– Shirkin, mundaı merekelik is-sharany tikeleı sahnadan tamashalaǵanǵa ne jetsin. О́kinishke qaraı, karantın talaby kóp jobalardy onlaın-baǵdarlama arqyly ǵana taratýǵa májbúrleıdi. Soǵan qaramastan búgingi merekelik tartý kórermen aýdıtorııasyna tamasha kóńil-kúı syılaıdy degen oıdamyn. Sózsiz, Konstıtýsııa kúni – Qazaqstandaǵy basty memlekettik merekelerdiń biri, elimizdiń Atazańy biz úshin baǵa jetpes baıtaq qundylyq sanalady. Osyndaı sátte otandastarǵa kelisim men turaqtylyq tileımiz, árbir shańyraqta bereke-birlik, baqyt pen shattyq ornasyn, – dedi "Astana Opera" teatry opera trýppasynyń meńgerýshisi, Qazaqstannyń eńbek sińirgen qaıratkeri Azamat Jyltyrkózov.
Keshte Janat Shybyqbaev, Jan Tapın, Meıir Baınesh, Beıimbet Tańaryqov, Aızada Qaponova, Saltanat Muratbekova, Bıbigúl Januzaq, Jámıla Jarqymbaeva, Mádına Islamova, Elena Ganja, Ramzat Balakıshıev, Nazym Saǵyntaı, Erjan Saıpov, Ǵalııa Baıǵazınova, Kýrvanjan Ahatov, Janar Ahmetova, Raýshan Beskembırova, Irına Kýrgýzkına, sonymen qatar Dolce ansambli óner kórsetedi.
Baǵdarlamada qazaq halyq ánderi, Otan týraly patrıottyq jáne lırıkalyq kompozısııalar qamtylǵan. Qazaqstandyqtardyń birligi men yntymaqtastyǵy týraly jyrlanatyn avtorlyq áýenderdiń kóbi búginde halyq qazynasyna aınalyp úlgergen.
– Konsertte men halyq áni"«Aqbaqaıdy" oryndaımyn. Onlaın sıpatynda bolǵanmen aıtýly is-sharaǵa barynsha daıyndaldyq. Sebebi óner ıesi úshin sahna men shyǵarmashylyq ortanyń orny bólek. Karantın jaqyn arada aıaqtalyp, jańa segizinshi maýsymdy zal toly kórermenmen birge qarsy alatynymyzǵa senimdimin, – dep óz oıyn jetkizdi "Astana Operanyń" jetekshi solısi, Qazaqstannyń eńbek sińirgen qaıratkeri Jan Tapın.
