Jyrymen jiger berip jetelige

Aıaýdy bilmes qatal taǵdyr qyryna alǵaly tup-týra 37 jyl. Osynshama ýaqyt boıy qarǵa adym jer muń bolyp, boıyna kózin ashqaly juqqan dertpen tynymsyz alysyp keledi. Bar múshesi saý bolǵanymen, omyrtqasyna zaqym kelgen. Týa bitti múgedek bolýy da sodan. Álııa tabıǵatynan jigerli, qaısar qyz. Eshkimge alaqan ja­ıyp, jaıyn aıtyp kórmepti. Qaıta ózgege kómektessem dep umtylyp turady.

Bir emes, birneshe mamandyǵy bar. Sonyń ishinde qapysyz meńgergeni – psıhologııa. О́ziniń aıtýynsha, aldymen ózi úshin tylsym syrly ǵylymdy tola­ıym meńgerýge tyrysqan. Qaıdan derińiz bar ma, qapelimde, ásirese jalǵyzdyqtyń qara shymyldyǵy tumashalap, nebir oılar qaýmalaǵanda, janyńa jiger bitirý úshin muny da bilgen jón. Áıtpese sál ǵana nárseni qııamet-qaıym sanap, ómirden túńilip jatqandar qanshama jastar týraly jaman habar estigende jany júdep qalatyny bar. Qalaı ǵana mynaý ádemi álemdi qıyp ketti eken, on eki múshesi saý jannyń qandaı qıyndyq bolsa da jeńip shyǵýyna bolatyn edi ǵoı.

Áýel basta ata-anasy Álııa apasyndaı qaısar da batyr, erjúrek te batyl bolsyn degen nıetpen azan shaqyryp osyndaı at qoıǵan. Búginginiń Álııasy da tirshiliktiń aqbas tolqyndarymen alysqan, dert maıdanymen jaǵalasqan erjúrek qyzdyń biri. Erterekte dárigerler medısınasy meılinshe damyǵan shetelderde ota jasasa, emdelip shyǵý múmkindigi bar ekenin aıtqan bolatyn. Biraq oǵan qarajat qaıda? «Basqa túsken baspaqshyl» demekshi, óz janyn ózi emdep, óz dertimen ózi alysyp keledi.

– Bala kezimde qurbylarymmen birge quldyrańdaı júgirip, asyr salyp oınaǵym keletin. Sondaı bir sátterde qaz basyp júre almaıtynymdy oılaǵanda kózimniń aldy eriksiz kireýkelenip ketedi. Ile boıymdy jınap ala qoıamyn, – deıdi birinshi toptaǵy múgedek Álııa Hasenova, – bolashaq jaıly berile oılaǵanda sanaǵa ashyly-tushyly nebir oılar shúpildeıdi. Sosyn jatpaı-turmaı eýropalyq mektepti psıhologııalyq maman­dyǵy boıynsha qashyqtan oqyp bitirdim. Osy bir qadamym óz ómirime úlken ózgeris ákeldi. Belsendilik, bolashaqqa degen senim paıda boldy. Borkemik oılarǵa berilip, janym júdeı bastasa, jaqsy oıdyń jalyna jarmasýǵa ádettendim.

Qurbylary tárizdi mektepke baryp bilim alýǵa múmkindigi bolmasa da, oqýyn úzdik attestatpen aıaqtaǵan. Aıaýly qyzynyń jaǵdaıyna alańdaǵan anasy tıisti mekemelerdiń tabaldyryǵyn tozdyryp júrip úıden oqýyna jaǵdaı jasaǵan eken. Orta mektepti bitirgen soń Nur-Sultan qalasyndaǵy «Turan» kolledjine túsip, ekonomıst mamandyǵyn meńgergen.

Qaısar qyzdyń kókiregindegi san alýan sezim aq qaǵazdyń betinde jyr bolyp óriledi. Oqyǵan janǵa oı salar kórkem áńgime de, júrek qylyn sherte­tin názik novella da jazýǵa ma­shyq­tanǵan. Sońǵy jyldary aýdan­dyq, oblystyq «Altyn qalam» baıqaýlaryna qatysyp, júldeli oryndarǵa ıe bolyp júr. 2012 jyly bar eńbegin jınaqtap, alǵashqy kitabyn shyǵarǵan. Qazir ekinshi jınaǵyn toptaý ústinde. Negizgi taqyryp – ómirge degen súıispenshilik, taǵdyrdyń salǵan isine tastaı berik bolý. Keıipkerleri de ózi tárizdi jigeri jalyn atqan jandar. Zer salyp oqysańyz, kókiregińdi qolamtanyń shoǵyn­daı qyzdyratyn káýsar sezim alpys eki tamyrdaǵy qyzyl qandy qyzdyrady.

Búginde Álııanyń Aqmol aýylynda kosmetıka jáne turmystyq hımııa buıymdaryn satatyn jeke dúkeni bar. Kúnkóristiń qamy da. Oǵan qosa aýdandyq ardagerler keńesi tóraǵasynyń orynbasary bolsa, jastar resýrstyq ortalyǵynda maman bolyp jumys isteıdi. Bárine ýaqyt tabady, kúsh-qýaty qaptal jetip jatyr. Janyndaǵy adamǵa jaqsylyq jasasa, tal boıyna aıryqsha qýat bitkendeı áser alady. Múm­kin­digi shekteýli azamat Aman­geldi Qapanov jetekshilik ete­tin «Bolashaq» qoǵamdyq bir­les­tiginde kedergisiz orta qurý, mú­ge­dekterdiń quqyǵyn qor­ǵaý­men aınalysady.

Osynshama is tyndyryp júr­gen qarshadaı qyzdyń qaı­ra­tyna qalaı súısinbessiń. О́mir­diń ózi kúres, sol kúreste dáti myqtylar ǵana synaqqa shydaıdy deıdi ke­ıip­­kerimizdiń ózi. Bálkim, solaı da shy­ǵar.

Aqmola oblysy,

Selınograd aýdany