Sózimizge dálel, kúni keshe Densaýlyq saqtaý mınıstrligi «Otan soǵysynyń múgedekterine arnalǵan Ortalyq klınıkalyq gospıtalinen» koronavırýstyq ınfeksııany juqtyrǵan sońǵy pasıent emdelip shyqqany týraly aqjoltaı habar taratty. 24 maýsymnan bastap atalǵan mınıstrliktiń buıryǵyna sáıkes gospıtal Sovid-19 koronavırýs ınfeksııasyna kúdik bolǵan kezde pasıentterdi teksere otyryp, vırýstyń bar nemese joq ekenin aıqyndaý úshin, emdeýge jatqyzatyn provızorlyq stasıonar bolyp bekitilgen edi. Jeti apta ishinde gospıtalge Covid-19 yqtımal jaǵdaıy bar 730 pasıent túsken, onyń ishinde 335 pasıent oń nátıjemen basqa stasıonarlarǵa aýystyrylǵan, qalǵandary gospıtalden emdelip shyqan. Ortalyqtaǵy mamandardyń biliktiliginiń nátıjesinde birde-bir ólim oqıǵasy tirkelmegen.
Gospıtal dırektory Dınara Orazalına pasıentterdiń jas erekshelikteri 18 jas pen 90 jas aralyǵyn qamtyǵanyn aıtady.
«Biz 50 kún boıy kúni-túni toqtamaı jumys istedik. Ásirese, alǵashqy kezeńderi qıyn boldy. Sebebi koronavırýs ınfeksııasymen kúreste buryn tájirıbe bolmaǵan. Ortalyq qyzmetkerleri jaǵdaıy nashar naýqastarmen jumys istep tájirıbe jınaqtaǵan. Sol qyzmet barysyndaǵy jınaǵan tájirıbemiz septigin tıgizdi dep aıta alamyn. Bizdiń ortalyq mamandary az ýaqyttyń ishinde vırýsqa qarsy kúreste kóp dúnıe úırendi», deıdi ol.
Endi ortalyqqa zararsyzdandyrý jasalady. Tıisti qorytyndy shyqqan soń gospıtal burynǵy beıini boıynsha jumysyn jalǵastyrady. Gospıtal dárigerleri, meıirgerleri men sanıtarlary sońǵy saýyqqan 68 jastaǵy pasıent Kenjetaı Dúısenbaıulyn qoshemettep shyǵaryp saldy. Ol jýrnalısterge bergen suhbatynda atalǵan ortalyqqa aýa jetpeı, entigip kelgenin jetkizdi.
«Jasym – 68-de. Buǵan deıin Jambyl oblysynyń Jambyl aýdany Asa aýylynda 10 kún aýrýhanada jattym. Ol jaqtaǵy dárigerler de aıanbaı eńbek etip, qoldan kelgenniń bárin istedi. Olarǵa da raqmet. Keıin osy jerge aýystyrylyp, taǵy 12 kún emdeldim. Aýa jetpeı, entigip kelip edim. О́kpeni jasandy jeldetý apparatyna qosyp, dári-dármekpen emdedi. Osy qıyndyqtyń bári artta qalsyn. Dárigerler ujymyna alǵysym sheksiz», deıdi emdelip shyqqan sońǵy pasıent.
«Aýrý batpandap kirip, mysqaldap shyǵady» degen tálimdi támsil bar. Jasyńa qaramaıtyn jasyryn jaý sııaqty kóringen indet irgemizden izin sýytyp, emdelip shyqqandar endi qaıtyp emhana esigin kórmese deımiz.
