Iran Press jazǵandaı, el premer-mınıstri Mustafa ál Kadhımı: «Qurǵaqtaǵy shekara jergilikti naryqtyń qajettiligin óteý úshin saýda júrgizý maqsatynda ǵana ashylady, al otelder men meıramhanalar vırýstan saqtaný sharalaryn qatań ustanýy tıis», deı kele, 12 qyrkúıekten bastap sporttyq jarystar ótkizýge de bolatynyna toqtaldy. Degenmen jarystardyń barlyǵy jankúıerlersiz ótkiziledi. Al memlekettik organdar óz qyzmetkerleriniń 50 paıyzynyń keńsege kelip jumys isteýine múmkindik bermek.
* * *
Fransııanyń densaýlyq saqtaý mınıstri Olıve Veran 8 qyrkúıekte osy aptadan bastap COVID-19-ǵa qarsy antıdeneni jyldam anyqtaıtyn test engiziletinin jarııalady, deıdi Le Figaro.
«Test bar bolǵany 15-20 mınýt aralyǵynda antıdene túzilgenin nemese túzilmegenin anyqtap beredi. Bul osy sársenbiden júrgizile bastaıdy», degen Olıve Veran ázirge eksperıment túrinde qolǵa alynǵan tájirıbege úlken úmit artylyp otyrǵanyn, nátıjesine qaraı ony ári qaraı jalpylama engizý jóninde sheshim qabyldanatynyn aıtty.
Pandemııanyń qaı elge de ońaı soqpaı turǵany málim. Odan fransýzdar da zardap shegip otyr. Eldiń Ulttyq statıstıka jáne ekonomıkalyq zertteýler ınstıtýtynyń boljamdaryna qaraǵanda, 2020 jyldyń sońynda fransýzdardyń jumyssyzdyq kórsetkishi 9,5 paıyzǵa joǵarylaýy múmkin.
Aýrýmen kúreste qandaı da bir qareketterdiń oń nátıjesine úmit artyp, jedel test engizýdi kózdegen Fransııa úkimeti ekonomıkany qalypqa keltirýde shyǵys mólsheri 100 mlrd eýro kólemin quraıtyn baǵdarlama da ázirlegen kórinedi.
* * *
Polsha bilim berý júıesi tolyqtaı qashyqtan oqytýǵa kóshýdi qolaıly kóredi, deıdi atalǵan eldiń bilim mınıstriniń orynbasary Marjena Mahalek.
Búginde 53 bilim berý orny osy ádispen jumys istep jatyr. Marjena Mahalektiń aıtýynsha, qashyqtan oqytý men sabaqtardy azaıtýda asa yjdahattylyq qajet. Polshadaǵy balabaqshalar men mektepterdi jáne arnaıy oqý oryndaryn qosqanda olardyń sany 48,5 myń bolsa, sonyń 53-i tolyq, al 29-y ishinara qashyqtan bilim berýde. Alaıda eldegi epıdemııalyq jaǵdaıdy eskere kele, aýrýdyń taralmaýy úshin qashyqtan jumysty jalǵastyrýdyń tıimdiligi joǵary degen oıdamyz, dedi ol. Bul jaıly Polskie radio 24 efırinde aıtyldy.
* * *
Bıyl mamyr aıynda Koreı ekonomıka ınstıtýtynyń sarapshylary el ekonomıkasynyń ósimi 0,2% kóleminde bolady dep eseptese, endi IJО́ 1,1 paıyzǵa tómendeıdi dep otyr.
COVID-19 ekonomıkaǵa tusaý salǵanymen qosa, ony artqa tartyp otyr degen sarapshylar Qytaı men AQSh arasyndaǵy taıtalastyń da el qýatyn arttyrýǵa kedergi jasaǵanyna toqtalǵan.
Bıyl jeke sektordaǵy tutyný 4,6 paıyzǵa tómendedi, alaıda óndiristik qýattylyqty arttyrýǵa salǵan ınvestısııa 4,2 paıyzdy qurap, qurylys salasyna arnalǵan qarjy 1,1 paıyz kólemine deıin artty. Soǵan qaramastan ekonomıka vırýs salmaǵyn aıqyn sezinýde deıdi sarapshylar.
