýar jetkizildi.
Monıtorıng nátıjesi boıynsha kóptegen dárihanada dári-dármek qory jetkilikti. Turǵyndar suranysynyń kóbeıýine oraı ystyqty túsiretin dárilerdiń (parasetamol, efferalgan, panadol, nýrofen, ıbýprofen, nımesýlıd) 238 486 qorap qory bar. Onyń ishinde dárihana qoımalarynda 115 389 qorap bolsa, dárihanalarda 123 097 qoraby saqtalǵan.
Al vırýsqa qarsy dárilerdiń (ıngavırın, ergoferon, kagosel, arpeflıý) qory – 38 187 qorap, onyń ishinde 25 518 qoraby dárihana qoımalarynda, al dárihanalarda 12 869 qoraby bar.
Turǵyndar birinshi kezekte suraıtyn antıbıotıkterdiń (azıtromısın, seftrıakson, sefıksım, amoksısıllın, levofloksasın) 592 899 qorap qory bolsa, onyń ishinde dárihana qoımalarynda 502 788, dárihanalarda 90 101 qoraby saýdalanýda.
Deı turǵanmen, dári-dármek shyǵaratyn zaýyt ókilderi quraldardyń maksımaldy túrde óndirilip jatqanyn aıtady. Alaıda halyqtyń suranysy kúnnen-kúnge artyp keledi. Osyǵan baılanysty tapshylyq paıda bolǵan.
«Biz eldi dári-dármekpen qamtý úshin qoldan kelgenniń bárin jasap júrmiz. Baǵanyń qymbattap ketpeýi úshin deldaldar qataryn kóbeıtpeýge de tyrysyp álekpiz. Barlyǵy jurttyń densaýlyǵy úshin jasalyp jatyr», deıdi «Hımfarm» AQ SANTO kompanııasynyń dırektory Irına Chýblýkova.
Qazirgi tańda qalada vırýsqa qarsy dárilerge suranys joǵarylap, farmasevtıkalyq kompanııalar tapsyrysyn 5 esege arttyrǵan. Shahardaǵy «Hımfarm» kompanııasymen qatar «Zerde-Fıto» kompanııasy tótenshe jaǵdaı kezinde ónim kólemin arttyrý úshin úzilissiz jumys istep jatyr.
Atalǵan kompanııa ókilderiniń málimetinshe, qazirgi tańda dárihanalarda parasetamoldyń 50-ge tarta analogy bar.
«Kórshiles Jambyl, Qyzylorda, Túrkistan oblystarynan suranys kóptep túsýde. Eń birinshi Shymkent qalasyn tolyǵymen qamtyp bolǵan soń ǵana ózge qalalarǵa jiberiledi», deıdi sala mamandary.
Al «SANTO» dári-dármek zaýytynda ıneksııalyq eritindiler men ınfýzııalar, qatty peroraldy dárilik zattar (tabletkalar, sashe, túıirshikter), antıbıotık untaqtary, sterıldi emes eritindiler shyǵarylady. Tapsyrys kóleminiń artýyna baılanysty shyǵarylatyn ónim de kóbeıgen.
«830 qyzmetker táýlik boıy tórt aýysymda jumys isteýde. О́nimniń 70 paıyzy – kóterme, 30 paıyzy bólshek baǵada satylýda», dedi kompanııanyń óndiris jónindegi dırektory Svetlana Maıorskaıa.
Qalada «Aqnıet», «Zerde» kompanııalary júz shaqty dárihanaǵa eki mezgil dári jetkizip, dıstrıbıýterler qoımalardy kúnine 2-3 kólik dári-dármekpen toltyryp jatyr.
Mıllıondy qalada birneshe farm kompanııalardyń ónimi qajettilikti tolyq qamtamasyz ete almaıtyny ras. Bir qyzyǵy, qaladaǵy dári-dármek tapshylyǵyn qoldan jasap otyrǵan jaǵdaı da joq emes. Olaı deıtinimiz, dári-dármektiń jetispeýshiligin alypsatarlar qoldan uıymdastyryp otyr. Bul jóninde ótken aptada vıse-premer Eraly Toǵjanov aıtqan bolatyn. Prezıdent tapsyrma bergennen keıin Shymkentte dári-dármekti qymbat baǵaǵa satyp júrgender ustaldy.
О́kpeni jasandy jeldetý apparaty shyǵarylady
Búginde Shymkentte naýqastarǵa asa qajetti quraldyń biri – ókpeni jasandy jeldetý apparaty. Indet juqtyrǵandar sanynyń artýyna oraı shetelden keletin bul qural barlyq emdelýshilerge jetpeı otyr. Osynaý qysyltaıań shaqta otandyq medısınalyq qural-jabdyqtar óndiretin «Kazmedpribor Holding» JShS atalǵan apparatty ózderinde óndiretin boldy.
Bul aqjoltaı jańalyqty Shymkent qalasynyń ákimi Murat Áıtenov áleýmettik jelidegi paraqshasynda jarııalady. Sondaı-aq qala basshysy «Kazmedpribor Holding» JShS dırektory Rahat Baızaqovpen pandemııamen kúres máselelerin talqylady.
Rahat Turǵanbekuly qala turǵyndaryna 150 dana tósektik oryn, ınfýzııa quıýǵa arnalǵan 400 dana shtatıv jáne 40 dana medısınalyq baǵana syılady.
О́ziniń alǵysyn bildirgen qala ákimi jaqyn arada ákimdik qoldaýymen «Kazmedpribor Holding» JShS-i О́JJ apparatyn shyǵaratynyn jetkizdi.
«Biz bul jobamen úsh aı boıy jumys istedik. Endigi kezekte qajetti sertıfıkatty alsaq, apparatty shyǵara bastaımyz. Aldymen, qalany tolyǵymen qamtyp, sodan keıin elimizdiń ózge qalalaryna kómektesetin bolamyz. Búgingi basty jaǵymdy jańalyq osy», dedi M. Áıtenov.
Qazirgi tańda qaladaǵy medısınalyq mekemelerde 323 О́JJ apparaty, onyń ishinde 130 portatıvti apparat bar. Sondaı-aq 250 «Bobrov» tynys alý apparaty, 10 monıtormen qamtamasyz etilgen.
