– Qazirgi qyzmetińizge qandaı tájirıbemen keldińiz? Qaıda bilim aldyńyz?
– «Bolashaq» baǵdarlamasynyń túlegimin. Shanhaı qalasyndaǵy Tongdzı (Tongji University) ýnıversıtetinde telekommýnıkasııa mamandyǵy boıynsha bilim aldym. Oqýdy aıaqtaǵan soń Qazaqstan-Qytaı «Jibek joly» yntymaqtastyq ortalyǵynyń bas dırektory bolyp qyzmet ettim. Atalǵan kompanııada jumys isteı júrip Qytaıdan ınvestısııalar tartýmen, bıznes-keńes berýmen aınalystym. Qazaqstan qalalarynyń jáne oblystarynyń ákimderi úshin Qytaıdyń iri korporasııalarymen jáne QHR úkimet ókilderimen issaparlar uıymdastyrdym. Jalpy, Qytaıdan elge kóptep ınvestısııa tartýǵa tyrystym. Odan keıin «Astana Innovations» AQ-nyń ınvestısııa jónindegi basqarýshy dırektory qyzmetine aýysyp, Nur-Sultan qalasyndaǵy Investorlarǵa qyzmet kórsetý ortalyǵynyń jumysyn qolǵa aldym. Odan bólek, bilgenimmen bóliskendi jón sanap, stýdentterge dáris oqýǵa bel býdym. Qazaqstannyń memlekettik jáne jekemenshik joǵary oqý oryndarynda qytaı halqynyń mádenıeti, psıhologııasy, kásipkerligi týraly dáris oqyp júrmin.
– Prezıdenttiń jastar kadrlyq rezervi týraly estigen kezińizde oǵan qatysýǵa birden bekindińiz be?
– Prezıdenttiń kadrlyq rezervine irikteý bastalǵany jóninde dostarym habarlady. Sóıtip, men de baǵymdy synap kórgim keldi. Irikteý barysynda qoıylatyn kóptegen suraqtan súrinbeı ótý úshin kúndiz-túni daıyndaldym. Bul jobaǵa respýblıkamyzdyń túkpir-túkpirindegi bilikti ári bilimdi jastary qatysqany belgili. Kadrlyq rezervtiń ereksheligi ári maqsaty – túrli saladaǵy bilimi men tájirıbesi ushtasqan azamattardy biriktirip, el múddesine qyzmet etýge jumyldyrý.
Rezervshilerdiń qataryna ótken soń bizdi ártúrli memlekettik organdar suhbatqa shaqyrdy. Sol kezde «Qazposhta» AQ basshylyǵymen kezdesip, áńgime barysynda oılarymmen bólisip, josparlarymdy usynýǵa múmkindik aldym. Nátıjesinde, «Qazposhta» AQ-nyń IT jáne ınfraqurylym boıynsha atqarýshy dırektory laýyzymyna jumysqa ornalastym. Qazir qurylym jumysyn sıfrlandyrýǵa, IT ınfraqurylymnyń damýyna jaýapty qyzmetti atqaramyn. Sonymen birge blokcheın tehnologııasynyń ilgerileýine de atsalysýdamyn.
– Búgingi qyzmetińizde ne baıqadyńyz? Neni ózgertkińiz keledi?
– Álemde ornaǵan koronavırýs pandemııasy elimizdegi sıfrlandyrý salasynyń artta qalǵanyn kórsetti. Memlekettik organdardyń jumys júıesinde de, bank salasynda da sıfrlanýdyń deńgeıi tómen ekenin, shıkiliktiń bary anyq baıqaldy. Sol olqylyqtardyń ornyn toltyryp, jaqsy jobalardy júzege asyrý maqsatynda «Qazposhtada» Sıfrlyq bank, sonymen birge Smart contract degen jańalyqtar engizip, barlyq qazaqstandyqtarǵa, ásirese bıznes ókilderine paıdaly bolatyn jobalardy usyndym. Áli de kóp jumys júrgizý qajet. О́ıtkeni sıfrlandyrý salasy kún sanap ilgerilep, damýda. Iаǵnı bir jańalyqty oqyp bolǵanyńsha basqa deńgeıdegi tolyqtyrýlar engizilip jatady. Sondyqtan bul sala udaıy izdenisti qajet etedi.
– Keleshekke qandaı josparyńyz bar?
– Blokcheın salasyn zerttep júrgenime 4 jylǵa jýyq ýaqyt boldy. Blokcheın tehnologııasyn óz elimizge ákelý arqyly osy salany damytyp, oǵan qosa blokcheınniń qyr-syryn meńgergen bilimdi mamandar men baǵdarlamashylar daıarlaǵym keledi. Iаǵnı ózim ǵana bilip qoımaı, bilgenimdi otandastaryma úıretip, jańa mamandar daıarlaý qajet dep oılaımyn. Qazirdiń ózinde jańa júıege, halyqaralyq deńgeıdegi jumysqa kóshýimiz kerek ekenin ózge jastarǵa túsindirip, komanda qurýdy qolǵa aldym. Eurasia Blockchain Fintech Group kompanııasynda qyzmet etip júrgenimde kanadalyq seriktestermen birge «Astana» halyqaralyq qarjy ortalyǵy bazasynda kompanııa qurdyq. Oǵan 1 mıllıon AQSh dollaryna jýyq ınvestısııa tarttyq. Endi TMD elderi arasynda blokcheın salasyndaǵy tuńǵysh lısenzııalanǵan bırja ashyp jatyrmyz.
Áńgimelesken
Svetlana ǴALYMJANQYZY,
«Egemen Qazaqstan»
