Áýeli Mánshúk Mámetova atyndaǵy izdeý tobynan Saıqyn aýyly mańynda Tynyq muhıty flotynyń teńiz jaıaý áskeriniń súıekteri tabyldy degen aqparat keldi. Olar 1942 jyldyń qazan aıynda Batys Qazaqstan oblysynyń aýmaǵyna ásker bólimderiniń ornalasýy barysynda qaza bolǵan.
2015 jáne 2017 jyldary jergilikti izdeýshiler toptarynyń kómegimen Batys Qazaqstan oblysynda qaza bolǵandardyń súıekteri tabylyp, Bókeı orda aýdany, Saıqyn aýylynda jerlengen. Resmı derekter boıynsha 38 teńiz jaıaý áskeri bolǵan. Qazirgi tańda 17 jaýyngerdiń súıegi tabylyp, jerlengen.
«Iz-túzsiz bolyp esepteletin, súıekteri tabylmaǵan soldattar men beıbit turǵyndar áli de kóp. Osy oraıda Batys Qazaqstan oblysynyń aýmaǵynda «Atamnyn Amanaty» qoǵamdyq birlestigi jáne Mánshúk Mámetova atyndaǵy izdeý tobynyń kúshimen 14 kúnge sozylatyn qazba jumystaryn ótkizý týraly sheshim qabyldandy», deıdi «Atamnyn Amanaty» qoǵamdyq birlestiginiń basqarma tóraǵasy Murat Moldaǵalıev.
Bul aımaq soǵys jyldary maıdanǵa jaqyn aýmaq bolyp eseptelgen. Kóp márte bombalanǵan. Astrahan – Saratov temirjoly boıynda 40-50 baýyrlastar zıraty bar. Bul jol arqyly qarý-jaraq, dári-dármek tasymaldaıtyn eshelondar ótetin. Dál osy fakt bombalaýǵa sebep bolǵan. Sol jyldary jaýyngerler men birge jergilikti turǵyndar da qaza boldy.
Qazaqstandaǵy Reseı Federasııasynyń jáne Ýkraınanyń elshilikterine sol memleketterdiń aýmaǵynan soǵysqa ketken soldattardyń súıekterin izdeý jumystary týraly habarlandyrý jiberildi.
