"Makkabı" fýtbol klýby 1913 jyly qurylǵan. Uzaq ýaqyt boıy ala-qula óner kórsetken olar ótken ǵasyrdyń sekseninshi jyldarynan bastap, Izraıldegi azýly komandalardyń birine aınaldy. Sol kezden beri haıfalyqtar 12 márte el chempıony atanyp, 6 ret el kýbogyn oljalady. Sońǵy ret "Makkkabı" 2011 jyly ózderiniń ishki birinshiliginde bas júldeni ıelengen edi. 1999 jyly Kýbok ıegerleri kýbogy jolyndaǵy jarystyń shırek fınalyna deıin jetti. 2003 jáne 2010 jyldary ÝEFA Chempıondar lıgasynyń toptyq týrnırinde baq synaý qurmetine ıe boldy. Jáne de olar osy mejege jetken Izraıldiń tuńǵysh komandasy retinde tarıhta qaldy. Qazirgi kezde atalmysh klýbty Marko Balbýl jattyqtyrýda.
Esterińizge sala keteıik, Eýropa lıgasynda "Qaırattyń" joly ızraıldiktermen eki márte qıysyp, almatylyqtar eki retinde de utylyp qalǵan edi. 2017 jyly Tel-Avıvtiń "Makkabıine" jol bersek, byltyrǵy maýsymda Beer-Shevanyń "Hapoeline" ese jiberdik. Al joǵaryda atalǵan qos klýb arasyndaǵy tartys 17 qyrkúıekte Haıfada ótedi.
