Qazaqstannyń úsh oblysynda sheneýnikterdi jappaı qyzmetterinen bosatý bastalatyn shyǵar. Vıse-premer Qaraǵandy, Ońtústik Qazaqstan jáne Mańǵystaý oblystarynyń ákimderine problemasy bar jobalarǵa jaýapty sheneýnikterdi jazalaýdy tapsyrdy. Bul týraly Total.kz saıty habarlady.
Mundaı tapsyrma Indýstrııa jáne jańa tehnologııalar mınıstri Áset Isekeshovtiń sóılegen sózinen keıin berildi. Ol osy jumystarǵa aımaqtarda jaýap beretin sheneýnikterdi jazaǵa tartýdy usyndy. Mınıstr Úkimettiń 11 qazandaǵy keńeıtilgen keńesinde Prezıdent aıtqan eskertpeler men problemalardyń sheshilý barysyna arnalǵan jıynda osyndaı qatań talap qoıdy. Áset Isekeshov óz sózinde Qaraǵandyda ushaq shyǵarý jobasyna baılanysty týyndaǵan problemaǵa erekshe ekpin saldy. Ol sondaı-aq Ońtústik Qazaqstan oblysyndaǵy toqyma fabrıkasyn shıkizatpen qamtamasyz etý jáne Mańǵystaý oblysynda planshetti kompıýter shyǵarý máselelerindegi tar óristilik pen kózboıaýshylyqqa qatty alańdaýshylyq bildirdi. Qaraǵandydaǵy zaýyttyń shamasy bir ushaq shyǵarýdan aspady. Ońtústik Qazaqstandaǵy toqyma zaýyt tipti jaqyn keleshektiń ózin oılastyrmaı asha salǵan birdeńe bolyp shyqty. Oǵan shıkizat taýyp berýdiń qıyn bolǵany óz aldyna, kásiporynnan shyǵatyn ónimniń ózindik quny shetelderden satyp ákelinetin daıyn buıymdardan birneshe eselep asyp tústi. Al Mańǵystaýdaǵy planshet zaýyty aty ǵana bar, zaty joq, taza kózboıaýshylyqqa qurylǵan alaıaqtyq tirlik kórinedi. Onyń kompıýter planshetteri Qytaıdan daıyn ónim túrinde ákelinip, munda tek etıketkasy, ıaǵnı japsyrma qaǵazdary ǵana aýystyrylady eken.
Mınıstr osyǵan baılanysty jergilikti jerlerdegi ákimderdiń aımaqtardyń ınvestısııalyq múmkindikterin ashýdaǵy, bıznes pen ınvestorlar úshin qolaıly jaǵdaılar jasaýdaǵy jumystarynyń nashar ekenin atap kórsetti. Indýstrııalandyrý kartasy úshin ákimder usynatyn jobalardyń sapalary tómen ekeni baıqalady. Mınıstrlik olardyń sońǵy joly usynǵan 200 jobasynyń teń jartysyn údemeli ındýstrııalyq-ınnovasııalyq damý baǵdarlamasy talaptaryna saı kelmeýleri sebepti jaratpaı tastaǵan. Bul oraıda Atyraý, Soltústik Qazaqstan, Aqmola jáne Mańǵystaý oblystary aldaryna jan salmaı, «topjarǵan tarlandar» atanyp tur.
Byltyrǵy jyly da osyndaı sapasyzdyq oryn alyp edi. Alaıda, bıylǵy «belsendiliktiń» tipti urqy bólek. Osylar týraly keńinen baıandap shyqqan Á.Isekeshov budan endi tıisti qorytyndy shyǵarmasqa bolmaıtynyn qadap aıtty.
Sáken Maılybaı.
