Osydan úsh jyl burynǵy oqıǵa 75 myń turǵyny bar Shýchınsk qalasy turǵyndarynyń kóńilin aspandatyp jibergeni esimizde. Tek kýrortty aımaqta ǵana zamanaýı sáýlettiń ozyq stılimen, qozyquıryqsha qaptap salynyp jatqan ásem ǵımarattarǵa tamsana qaraıtyn aýdan ortalyǵynyń adamdary baspanaǵa jarymaı, armandaı kúı keshetin. Mine, endi bir kúnde jarylqaýshy paıda bolyp, áı-shaıǵa qaramastan kópqabatty eki úıdiń qurylysyn bastady da jiberdi. Kompanııanyń «Shabyt ST» JShS atalatyny da kópshiliktiń kómeskilenip bara jatqan úmitin oıatqan.
Osydan úsh jyl burynǵy oqıǵa 75 myń turǵyny bar Shýchınsk qalasy turǵyndarynyń kóńilin aspandatyp jibergeni esimizde. Tek kýrortty aımaqta ǵana zamanaýı sáýlettiń ozyq stılimen, qozyquıryqsha qaptap salynyp jatqan ásem ǵımarattarǵa tamsana qaraıtyn aýdan ortalyǵynyń adamdary baspanaǵa jarymaı, armandaı kúı keshetin. Mine, endi bir kúnde jarylqaýshy paıda bolyp, áı-shaıǵa qaramastan kópqabatty eki úıdiń qurylysyn bastady da jiberdi. Kompanııanyń «Shabyt ST» JShS atalatyny da kópshiliktiń kómeskilenip bara jatqan úmitin oıatqan.
Memlekettik baǵdarlama jalaýyn kótergen qurylys ǵalamat qarqynmen júrgizildi. Araǵa jyl salmaı-aq qos ǵımarat qonys toıyna daıyn boldy. Jurtshylyq ta, jergilikti bılik te qatty qýandy. Jas mamandardy jumysqa tartýdyń múmkindigi týǵanyna qýanǵan Aqmola oblysynyń sol kezdegi ákimi Sergeı Dıachenko páter ıelerine kilt tapsyrý saltanatyna arnaıy qatysyp, jalyndy sózin tógiltti. Álgi úıdiń tórtinshi qabatynan páter bólingen Botakóz Qusaıynova men Anna Elıshevalardy qyzý quttyqtap, qoldaryna jibek baýly kilt pen alqyzyl gúldi qosa ustatqan. Biraq, joldamamen kelgen jas mamandarǵa qamqorlyq kórsetý jónindegi joǵarydan jasalyp jatqan qysymnan qutylyp qalýdy oılaǵan ákim daýdyń basy dál búgin bastalǵanyn qaıdan bilsin!
Shynynda, «Shabyt ST» shattyq ákelmepti. Qurylys kompanııasynyń basshylary aýdandyq ákimdikpen jasalǵan mámile-memorandýmdy álgi saltanat bolmaı jatyp-aq umytqan eken, týrasyn aıtqanda ony oryndaý oıynda bolmaǵan. Búgingi jaǵdaı sol shyndyqty qalqytyp shyǵaryp otyr.
– Tanymaıtyn, belgisiz adamdar páterdi bosatýymdy talap etip, qoqan-loqy jasaýyn qoıar emes, – deıdi B.Qusaıynova. –Zańdy ıesi biz deıdi. Jylarman kúıde quqyq qorǵaý organdaryn jaǵalap kórdim. Osy eki jylda aýdannyń úsh ákimi aýysty. Olardyń árqaısysyna eki-ekiden alty ret bardym. Janashyrlyq sózderin aıtqanymen eshqandaı kómekteri joq. Januıamyzben ábden qaljyrap bittik.
Dál osyndaı jaǵdaıdy gınekolog Anna Elısheva da bastan keship otyr.
Sıyrquıymshaqtalyp sozylyp bara jatqan máseleniń astarynda qandaı syr bar? Biz Býrabaı aýdandyq ákimdiginiń zańgeri Aıtbek Yqylasovqa habarlasqanymyzda suraqtyń túpki jaýabyna aqyryndap sáýle túskendeı boldy. Joldamamen kelgen jas mamandarǵa páterler syıǵa berilgen bolyp shyqty. «Qam jemeńder. Qujattaryń eki-úsh aıdan keıin qoldaryńa tıedi», delingen.
Sonda Úkimet jalaýlatyp qolǵa alǵan memlekettik baǵdarlama, qoljetimdi baspana qaıda qaldy? Jalpy, solaı bolǵan kúnniń ózinde saýǵasyn qaıtyp alǵan saltty qaı atamyzdan kórip edik? Sózinde turmaıtyn, tıyn-teben úshin jalǵan sóıleıtin qurylysshylardan ne qaıran? Jurt kózinshe kilt bergen ákimde, jalpy bılik ataýlyda qandaı bedel qaldy munan keıin...
Endi, mine jazyqsyz jábir kórgen, jurtshylyq úmit kútip otyrǵan dárigerler sot dálizderinde sarsańǵa túspek. Bıliktiń dármensizdigi, taǵdyrdy tálkekke salý degen osy shyǵar.
Baqbergen AMALBEK,
«Egemen Qazaqstan».
Aqmola oblysy,
Shýchınsk qalasy.
