Búgin, 6 qarasha kúni Memleket basshysy Prezıdent Ákimshiliginiń qyzmetin jetildirý máselelerine arnalǵan keńes ótkizdi. Bul týraly Aqorda saıtyna súıengen Egemennews.kz tilshisi habarlady.
Basqosýda Nursultan Nazarbaev Prezıdent Ákimshiliginiń ıdeologııalyq, aýmaqtyq-uıymdastyrý jáne ekonomıkalyq baǵyttar aıasyndaǵy tıimdi jumysyn jolǵa qoıýdyń mańyzdylyǵyn atap ótti. Ol sonymen birge, taıaýda Úkimettiń keńeıtilgen otyrysynda berilgen tapsyrmalar boıynsha tıisti jumystar júrgizilip, olar buqaralyq aqparat quraldarynda keńinen jarııalanýy kerektigin taǵy da eske saldy.
«Apparat memlekettik baǵdarlamalardyń oryndalý barysyn baqylap, kemshilikterdi aıqyndaýǵa jáne olardy tıimdi iske asyrý jóninde naqty sharalardy belgileýge tıis. Úkimettiń keńeıtilgen otyrysynda meniń tarapymnan aıtylǵan syndardan tıisti qorytyndy shyǵarylýy kerek. Bul baǵyttarda qandaı jumystar júrgizilip jatqany, kimder jaýapqa tartylǵany jáne jazalanǵany týraly árbir fakt boıynsha halyq aldynda esep berip, BAQ-ta jarııalaý jóninde tapsyrma berilgen bolatyn. Men aıtqan syn boıynsha tek «Turǵynúı-qurylysjınaqbankiniń» jaǵdaıy jónindegi derekter ǵana aıtyldy, ózge eshqandaı aqparat bolǵan joq. Tipti bul rette meniń tarapymnan aıtylǵan synnyń bir bóligi gazet betterinde de kórinis tappaǵan jáne teleefırden de berilmegen. Sondyqtan árkimnen tek óz baǵyty boıynsha baǵdarlamalardyń oryndalýymen ǵana emes, sondaı-aq Úkimettiń, mınıstrlikter men vedomstvolardyń jumysyndaǵy kemshilikterdi joıý jónindegi barlyq nusqaýymnyń oryndalýymen qatań túrde jumys júrgizýin talap etemin», – dedi Memleket basshysy.
Buǵan qosa, Prezıdent elimizdegi patrıottyq tárbıe men dinı ahýal salasyndaǵy jumystardyń tıimdiligi kem bolyp jatqanyn atap kórsetti. Nursultan Nazarbaev sondaı-aq óńirlerdiń áleýmettik-ekonomıkalyq damýyna monıtorıng jáne taldaý júrgizýde Prezıdent Ákimshiligi qyzmetin jaqsartý qajettigin aıtty.
«Prezıdent Ákimshiliginiń memlekettik ınspektorlary oblystardaǵy ahýaldy tolyq bilmeıdi. Olar óz óńirlerindegi barlyq ákimderdi, aýyldyq ákimderdi júzbe-júz tanyp, árqaısysynyń jumys ereksheligin ajyrata bilýge tıis. Memlekettik ınspektordyń jumysy barlyq isten habardar bolý úshin de isteledi. Mysaly, Batys Qazaqstan oblysyna sapar barysynda memlekettik ınspektor qajetti aqparattyń bárin bilmeıtin bolyp shyqty. Ol jańadan kelgen adam bolýy múmkin ári báriniń qyr-syryn tereń ıgerip úlgermegen shyǵar. Biraq sonyń ózinde olarda óńir jóninde jergilikti atqarýshy bılik qyzmetindegi jetistikter men kemshilikterdi, sondaı-aq problemalar men iske asyrylyp jatqan jobalardy qamtıtyn tolyq aqparat bolýǵa tıis. Olaı bolmaǵan jaǵdaıda olardyń atqaryp otyrǵan laýazymyna sáıkestigi jóninde belgili bir qorytyndy jasaý qajet bolady», – dedi Prezıdent.
Memleket basshysy keńes qorytyndysynda qaralǵan máselelerge jáne bıylǵy jyldyń sońyna deıin josparlanǵan qoǵamdyq mańyzy bar is-sharalarǵa tıimdi uıymdastyrýshylyq-aqparattyq qoldaý kórsetýge qatysty birqatar naqty tapsyrmalar berdi.
