Dál qazirgi ýaqyt óńir dıqandary úshin «beınetiniń zeınetin kóretin» kezeń. Jaz mezgiliniń sońǵy aıy támamdala bere, Jambyl oblysynda da egin oraǵy aıaqtaldy. Qara jerdiń qoınaýynan órgen sary altyn bıyl da eldiń yrzyq-nesibesine oraı bitik shyqty.
Oblystyq aýyl sharýashylyǵy basqarmasy basshysynyń orynbasary Erlan Qulkeevtiń aıtýynsha, qazirgi ýaqytta óńirdegi 359,2 myń gektar alqaptan 816,6 myń tonna astyq bastyrylyp, ótken jylmen salystyrǵanda 53,5 myń tonna artyq ónim alynyp otyr eken. Árbir gektardan alynǵan ortasha ónim kólemi 22,7 sentnerdi quraıdy. Oblys boıynsha ár gektardan 24,4 sentner ónim alyp, Merki aýdany kósh bastady. Sondaı-aq, Qordaı aýdanynda gektarynan 24, T.Rysqulov aýdanynda 23 jáne Shý aýdanynda 22,9 sentnerden ónim alynyp, oblystyq deńgeıden joǵary kórsetkish kórsetken. Qalǵan aýdandarda da jaqsy ónim alynǵan.
Búginde Jambyl oblysynda aýyl sharýashylyǵy maqsatyndaǵy jalpy jer kólemi 4 612 841 gektardy quraıdy. Onyń ishinde 772 664 gektar – egistik, 177 484 gektar – sýarmaly jer, 3 862 gektar – kópjyldyq ekpeler, 116 594 gektar – shabyndyq jáne 3 583 760 gektar – jaıylymdyq, sondaı-aq, 135 961 gektar basqa jerler de bar. Al, bar nárseni uqsatyp, paıdalanyp, el ıgiligine jaratý dıqandardyń eńbegine baılanysty.
Bıyl da jyldaǵydaı Úkimet qoldaýynyń nátıjesinde óńirdegi birqatar sharýalar mol ónim alyp, tabysqa kenelýde. Máselen, T.Rysqulov aýdanyndaǵy «Qaınar Agro» JShS 7 myń gektar jerge kúzdik bıdaı men arpa ekken. Atalǵan seriktestik basshysy Serikjan Shoqataevtyń aıtýynsha, memleket qoldaýynyń nátıjesinde tehnıkalar alyp, jumysyn júrgizip otyr. Bul seriktestikte búginde 40 adam jumys isteıdi. Sol sııaqty, óńirdegi iri seriktestik bolyp sanalatyn «Shalqar» sharýa qojalyǵynyń tóraǵasy Shalqar Tókeev te tehnıka alý úshin memleket tarapynan sýbsıdııa alyp otyrǵan kásipkerdiń biri. Ol jyl saıyn 7 341 gektar alqapqa bıdaı, arpa egedi. Atalǵan qojalyqta búginde 50-ge tarta adam jumys isteıdi.
«Eńbegimizge qaraı jaqsy ónim aldyq. Úkimet qoldaýynyń nátıjesinde qajetti tehnıkalarǵa da qol jetkizdik. Alǵan ónimimizden tuqymǵa keregin alyp qalamyz. Odan keıin jumysshylardyń eńbekaqysyn beremiz», deıdi Sh. Tókeev.
Jambyl oblysynyń ákimdigi, Aýyl sharýashylyǵy mınıstrligi, «QazAgro» Ulttyq basqarýshy holdıngi» AQ jáne «Ulttyq agrarlyq ǵylymı-bilim berý ortalyǵy» birlesip, aýyl sharýashylyǵy daqyldarynyń 2017-2021 jyldar aralyǵyndaǵy egis alqaptarynyń qurylymyn ártaraptandyrý týraly memorandým qabyldaǵan bolatyn. Qujatqa sáıkes, oblystyq aýyl sharýashylyǵy basqarmasynyń málimetinshe, oblys boıynsha egis alqaptarynyń kólemin 2020 jyly 680,3 myń gektarǵa jetkizý mejelengen. Bul ótken jylmen salystyrǵanda 11,9 paıyzǵa artady dep josparlanýda. Búginde oblys boıynsha aýyl sharýashylyǵy daqyldarynyń egis kólemi 717,6 myń gektardy qurap otyr. Sondaı-aq egis alqaptaryn arzandatylǵan mıneraldy tyńaıtqyshtarmen qamtamasyz etý maqsatynda bıýdjetten 1,25 mlrd teńge bólinip, jospar boıynsha 25,5 myń tonna mıneraldy tyńaıtqyshtardy aýyl sharýashylyǵy alqaptaryna taratý mejelengen.
Jalpy, bıyl óńirde 149,7 myń gektarǵa arpa, al 209,5 myń gektarǵa bıdaı egilip, egin orý naýqanyna barlyǵy 816 kombaın qatysty. Jambyl oblysy bıyl jyldaǵydan mol ónim alyp otyr.
Jambyl oblysy
