О́kinishke qaraı, bizdiń keıbir qaladan shyqqan fermerlerimiz aımaqtyq eginshilik júıeni eskere bermeıdi. Olar muhıttyń arǵy jaǵynan ártúrli sarapshylardy alyp kelip, egin egýdiń qalyptasqan merzimin jáne bizdiń jaǵdaıymyzǵa beıimdelgen agrotehnologııalardy ózgertýmen álek.
Bıylǵy egin naýqanynyń aldynda S.Seıfýllın atyndaǵy QATÝ ǵalymdary Qazaqstannyń negizgi astyq óndiretin oblystary úshin kóktemgi egis jumystaryn júrgizý boıynsha naqty usynystaryn ázirledi.
Biz sońǵy 23 jylda osy oblystarda jaýyn-shashynnyń basym mólsheri jyldardyń 24% – maýsymda, 48% – shildede, 13% – tamyz aıynda baıqalǵanyn eseptedik. Sondyqtan, shildedegi eń joǵary ylǵaldylyqty eskere otyryp, Qazaqstannyń soltústiginde aýyl sharýashylyǵy daqyldaryn ósirý tehnologııasy mamyrdyń ortasynan sońyna deıingi ýaqyt qolaıly merzimge úılestirilgen.
Árıne eger bizde damyǵan elderdegideı aýa-raıynyń naqty boljamy bolsa, ǵylymı keńesterimizdi de dálirek aıtar edik. Biraq, ókinishke qaraı, meteoqyzmet jumysynyń artta qalýynan astyq óndirisinde jáne jalpy elimizdiń aýyl sharýashylyǵynda kóp máseleler sheshilmeı otyr.
Bıylǵy topyraqtyń kóktemgi ylǵaldylyǵyna qaramastan, maýsym aıynda bolǵan qurǵaqshylyq egistikti kúıdirip jiberdi. Biraq ǵalymdar usynǵan merzimde egilgen alqaptarda jaqyn kúnderi bolǵan jaýyn-shashyn jaǵdaıdy biraz ońaltady.
О́kinishke qaraı, osy jyly sáýir aıynyń sońynda jáne mamyr aıynyń basynda egin sebýge asyqqan dıqandardyń ónimderi tómendeý bolady, bul egistikter qurǵaqshylyqqa ushyrady.
Jalpy, táýekeldi eginshilik jaǵdaıynda egin sebý merzimin sátti tańdaý arqyly ǵana astyqtyń ónimdiligin birneshe ese kóbeıtýge bolady. Al ol mıllıardtaǵan teńge!
Sondyqtan bizdiń Prezıdentimiz Q.K.Toqaev ǵylymdy qarjylandyrýdy arttyra otyryp, óte durys qadam jasap otyr. Biraq agrarlyq salany kúshti ǵylymı bazamen qamtamasyz etýmen qatar, bizge fermerlerdi oqytý úshin damyǵan elder úlgisinde bilimdi taratýdyń tıimdi memlekettik júıesin qurý qajet (extension service). О́kinishke qaraı, mundaı júıe bizde áli kúnge deıin joq.
Aqylbek KÚRIShBAEV,
aýyl sharýashylyǵy ǵylymdarynyń doktory, professor «S.Seıfýllın atyndaǵy Qazaq agrotehnıkalyq ýnıversıteti» KeAQ basqarma tóraǵasy
