Keshe Memleket basshysy Nursultan Nazarbaev Prezıdent Ákimshiliginiń qyzmetin jetildirý máselelerine arnalǵan keńes ótkizdi, dep habarlady Prezıdenttiń baspasóz qyzmeti.
Keshe Memleket basshysy Nursultan Nazarbaev Prezıdent Ákimshiliginiń qyzmetin jetildirý máselelerine arnalǵan keńes ótkizdi, dep habarlady Prezıdenttiń baspasóz qyzmeti.
Nursultan Nazarbaev Prezıdent Ákimshiliginiń ıdeologııalyq, aýmaqtyq-uıymdastyrý jáne ekonomıkalyq baǵyttar aıasyndaǵy tıimdi jumysyn jolǵa qoıýdyń mańyzdylyǵyn atap ótti.
Memleket basshysy taıaýda Úkimettiń keńeıtilgen otyrysynda berilgen tapsyrmalar boıynsha tıisti jumystar júrgizilip, olar buqaralyq aqparat quraldarynda keńinen jarııalanýy kerektigin taǵy da eske saldy.
– Apparat memlekettik baǵdarlamalardyń oryndalý barysyn baqylap, kemshilikterdi aıqyndaýǵa jáne olardy tıimdi iske asyrý jóninde naqty sharalardy belgileýge tıis. Úkimettiń keńeıtilgen otyrysynda meniń tarapymnan aıtylǵan syndardan tıisti qorytyndy shyǵarylýy kerek. Bul baǵyttarda qandaı jumystar júrgizilip jatqany, kimder jaýapqa tartylǵany jáne jazalanǵany týraly árbir fakt boıynsha halyq aldynda esep berip, BAQ-tarda jarııalaý týraly tapsyrma berilgen bolatyn. Men aıtqan syn boıynsha tek «Turǵynúı-qurylysjınaqbankiniń» jaǵdaıy jónindegi derekter ǵana aıtyldy, ózge eshqandaı aqparat bolǵan joq. Tipti, bul rette meniń tarapymnan aıtylǵan synnyń bir bóligi gazet betterinde kórinis tappaǵan jáne teleefırden de berilmegen. Sondyqtan, árkimnen tek óz baǵyty boıynsha baǵdarlamalardyń oryndalýymen ǵana emes, sondaı-aq, Úkimettiń, mınıstrlikter men vedomstvolardyń jumysyndaǵy kemshilikterdi joıý jónindegi barlyq nusqaýymnyń oryndalýy boıynsha qatań túrde jumys júrgizýin talap etemin, – dedi Memleket basshysy.
Buǵan qosa, Qazaqstan Prezıdenti elimizdegi patrıottyq tárbıe men dinı ahýal salasyndaǵy jumystardyń tıimdiligi kemshin túsip jatqanyn atap kórsetti.
Sondaı-aq, Nursultan Nazarbaev óńirlerdiń áleýmettik-ekonomıkalyq damýyna monıtorıng jáne taldaý júrgizý bóliginde Prezıdent Ákimshiliginiń qyzmetin jaqsartý qajettigine toqtaldy.
– Prezıdent Ákimshiliginiń memlekettik ınspektorlary oblystardaǵy ahýaldy tolyq bilmeıdi. Olar óz óńirlerindegi barlyq ákimderdi, aýyldyq ákimderdi júzbe-júz tanyp, árqaısysynyń jumys ereksheligin ajyrata bilýge tıis. Memlekettik ınspektordyń jumysy barlyq isten habardar bolý úshin de isteledi. Mysaly, Batys Qazaqstan oblysyna sapar barysynda memlekettik ınspektor qajetti aqparattyń bárin bilmeıtin bolyp shyqty. Ol jańadan kelgen adam bolýy múmkin ári báriniń qyr-syryn tereń meńgerip úlgermegen shyǵar. Biraq, sonyń ózinde olarda óńir jóninde jergilikti atqarýshy bılik qyzmetindegi jetistikter men kemshilikterdi, sondaı-aq, problemalar men iske asyrylyp jatqan jobalardy qamtıtyn tolyq aqparat bolýǵa tıis. Olaı bolmaǵan jaǵdaıda olardyń atqaryp otyrǵan laýazymyna sáıkestigi jóninde belgili bir qorytyndy jasaý qajet bolady, – dedi Qazaqstan Prezıdenti.
Keńes qorytyndysynda Memleket basshysy qaralǵan máselelerge jáne bıylǵy jyldyń sońyna deıin josparlanǵan qoǵamdyq mańyzy bar is-sharalarǵa tıimdi uıymdastyrýshylyq-aqparattyq qoldaý kórsetýge qatysty birqatar naqty tapsyrmalar berdi.
-----------------------------------------
Sýretti túsirgender
S.BONDARENKO, B.OTARBAEV.
