Fılıal málimetinshe, tegin medısınalyq kómek pen mindetti áleýmettik medısınalyq saqtandyrý paketterine koronavırýsty emdeýge qatysty ózgerister engizilgen. Sonymen qatar qos paket sheńberinde mobıldi brıgadalar men COVID-19-ǵa shaldyqqan pasıentterge úı jaǵdaıynda stasıonarlyq qyzmet kórsetý múmkindikteri qarastyrylǵan. Medısınalyq kómek azamattardyń saqtandyrý júıesindegi statýsyna qaramastan kórsetiledi. Bul ózgerister, ásirese juqpaly aýrýlar órshıtin kúz mezgilinde medısınalyq kómektiń qoljetimdiligin arttyrýǵa septigin tıgizeri anyq.
«Qazirgi tańda qor deńgeıinde koronavırýs pen pnevmonııaǵa qarsy kúreske 159 mlrd teńgeden astam qarjy qarastyrylǵan. Almaty qalasy boıynsha atalǵan sharalarǵa jumsalatyn qarajattyń jalpy somasy 22,9 mlrd teńgeni quraıdy», dedi fılıal basshysy Tileýhan Ábildaev.
Naýryz ben tamyz aılary aralyǵynda medısına qyzmetkerlerine 11,6 mlrd teńge qosymsha aqy tólengen. PTR analızderge 471 mln teńge bólindi. О́tken alty aıda 33,8 myńnan astam medısına qyzmetkerine koronavırýsqa qatysty qosymsha aqy tólengen. Epıdemııaǵa qarsy is-sharalarǵa jumyldyrylǵan emdeý mekemeleriniń qyzmetkerleri barlyǵy 11,6 mlrd teńge ústemeaqy aldy. Sonyń ishinde: 1-top – 5 mlrd 811,4 mln.teńge (9 729 adam); 2-top – 4 mlrd 413,9 mln.teńge (14 535 adam); 3-top – 1 mlrd 421,8 mln.teńge (9 623 adam).
Esterińizge sala ketsek, pandemııa bastalǵaly beri Qazaqstan boıynsha dárigerlerdiń jalaqysyna qosymsha 73 mlrd teńgeden astam ústemeaqy tólengen.
