Alqaly jıynda talqylandy

Bul jaıynda energetıkalyq qaýipsizdik máselelerine arnalǵan WEC-2013 22-shi Búkilálemdik energetıkalyq kongrestiń jumysyna qatysý maqsatynda júzege asyrylǵan qazaqstandyq delegasııanyń Ońtústik Koreıaǵa sapary aıasynda kelisilgen bolatyn.

Bul jaıynda energetıkalyq qaýipsizdik máselelerine arnalǵan WEC-2013 22-shi Búkilálemdik energetıkalyq kongrestiń jumysyna qatysý maqsatynda júzege asyrylǵan qazaqstandyq delegasııanyń Ońtústik Koreıaǵa sapary aıasynda kelisilgen bolatyn.

Qazaqstan energetıkteri delegasııasynyń quramynda «Samuryq-Qazyna» AQ, «KEGOC» AQ jáne KAZENERGY qaýymdastyǵynyń ókilderi bar.

Energııa qaýipsizdigi máse­lelerin talqylaý úshin álemniń 100-den astam elinen kelgen álemdik energetıka salasynyń 6 myńǵa jýyq jetekshi ókili jınaldy. Kongreske qatysýshylar álemdik jáne aımaqtyq energetıkany damytý, kómir jáne atom energetıkasy men energııa tıimdiligin damytý máselelerin talqylady.

Is-shara aıasynda Eýropalyq energetıkany damytý máseleleri jónindegi aımaqtyq otyrys­ta eýropalyq asa iri 10 ener­getıkalyq kompanııanyń jetek­shileri «Eýroodaq energetıkalyq saıasatynyń baǵytyn ózgertýge shaqyrý» atty úndeýi barshaǵa jarııa etildi. Atalǵan qujatta kommýnaldyq shottardyń kóte­rilýinen, elektrmen qamtamasyz etýge senimdiliktiń azaıýynan jáne kómirsýtegi shyǵarylymynyń artýynan qoldanystaǵy Eýroodaq energetıkalyq saıasattyń túbe­geıli quldyraýyna erekshe nazar aýdardy. Búgingi kúni Belgııada, Chehııada jáne Portýgalııada ornatylǵan búkil qýatpen bara-bar bolatyn 51 gıgavatt zamanaýı elektr qýaty konservasııalanýyna baılanysty elektrmen qamtamasyz etýdiń senimdiligine úlken qater tónip tur.

Energetıkalyq kom­panııa­lardyń basshylary «burynǵy álemdik tártipten» bas tart­qanyna erekshe nazar aýdaryp, tutynýshylardy qorǵaý maq­satynda úılestirilgen jumys isteý qabileti joǵary jáne je­ńildetilgen júıeni qoldaıtyny týraly baıandady.

Atalǵan bul bastama oryn alǵan jaǵdaıdy túzetý boıynsha – qaıta jańartylatyn energııa kózderin tek naryq jaǵdaıynda ǵana qoldanysqa engizý jáne demeý, qarjydan bas tartý, jańa qurylysqa qarajat bólgenniń ornyna qoldanystaǵy básekege jaramdy qýattardy paıdalaný, sondaı-aq, Eýroodaqta kómirtegi naryǵyn nyǵaıtýǵa naqty sharalar usynady.

Sonymen qatar, koreıalyq áriptestermen qol jetkizgen keli­simder tizimine taǵy da bir mańyzdy tarmaq engizilgenin de aıta ketý oryndy. Ol – 2014 jyly Astana ekonomıkalyq forýmynyń aıasynda Álemdik energetıka jetekshileriniń sammıtin ót­kizý. Bul týraly Búkilálemdik energetıkalyq keńestiń bas hatshysy Krıstof Fraı myrza men qazaqstandyq delegasııanyń jetekshisi «Samuryq-Energo» AQ basqarma tóraǵasy, osy keńestiń Qazaqstandyq komıtetiniń tór­aǵasy Almasadam Satqalıev tıisti kelisim jasady.

