Ortalyq kommýnıkasııalar qyzmetiniń alańynda ótken onlaın brıfıngte Densaýlyq saqtaý mınıstrliginiń resmı ókili Baǵdat Qojahmetov Qazaqstandaǵy epıdemııalyq ahýaldyń turaqty ekenin aıtqan bolatyn. Iаǵnı ol koronavırýs ınfeksııasyn juqtyrý deńgeıi tómendep jatqanyn jetkizdi. Mysaly, keshe Mańǵystaý oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Ǵazız Nadýev óńirde sońǵy bir aptada koronavırýs juqtyrǵandardyń tirkelmegenin habarlady.
Degenmen mınıstrlik jańa tolqynnyń bolýy múmkin ekenin de eskertken bolatyn. B.Qojahmetovtiń aıtýynsha, mınıstrlik bul jaǵdaıǵa da saqadaı saı. «Úkimetten bastap, ákimdikterge deıin qyzý jumystar istep jatyr. Dári-dármek qory, aýrýhanalardyń múmkindigi, mobıldi brıgadalardyń qyzmeti qadaǵalanýda», degen resmı ókil ótken aptada Densaýlyq saqtaý mınıstri Alekseı Soıdyń óńirlerdegi medısınalyq mekemelerdiń daıyndyǵyn teksergenin aıtty.
«SQ-Farmasııa» biryńǵaı dıstrıbıýteri tumaýǵa qarsy ekpeniń 2 060 300 dozasyn satyp alǵan. Resmı ókildiń aıtýynsha, bul shamamen halyqtyń 11 paıyzyn qamtýǵa jetkilikti. Al aımaqtaǵy densaýlyq saqtaý basqarmalary qosymsha 753 900 dozaǵa tapsyrys bergen. «Elimizde tumaýǵa qarsy ekpe 15 qyrkúıekte bastalady. Iаǵnı ádettegi merzimnen eki aptaǵa erterek. Bul epıdemııalyq maýsymda týyndaıtyn tumaý sekildi aýrýlarǵa qarsy myqty ımmýnıtet qalyptastyrýǵa septigin tıgizedi. Tumaýǵa qarsy ekpeniń kúshi 6 aıdan 12 aıǵa deıin saqtalady. Maýsymdyq tumaýǵa qarsy halyqqa ekpe jasaý úshin 5 myńnan astam egý kabıneti daıyndaldy. Qosymsha ekpe salatyn mamandar oqytylýda. 1107 semınar ótkizildi, nátıjesinde 7282 dáriger men 14541 kishi jáne orta qyzmetker daıarlyqtan ótti», dedi B.Qojahmetov.
Sondaı-aq ol karantındik sharalar týraly da aıtyp berdi. «Karantın erejeleri 17 tamyzda jáne tamyzdyń sońynda eki márte jeńildetildi. Budan ári de bosańdaýy múmkin. Ol tek qana bizdiń halyqtyń sanıtarlyq normalardy oryndaýyna baılanysty. Eger biz toı jasap, erejelerdiń bárin buzyp ketsek maýsym aıynda bolǵan jaǵdaı qaıtalanýy múmkin. Sondyqtan ol tek qana halyqtyń qolynda bolyp tur», dedi B.Qojahmetov.
Jalpy keshegi kúnniń resmı aqparatyna súıensek, koronavırýstyq ınfeksııadan 5073 adam em qabyldaýyn jalǵastyrýda. Olardyń arasynda 30 bala bar. «Stasıonarlarda 2863 naýqas jatyr. 2210 adam ambýlatorııalyq jaǵdaıda emdelýde. Jalpy naýqastardyń arasynda 140 adamnyń ahýaly nashar. Sonyń ishinde 18 naýqastyń ahýaly asa qatty aýyr dep baǵalanýda. 24 naýqas ókpeni jasandy jeldetý apparatynda jatyr» delingen Densaýlyq saqtaý mınıstrliginiń baspasóz habarlamasynda.
