Búgin elorda ákimi Altaı Kólginov qurylysshylardy kásibı merekelerimen quttyqtady.
"Qalamyzdaǵy áleýmettik úıler, mektepter, aýrýhanalar, joldar, saıabaqtar men aýlalar qurylysshylardyń eńbegimen salyndy. Qurylys salasy qyzmetkerleriniń kúndelikti qajyrly eńbeginiń arqasynda qalamyz ósip, odan ári kórkeıip keledi. Olar kúndiz-túni, aıazda da, ystyqta da jumys isteıdi",-dep jazdy elorda ákimi ınstagram paraqshasynda.
Sonymen qatar, A.Kólginov elordanyń avtory jáne bas sáýletshisi Elbasy ekenin de atap ótti.
"Tuńǵysh Prezıdenttiń astanany kóshirý týraly sheshimi pragmatızm men kóregendiktiń úlgisi. Qurylysshylar 300 myń halqy bar shaǵyn qalany qarqyndy ósip kele jatqan astanaǵa aınaldyrdy. Qala turǵyndarynyń sany tórt ese ósti. Barsha qurylys salasynyń qyzmetkerlerin kásibı merekelerimen quttyqtaımyn! Sizderge zor densaýlyq, baqyt jáne tabys tileımin",-dep jazdy Altaı Kólginov.
Elorda qurylys sektorynda kóshbasshy bolyp qala bermek. Qalada jyl saıyn mıllıondaǵan sharshy metr turǵyn úı, áleýmettik nysandar salynyp jatyr.
"Nur-Sultan — armandar oryndalatyn qala. Turǵyndar sapaly bilim alyp, otbasy quryp. Memleket basshysy elordanyń damýyna erekshe kóńil bóledi. Prezıdenttiń tapsyrmasyna sáıkes bıyl qoljetimdi áleýmettik turǵyn úı qurylysynyń kólemi úsh ese artty",-dep atap ótti ákim.
