Rasynda da, dúnıe júzin dúrliktirgen koronavırýs indetiniń saldarynan mektep oqýshylary men stýdentterdiń basym kópshiligi qashyqtan oqýǵa májbúr bolǵany anyq. Bizdiń elimiz de mundaı ózgeristi der kezinde qoldanysqa engizip, batyl qadamdarǵa bet burdy. Alaıda bilim salasy mundaı sony ózgeriske asa bir daıyn bolmaı shyqty. О́ıtkeni buryn betpe-bet kelmegen bul salanyń ózindik oı-shuqyrlary jetkilikti edi. Sonyń eń negizgisi dep onlaın-platformanyń daıyn bolmaýyn sanaýǵa bolady. Muǵalim de, oqytýshy da, oqýshy men stýdent te – barlyǵy bir mezette qatar kirip otyrǵandyqtan, mundaı shamadan tys salmaqty kórmegen kóp platformanyń beli «qaıysyp» jatty. Mine, osy rette tolyqqandy oqý úderisi úshin qajetti barlyq fýnksııalary bar biryńǵaı onlaın bilim berý platformasy aýadaı qajet ekendigi bilindi. Joldaýda osy másele oryndy kóterildi dep oılaımyn. Bulaı bolmaıynsha, onlaın oqytýdaǵy bilim sapasy eshqashan arta qoımaıdy.
Kópten kóterilip kele jatqan jaıttyń biri – mektep oqýshylarynyń qabilet-qarymyn aıqyndap, kásibı baǵyt-baǵdar berý saıasatyna kóshý týraly edi. Bul másele de Joldaýda óte oryndy aıtyldy. Jyl saıyn kásibı jáne joǵary oqý oryndaryna túse almaı qalatyn 21 myńǵa jýyq mektep túlegin neet jastardyń qataryna qospaı, áý bastan eńbek pen kásipke baýlysaq, qaı jaǵynan da tıimdi bolatyny sózsiz.
Al budan keıingi basty máseleniń biri ustazdar jalaqysynyń tómendigi bolsa kerek. Bul tóńirekte Memleket basshysy birshama batyl qadam jasady da jáne ustazdar qaýymynyń jalaqysyn ósirý máselesin únemi jadynan shyǵarǵan emes. Oqtyn-oqtyn bul jaıtqa oralyp otyratyndyǵy da sondyqtan. El Prezıdentiniń 2021 jyldyń qańtar aıynan bastap muǵalimderdiń eńbekaqysyn 25 paıyzǵa kóbeıtý týraly sheshimi dál osyndaı kezeńdegi óte bir mańyzdy qadam dep baǵalaǵan bolar edim. Ǵylym men bilim alǵa ozǵan osynaý tusta el bolashaǵyn tárbıeleýdi óz qolyna alǵan ustazdar qaýymy úshin bul bir jaqsy jańalyq bolǵaly tur. Qazaq ustazy qýansa, qoǵam keri kete qoımas.
Al ǵylymǵa kóńil bólý aldyńǵy qolǵa alǵan sharýalardyń zańdy jalǵasy ispettes. Ásirese, «Jas ǵalym» jobasy aıasynda zertteý júrgizý úshin 1000 grant bólý máselesi de kóptiń kóńilinen shyqty. Únemi aqsap, adymyn túzeı almaı kele jatqan qazaq ǵylymyna tyń serpin, jańa lep ákeledi ǵoı dep úmit artamyz.
Mine, el ishindegi myń san máseleni bir Joldaýdyń ón boıyna syıǵyzyp, sonshalyqty utymdy jetkize bilý – el erteńine degen senimdi nyqtaı tússe kerek. Joldaýda aıtylǵan qadaý-qadaý dúnıelerdiń bári oryn-ornymen, ret-retimen sheshilip, jarqyn kúnderge jol bastaıdy dep kámil senemiz.
Raqymbek Jolaev,
Túrkistan oblysy Adamı áleýetti damytý basqarmasynyń basshysy
