Ol «Qazatomónerkásip» UAQ-nyń «Appaq» JShS-nyń «Batys Myńqudyq» kenishiniń bastyǵy qyzmetin atqaryp júrgende, 2018 jyldyń 18 qazany kúni «Appaq» JShS bas dırektory A.Avdeev jumystan shyǵarady. Dırektor ony jumystan shyǵarý sebebin, «maǵan senimdi adam kerek» dep túsindirgen. Q.Jartybekov: «Dırektor qazir óz erkińmen aryz jazyp jumystan shyqpasań, erteń esh jer jumysqa almaıtyndaı etip bárbir shyǵaryp jiberem» dep qorqytty deıdi. Sóıtip ol «óz erkimmen jumystan shyǵamyn» dep aryz jazǵan, biraq ol aryzǵa ózi qol qoımaǵan. Al Q.Jartybekov «jumystan óz erkimen» shyǵý jóninde aryz jazysymen, ile-shala qoly qoıylmaǵan álgi aryz negizinde dál sol kúni «jumystan shyǵaryldy» degen «Appaq» JShS-nyń 18.10.2018 jylǵy №579 buıryǵy da paıda bolǵan.
Q.Jartybekov «Qazatomónerkásip» UAK» AQ-nyń ýran óndirýshi enshiles kásiporyndarynda 15 jyl eńbek etken eken. Ol «Taý ken kompanııasy» Bas dırektorynyń (Nıetbaev M.A.) 2009 jyldyń qorytyndysy boıynsha qyzmetin múltiksiz atqarǵany úshin alǵys hatpen, «Qazatomónerkásip» UAK» AQ Basqarma tóraǵasynyń jáne Sozaq aýdany ákiminiń alǵys hattarymen marapattalypty. 2018 jyly ýran óndirisi salasynda jergilikti jerden shyqqan ýran kenishiniń basshysy retinde onyń esimi Sozaq aýdanynyń ensıklopedııasyna da engizilgen. 2017 jyly ol «Appaq» JShS-na jumysqa shaqyrylyp, «Batys Myńqudyq» kenishine basshylyq laýazymǵa taǵaıyndalady. Odan keıin «Appaq» JShS-nyń sol kezdegi basshylary Q.Jartybekovtiń biliktiligi men basshylyq qabiletin oń baǵalap, ony seriktestiktiń bas dırektorynyń orynbasary laýazymyna taǵaıyndaý jóninde usynys bergen. Sóıtken Q.Jartybekovtiń bul qyzmetinen «óz erkimen» shyǵamyn degen oı úsh uıyqtasa da túsine enip kórmegen.
Osylaısha, múmkin ádildikti qalpyna keltirer degen úmitpen, sotqa aryz jazady. Aryz bergen Túrkistan oblysynyń Sozaq aýdandyq soty, onda osy iske tóraǵalyq etýshi sýdıa B.Saǵyntaev munyń qoıǵan talap aryzy boıynsha bar mán-jaıdyń aq-qarasyn ashyp, oń sheshim shyǵarǵanda, zańnyń ǵana saltanat quratyndyǵyna tolyq kóz jetkizedi. Ol týraly Q.Jartybekov alǵys bildirgen hatynda bylaı deıdi: «Aýdandyq sot meniń isimniń aq-qarasyn aıyryp, oń sheshim shyǵardy. «Appaq» JShS bas dırektory A.Avdeev tarapynan qýdalaýǵa ushyrap, 15 jyl boıy nápaqa taýyp júrgen jumys kózinen aıyrylyp qalsam da, Sozaq aýdandyq sotynyń jáne Túrkistan oblystyq apellıasııalyq sotynyń meniń talap aryzymdy obektıvti, adal qaraǵanynyń arqasynda ádilettilik ornap, sot sheshimimen jumysqa qaıta ornalastym. Lajsyzdan bos júrgen ýaqytyma Eńbek kodeksine sáıkes 6 aılyq ótemaqymdy sot sheshimimen aldym. Osy sot sheshiminde: «Mundaı jaǵdaıda, sot Qazaqstan Respýblıkasynyń Eńbek kodeksiniń 49-babynyń 1) tarmaqshasyna sáıkes, jumys berýshi «Appaq» JShS men jumysker Q.J.Jartybekov arasynda eńbek sharty buzylǵany negizsiz dep sanaıdy» – degen tujyrym jasalynyp, óz dálelin tapty. Osyǵan oraı, isti qaraǵan Sozaq aýdandyq sotynyń sýdıasyna, Túrkistan oblystyq sotynyń azamattyq ister jónindegi alqasyna úlken rızashylyǵymdy sizderdiń gazet arqyly bildirgim keledi.
О́ıtkeni men Joǵarǵy sot tóraǵasy Jaqyp Asanovtyń jańa reformasynyń izgi nátıjesinde búginde aýdandyq, oblystyq sottar mán-jaıy ábden anyq bolǵan isti saǵyzdaı soza bermeı, ádildikti naqty anyqtap, onyń joǵary satylarda burmalanbaıtyn zańdy sheshim shyǵaryp beretindigine kóz jetkizdim. Bul bizdiń eldiń Tuńǵysh Prezıdenti – Elbasynyń da, Memleket basshysy Qasym-Jomart Toqaevtyń da alǵashqy satydaǵy sotqa júgingen azamattardyń quqy túpkilikti túrde zańdy qorǵalýy kerektigi týraly tapsyrmalarynyń is júzine asyp jatqandyǵynyń naqty dáleli. Sony sizderdiń gazetterińizge alǵys retinde jarııalasam degen oı kelip, aq nıetimdi joldap otyrmyn». Endeshe biz de jergilikti sottardyń shyǵarǵan oń sheshimderi túpkilikti nátıje berip, daýǵa naqty núkte qoıylyp jáne sonyń arqasynda sot sheshimderiniń ári tart ta, beri tart kúıge ushyramaı, aına-qatesiz múltiksiz oryndalýy – zańnyń saltanat qurýy ekeni aıdaı anyq demekpiz.
Abdýlmahmut Poshataev,
«Egemen Qazaqstan»
