Bazardyń kire beris qaqpasyndaǵy qaraýyl da «betperde taǵyp, ara qashyqtyq saqtap júrińder» degen jattandy sózdi aıta-aıta sharshaǵan sekildi. Al beti ashyq-shashyq azyq-túlikti, beıǵam halyqty kórip kóńilge sekem kiredi.
Qalada indet juqtyrǵandardyń sany 3151 boldy. Sát sanap ósken kórsetkish, áleýmettik jelidegi qaraly habarlar, emhanalardaǵy tósektik oryn tapshylyǵy, dárihana aldyndaǵy uzyn sonar kezek, ýaqytsha ashylǵan emdeý ortalyqtary otandyq medısına salasy mamandarynyń júıkesine aýyr salmaq salyp jatyr.
Shymkenttik jedel járdem dárigeri Arman Hamzınniń kóńil kúıge erik bergen beıne jazbasynan-aq Shymkenttegi dárigerler qaýymynyń jumysy aýyr ekenin ańǵarýǵa bolady.
Jergilikti ákimdik tarapynan tekserý jumystary júrgizilgenimen, kásipkerlik nysandar jumysyn ýaqtyly toqtata qoıǵan joq. Abaı aýdany boıynsha qurylǵan 4 mobıldik top keshki mezgilde dúkender men dámhanalardyń ýaqtyly jabylýyna kúndelikti monıtorıng jumystaryn júrgizýde. Deıturǵanmen, tekserý toby ketisimen qaıta jumysyn jalǵastyryp, nemese «jabyq» rejimde jumys istep jatqany taǵy bar.
Mundaı tekserý jumystary nátıjesinde Eńbekshi aýdanyna qarasty Táýke han dańǵyly, Elshibek batyr jáne Sh.Ýálıhanov kósheleri boıynda ornalasqan 187 kommersııalyq nysanǵa reıdtik is-shara júrgizilgen. Atalǵan aýdanda 38 kommersııalyq qurylymǵa eskertý berildi. Al, Abaı aýdany aýmaǵynda karantın rejimin saqtalmaǵan 4 kásipkerlik nysanǵa hattama toltyryldy. Jalpy, qala boıynsha karantın talabyna baǵynbaı, keshki mezgilde jumys istep jatqan 50-ge jýyq mekemege hattama toltyrylǵan. Sanıtarlyq normalardy saqtamaǵan 7 kásipkerlik nysan ýaqytsha jabyldy. «Tártipke baǵynǵan qul bolmaıdy», degendeı, indettiń irgesin keńge jaımas úshin halyqqa birinshi kezekte qatań saqtaný qajet. Alaıda halyq kúnkóristiń qamy úshin kóshege shyǵyp ketýde. Keıbir jekemenshik kásipkerlik nysandar qaltasyn oılap, bas sanıtar shyǵarǵan qaýlydan aınalyp ótýde.
Indet órship turǵan shaqta da qaladaǵy «Garant» saýda ortalyǵy aýmaǵynda jabaıy saýda qyzyp tur. Smartfon saýdalaýshylar jaıaý júrginshiniń jolyn kes-kesteıdi. «Betperde taǵyp almaısyńdar ma?», degen janashyrlyqqa qaba saqaldy jas jigit: «Alla saqtaıdy», dep jaýap qatty... Betperde kımegeni bylaı tursyn, beti ashyq ydysta bálish pen pisken júgeri satyp júrgen azamattardy kezdestirdik. El turǵyndary jıi shoǵyrlanǵan ońtústik shahardaǵy jaǵdaı osylaı. Indet turǵyndardyń densaýlyǵyna jetkenimen, sanalaryna áli jete qoımaǵandaı...
