AQSh-tyń Mıchıgan shtatynyń turǵyny, kásipker Tom Lı degen azamat óz eliniń atqarýshy bılik oryndarynan kezinde Ýsama ben Ladenniń meken-jaıyn anyqtaýǵa kómekteskeni úshin syıaqy talap etip otyr. Bul týraly «RIA Novostı» agenttigi habarlady.
Amerıkalyq Tom Lı AQSh úkimetinen Ýsama ben Ladenniń ornalasqan jerin anyqtaýǵa qol ushyn sozyp, tıisti aqparattarmen qamtamasyz etkeni úshin 25 mıllıon dollar syıaqy alýym kerek dep esepteıdi.
Esterińizge sala keteıik, kezinde AQSh-tyń Memlekettik departamenti Ýsama ben Ladendi ustap bergen adamǵa 25 mıllıon dollar syıaqy beriletinin málimdegen bolatyn. Tomnyń surap júrgeni osy aqsha.
Qyzmetiniń aqysyn daýlap júrgen Tom Lıdiń «eren eńbegin» dáleldeıtin qujattar da bar kórinedi. Naqtylap aıtsaq, Loevy & Loevy degen fırma arqyly AQSh-tyń Federaldyq zertteý bıýrosynyń (FBR) dırektory Djeıms Komıǵa joldanǵan hatta Tom Lıdiń pákstandyq barlaýshylardan Ýsama ben Ladenniń Abbotabad qalasynda ornalasqany jóninde aqparat alǵany jazylypty. Sondaı-aq, Tom 2003 jyly da AQSh úkimetine «Ál-Kaıda» jetekshisiniń koordınattaryn ashyp beripti.
Al, AQSh bıligi Pákstannyń Abbotabad qalasynda 2011 jyldyń 2 mamyrynda Ýsama ben Laden óltirilgennen keıin álgi taǵaıyndalǵan syıaqy eshkimge berilmeıtinin jarııalaǵan. О́ıtkeni, úkimeti ókilderi Ýsamanyń meken-jaıyn radıoelektrondy barlaýdyń kómegimen taýyp alǵandaryn alǵa tartty.
Tom Lıdiń talabyna AQSh bıliginiń ókilderi ne dep jaýap beretini ázirge belgisiz.
Joldybaı Bazar.
