DDU basshysy Jenevada ótken baspasóz máslıhatynda qańtar aıynyń sońynda qurylǵan seriktestik platformasy elderge qarjylyq problemalardy, sondaı-aq tájirıbeli medısına kadrlaryna tapshylyqty jáne qajetti zattardyń bolmaýyna baılanysty qıyndyqtardy jeńýge kómektesip jatqanyn eske saldy.
"Bul rette, memleketter basshylary eń aldymen, óz azamattaryn qorǵaǵysy keledi. Alaıda, pandemııaǵa qarsy is-qımyl sharalary ujymdyq sıpatta bolýy tıis. Bul qaıyrymdylyq týraly másele emes. Sabaq bolarlyq tájirıbeden túsingenimizdeı, pandemııany toqtatýdyń jáne ekonomıkalyq damýdy qalpyna keltirýdiń eń qysqa joly – bul jekelegen elderdiń barlyq turǵynyn emes, táýekeli joǵary toptardy múmkindiginshe jedel qorǵaý", – dep atap ótti DDU bas dırektory.
Onyń aıtýynsha, bul tásil barlyq memlekettiń múddesine jaýap beredi. Sebebi bir ǵana adam qorǵaýdan tys qalsa, eshkim ózin qaýipsiz sezine almaıdy. Tedros Gebreıesýstiń sózinshe, birlesip jumys isteı otyryp, biz «alǵy sheptegilerdiń» barlyǵyn qorǵanys quraldarymen, al emdeýdi qajet etetinderdi deksametazon sııaqty tıimdi preparattarmen qamtamasyz ete alamyz.
Sondaı-aq DSU basshysy dıagnostıkanyń jańa quraldaryn, dári-dármekter men vaksınalardy ázirleý júrip jatqan qazirgi kezde ótken qatelikterdi qaıtalamaı, "vaksınalyq ultshyldyqtan" aýlaq bolýǵa shaqyrdy. DSU basshysy málim etkendeı, ádilettilik jáne teńquqylyq qaǵıdattaryn negizge ala otyryp vaksınalardy úlestirý jospary eki kezeńnen turady.
Birinshi kezeńde, vırýstyń taralýynyń jalpy táýekelin tómendetý úshin vaksına ony ázirleý boıynsha jahandyq mehanızmge qatysyp jatqan barlyq memleketke teń kólemde jáne bir mezgilde jetkiziledi.
Ekinshi kezeńde qaýip-qater men osaldyq aýqymy nazarǵa alynatyn bolady. Bul jerde másele, eń aldymen, medısına qyzmetkerleri men áleýmettik qyzmetshiler, sondaı-aq qart jáne sozylmaly aýrýlary bar adamdar týraly bolyp otyr.
"Eger biz táýekel tobyndaǵy adamdardy bir mezgilde qorǵaı almasaq, densaýlyq saqtaý júıelerin jyldam turaqtandyra almaımyz jáne jahandyq ekonomıkany qalpyna keltirý múmkin bolmaıdy", - dedi ol.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
