Bıznes ókilderi men kásipkerler de bul synaqty eńserýge úles qosýda. Mańǵystaýlyq kásipkerler oblystaǵy densaýlyq saqtaý nysandaryna 45 ottegi konsentratoryn syıǵa tartty. Qurylǵylar Reseı̆ Federasııasynan ákelingen. Keshe tańda Reseıden Mańǵystaý oblysyna taǵy 45 ottegi konsentraty keldi. Oblystyq Qoǵamdyq kommýnıkasııa ortalyǵynyń aqparatyna saı, bul joly qajet qurylǵylardy Marat Ormanov pen Sergeı Vorojeıkın aldyrtqan. Demeýshilikpen alynǵan apparattar dárigerlerge tabystalyp, olardyń 30-y oblystyq aýrýhanadaǵy provızorlyq stasıonarǵa, beseýi Jańaózen qalasyna, qalǵany aýdandarǵa úlestirilgen.
Buǵan deıin de aımaqqa 54 ottegi konsentratorynyń ákelingeni habarlanǵan bolatyn. Mańǵystaýlyq medısına qyzmetkereri ókpeleri qabynǵan naýqastardyń kóbine jasandy tynys alý qurylǵylary qajet ekenin, naýqas sany kóbeıgen saıyn atalǵan ottegi konsentratoryna degen suranys ta artyp jatqanyn aıtýda. Shetelden alynǵan qymbat qurylǵylar oblystyq aýrýhanada ashylǵan provızorlyq ortalyqqa jetkizilgen. Búgingi tańda qajettiligi artyp otyrǵan quraldardyń otyzyn «Qarajanbasmunaı» AQ satyp alyp bergen. Odan bólek S.Musabaev, A.Joldybaev, B.Ońdasynov, J.Ádilbekov, I.Bımyrzaev, N.Kúnshyǵarov, S.Muńalbaev, A.Kerelbaev syndy kásipkerler 20 danasyn, Forte bankiniń Mańǵystaý oblystyq bólimshesiniń dırektory Abbat О́risbaev 4 danasyn satyp alýǵa demeýshilik kórsetken.
«Dál osyndaı qıyn-qystaý kezeńde birlesip, synaqty jeńýge jumylmasaq, kómektespesek, qashan kómektesemiz dep oıladyq. Sondyqtan Máskeýden kele jatqan ushaqty paıdalanyp shamamyzǵa qaraı ottegi konsentratoryn aldyrdyq. Apparatty alýda máskeýlik áriptesterimiz qol ushyn sozdy. Qajettilik týyndaǵanyn kóre tura qalys qala almadyq. Bul bizdiń paryzymyz dep bilemiz», dedi kásipker Marjan Jańabergen.
«Ottegi konsentratynan basqa ókpeni jasandy jeldetý apparaty bar, búginde reanımasııada 50 naýqas atalǵan apparattyń kómegimen tynys alyp jatyr. Odan bólek aýrýhanada 6 bólim bar. Ár bólimde 30-dan bastap 80 naýqasqa deıin emdelýde. Olardyń árqaısysyna osyǵan deıin kelgen apparattardy bólip berdik. Naýqastardyń barlyǵynyń emi atalǵan apparattarǵa táýeldi emes. О́zdiginen dem ala alatyn azamattarǵa atalǵan qurylǵylardyń qajeti joq. Al qorqynysh bılep, dem jetpeı, tynys alýy qıynǵa soqsa apparatqa jalǵaımyz. Ottegi konsentrattarynyń kómegi sol», deıdi oblystyq aýrýhana basshysynyń orynbasary Saǵat Amanqosov.
Aımaqtaǵy oblystyq kópbeıindi aýrýhana sońǵy bir aptadan beri tolyqtaı provızorlyq stasıonar retinde jumys istep jatyr. Munda 650 oryn qarastyrylǵan, qazir 380 naýqas em qabyldaýda.
Al el aǵalary aldyrǵan qurylǵylardy aýrýhanalarǵa jetkizýge óńirdegi sportshylar járdem berýde. Olar ottegi konsentrattaryn tıisti mekemelerge aparyp, kezekshiliktegi medısına qyzmetkerlerine túski astaryn jetkizýdi qolǵa alǵan. Aqtaý qalalyq dene shynyqtyrý, sport jáne týrızm bóliminiń basshysy Bolat Dosovtyń aıtýynsha, jastar búginge deıin aýrýhanalarǵa 140 ottegi konsentratyn jetkizgen. Qajet jaǵdaıda qurylǵylardy ottegimen qaıta toltyrý da jastardyń mindetinde. Aldaǵy kezde taǵy 70 ballon alyp kelý josparda bar.
Túrkistan oblysy Jetisaı aýdanynyń kásipkerleri de óńirdegi jaǵdaıdy retteýge atsalysyp jatyr. Olar aýrýhanalarǵa jasandy tynys alý apparatyn alyp berdi. Mesenattar Asyqata aýrýhanasyna 5 kıslorodtyq konsentrat alyp bergen. Sonymen qatar aýdandaǵy «Isker analar» qaıyrymdylyq qory aýrýhanaǵa 40 lıtrlik ottegi ballonyn alýǵa qarjylaı kómek kórsetti. Buǵan deıin de Jetisaı aýdandyq máslıhatynyń depýtaty Jumaǵalı Tórequl aýdannyń ortalyq aýrýhanasyna quny 700 myń teńge bolatyn jasandy tynys alý apparatyn syıǵa tartqany habarlanǵan edi.