* * *
Djons Hopkıns ýnıversıteti táýlik ishinde rekordty aýrý kórsetkishi tirkelýin jarııalady.
Buǵan deıin 14 tamyzda 304 351 adamnyń juqtyrǵany eń joǵary san bolyp kelgen-di, endi odan da artyq kórsetkish tirkeldi.
Pandemııa qursaýyndaǵy memleketter tiziminiń basynda burynǵydaı AQSh – 6,2 mln, ekinshi orynda Brazılııa – 4,1 mln, al úshtikte 4 mln adam juqtyrýymen Úndistan belgilense, tórtinshide 1 mln adammen Reseı Federasııasy tur.
AQSh KVI-den ólim sany jóninen de (188 myń) alǵashqy orynda, odan keıin Brazılııa – 125 myń, úshinshi satyda 69 myń azamatynan aırylǵan Úndistan tur. Osylaısha, Jer sharynda SARS-CoV-2-tan ajal qushqandar 876 myń adamnan
* * *
Eýropada keıbir memleketter COVID-19-ben kúresýde áleýmettik qashyqtyqty saqtaýǵa múmkindik bermeıtin oryndardy jaba bastady. Bul jaıynda birqatar basylym jarııalady.
Máselen, «Izvestııa» men RBK aýrýdyń taralýy jastar arasynda azaımaı turǵany alańdatqan soń osyndaı sharalar qabyldanyp jatqanyn, Italııada tipti daladaǵy ashyq alańdarda bıleýge tyıym salynǵanyn, Maltada 15 adamnan artyq esh jerge jınalýǵa bolmaıtynyn jazsa, DDU derekterinde 15 pen 24 jas aralyǵyndaǵy jastar arasynda aýrýdyń 4,5 paıyzdan 15 paıyzǵa deıin óskeni mysalǵa keltirilgen. Maltada túngi klýbtar, barlar tolyq jabylǵan. Al Antalıadaǵy demalys oryndarynda kóńildi «kóbikti keshter» bıyl ótpeı jatyr. Germanııa dıskotekalardy pandemııa bastalǵaly tyıyp, jylda kúzde Kelnde 3 aı boıyna júretin dástúrli karnavaldy da toqtatty.
Shilde aıynda DDU aımaqtyq dırektory Hans Klıýgeniń Eýropa jastaryn aýrý taratýshylar dep aıyptaǵany da este bolar.
* * *
Meksıka densaýlyq saqtaý mınıstrliginiń departament basshysy Rıkardo Kortes Alkala 24 saǵattyń ishinde 6 myńnan astam aýrý juqtyrý tirkelgenin habarlady.
Alkalanyń aıtýynsha, Meksıkada 629 409 adam COVID-19 tyrnaǵyna ilinip, onyń 67 326-sy ómirimen qoshtasty. Vırýstyń meksıkalyqtardy bosatpaı turǵanyna qaramastan, elde 438 754 pasıenttiń aýrýdan jazylyp shyǵýy halyqtyń senimin arttyrǵandaı.
Brazılııa jurty bir táýlikte 682 azamatyn joǵaltty. Densaýlyq saqtaý mınıstrliginiń baspasóz qyzmeti taratqan habarlama boıynsha qaıtys bolǵan brazılııalyqtar sany 126 203 adamǵa jetti. 4 mln 123 myń adam SARS-CoV-2 juqtyryp, indetten kóz asha almaı jatqan elde sońǵy táýlikte 30 168 turǵynnan aýrý anyqtalypty. Jalpy COVID-19 Brazılııaǵa aýyr soqqy boldy. Álem boıynsha KVI-men eń uzaq, ıaǵnı 152 kún aýyrǵan áıeldiń de osy eldiń azamaty ekeni belgili.
* * *
Kolýmbııada bir kúnde 8394 adamnan vırýs tabyldy.
Pandemııa planetany sharlaǵaly bul elde 658 456 adam vırýs juqtyryp, 21 156 pasıent ómirden ótken edi.
5 qyrkúıekte 268 kolýmbııalyq joǵarydaǵy indet qurbandarynyń qataryna qosylypty. Al indetti jeńip shyqqandar sany 507 myń adamdy quraǵan kórinedi.