– Biz úshin bul qosymsha jaýapkershilik. Sondyqtan da biz sammıtti uıymdastyrýǵa tıispiz jáne ony asa joǵary deńgeıde ótkizýimiz kerek, – dep málimdedi «Samuryq-Energo» basshysy.

Jalpy alǵanda, Qazaqstan men Koreıanyń memlekettik jáne bıznes-qurylymdarynyń ózara is-áreket jasaýynyń jo­ǵa­ry deńgeıi eki eldiń qazirgi kezdegi damý satysynyń stra­tegııalyq yntymaqtastyq aýqy­mymen dáleldenedi. Bul týraly qazaqstandyq taraptyń atynan «Samuryq-Energo» AQ basqarma tóraǵasy Almasadam Satqalıevtyń tóraǵalyǵymen 18 qazanda ótken Qazaqstan-Koreıa iskerlik keńesiniń tórtinshi otyrysyna qatysqan mamandar da sóz qozǵady.

Eki eldiń 140-tan astam isker ókilderiniń qatysýymen ótken forýmnyń jumysy kezinde taraptar ózara tıimdi yntymaqtastyqty damytý bolashaǵyn, ártúrli saladaǵy birlesken jobalardy iske asyrý máselelerin, sonyń ishinde energetıkany, energııanyń qaıta jańartylatyn kózderin, temirjol kóligin, tehnologııalar men ınnovasııalardy, energııa tıimdiligin, qarjylyq salany, aýylsharýashylyq, medısına, logıstıka, mashına, qural-jabdyq jasaý salasyn, munaı men gaz-hımııa salalaryn jáne mádenı yntymaqtastyq ornatý men mamandar daıyndaý máselelerin talqylady.

Atap aıtqanda, «Samuryq-Qazyna» UÁQ» AQ kompanııa­lar tobynyń basshylaryn Samsung Adam resýrstaryn damytý ortalyǵynda oqytý týraly kelisimge qol jetkizildi.

Qazaqstan delegasııasynyń quramynda «Samuryq-Qazyna» UÁQ» AQ holdıngine kiretin, atap aıtqanda «Qazaqstan te­mir joly» AQ, «KEGOC» AQ, «Qazaq­te­lekom» AQ, «Eır Asta­na» AQ, «Samuryq-Qazyna In­vest» AQ, «SQ-Farmasııa» JShS, «Samuryq-Energo» AQ kompanııalary da bar. Sonymen qatar, forýmǵa Qazaqstan eko­nomıkasynyń jekemenshik sek­torynyń, damý ınstıtýttary men memlekettik organdardyń ókilderi de qatysty.

Iskerlik keńestiń aıasynda Balqash JES qurylysyn odan ári belsendire túsý qajettiligi týraly kelissózder júrgizildi. 2013 jylǵy 10 qazanda ótken Qazaqstan Respýblıkasy Par­lamenti Senatynyń ke­ńeı­tilgen plenarlyq otyrysynda Balqash jylý elektr stan­sasynyń qu­rylysy jobasy boıynsha Úki­metaralyq kelisimge hattamany ratıfıkasııalaý týraly Qa­zaqstan Respýblıkasy zańynyń jobasy maquldanǵany belgili. Al Memleket basshysy atalǵan másele boıynsha birqatar naqty tapsyrmalar da berdi.

Búgingi kúni Qazaqstanda Koreıa kapıtalynyń qatysýymen 300-den astam birlesken kásiporyn jumys isteıtinin eske túsire keteıik. Bizdiń memleketterimiz arasyndaǵy taýar aınalymy 1 mıllıard AQSh dollarynan asyp jyǵylady, al Koreıa ın­vestorlarynyń Qazaqstan ekonomıkasyna salǵan ınves­tısııasynyń jalpy kólemi qazirgi kezde 8 mıllıard dollardan artyq bolyp otyr.

Dınara AROVA.