Qazaqstan kompozıtorlarynyń shyǵarmashylyq uıymy 1939 jyly M.Tólebaev, E.Brýsılovskıı, A.Jubanov, L.Hamıdı, V.Velıkanov, S.Shabelskıı, B.Erzakovıch uıǵarymymen qurylǵan bolatyn. Odaqty ár jyldary KSRO Halyq ártisteri Q. Qojamııarov, Ǵ.Jubanova, S.Muhamedjanov, E. Rahmadıev sııaqty belgili tulǵalar basqardy. Osy aralyqta 52 opera, 17 balet qoıylymy, sondaı-aq birtalaı sımfonııa, oratorııa, kantata, aspaptyq mýzyka, romanstar men ánder dúnıege keldi. Búginde Qazaqstanda 3 opera jáne balet teatry, 7 sımfonııalyq orkestr, 18 halyq aspaptar orkestri bar desek, olardyń repertýary negizinen el kompozıtorlarynyń úzdik shyǵarmalarynan turady. Qazaq kompozıtorlarynyń týyndylary qashanda el taǵdyry men halyqtyń qýanysh-muńynyń rýhanı aınasy bolyp tabylady.
2007 jyldan beri odaqqa Memlekettik syılyqtyń laýreaty, belgili kompozıtor Balnur Balǵabekqyzy Qydyrbek tóraǵalyq etip, qazaqstandyq kompozıtorlar mektebiniń mártebesin arttyrýǵa edáýir ter tókti. Osy jyldary otandyq avtorlardyń shyǵarmalary el ishinde, TMD jáne shet elderde oryndalyp, zamanaýı týyndylarmen tyńdarmanyn tánti etti.
Shyǵarmashylyq ıeleriniń sezinde Qazaqstannyń eńbek sińirgen qaıratkeri, Qazaq ulttyq óner ýnıversıtetiniń professory, kompozıtor Serikjan Qutymbetuly Ábdinurov ujymnyń tóraǵasy bolyp saılandy. Jańa tóraǵanyń qorjynynda "Kók bóri ańyzdary" baleti, "Appaq" jáne "Mahabbatym meniń" operalary, "Kereı-Jánibek", "Uly sherý" sımfonııalyq dastandary, "Saqtar", "Báıge" sımfonııalyq kúıleri jáne vokaldyq, aspaptyq shyǵarmalar men birtalaı ánder bar.
Uıym Jarǵysyna "Qurmetti tóraǵa" belgisi engizilip, bul laýazymǵa kompozıtor Balnur Qydyrbek laıyq dep tabyldy.
