Atalǵan vedomstvonyń Bilim jáne ǵylym salasyndaǵy sapany qamtamasyz etý komıteti 25 joǵary oqý ornynyń kadrlardy daıarlaý baǵyttary boıynsha lısenzııalarǵa 60 qosymshasyn qaıtaryp aldy. Onyń basym bóligi komıtettiń tekserisinen keıin qaıtaryldy.
Negizinen bul ýnıversıtetter «Pedagogıkalyq ǵylymdar», «О́ner», «Gýmanıtarlyq ǵylymdar», «Jaratylystaný ǵylymdary», «Tehnıka ǵylymdary», «Qyzmet kórsetý» jáne «Áleýmettik jumys», «Áleýmettik ǵylymdar» baǵyttary boıynsha kadrlar daıarlaýdy júzege asyrdy.
Júrgizilgen tekserý nátıjeleri boıynsha joǵary oqý oryndary normatıvtik-quqyqtyq aktilerdi saqtamaǵany anyqtaldy. Olqylyqtarǵa negizinen talapkerlerdi qabyldaý, professorlyq-oqytýshylar quramnyń (POQ) biliktiligin arttyrý, professorlyq-oqytýshylar quramyn konkýrs arqyly almastyrý, professorlyq-oqytýshylar quramynyń oqý júktemesin josparlaý, bilim alýshylardy qorytyndy attestattaý, dıplom blankilerin esepke alý jáne t.b. boıynsha jol berilgen.
«Prezıdenttiń tapsyrmasy boıynsha jumysty eki baǵytta júrgizip jatyrmyz. Birinshiden, álsiz ýnıversıtetterdi tolyqtaı jabý, ekinshiden, bul jaǵdaıda ýnıversıtetterdi sapasy tómen, jabdyqtary jetispeıtin jáne t.b. mamandyqtary boıynsha lısenzııasynan aıyrý. Iá, bul joǵary oqý oryndary úshin óte aýyr prosess, joǵary oqý oryndary qomaqty kirister men stýdentterdi joǵaltady, biraq biz úshin sapany qamtamasyz etý mańyzdy», dep túsindirdi Bilim jáne ǵylym vıse-mınıstri Mıras Dáýlenov.
Bıyl bilim berý qyzmetine qoıylatyn biliktilik talaptary kúsheıtildi, sondaı-aq Memlekettik jalpyǵa mindetti bilim berý standarty men qyzmettiń úlgilik qaǵıdalary jańartylǵanyn esterińizge salamyz.
