Sýretterde: Nurly álem – avtory Erbolat Shadrahov; Aqorda – Astana júregi – avtory George Steinmetz
Kóktemnen beri karantın talaptary báseńdemeı, kórme, konsert, teatr ataýlydan bir ýaq qol úzip, kóz jazyp qalǵanymyz ras. Áıtse de bıylǵy berekesimen kelgen qońyr kúzdiń merekeli kúnderi az da bolsa serpiltip, qala turǵyndaryna qýanysh syılaýda. Tamyz aıynan beri ótip jatqan «Uly dala júregi» kórmesinde qazaqstandyq jáne sheteldik avtorlardyń 150-den astam jumystary usynylǵan. Olardyń arasynda National Geographic jáne NY Times gazetiniń áıgili fotografy Djordj Steınmetstiń qolynan shyqqan tańdaýly sýret toptamalaryn tamashalaýǵa bolady. Máselen, onyń Esil jaǵalaýy mańyndaǵy jańajyldyq otshashý kezinen túsirilgen kadry kópshiliktiń tańdanysyn týǵyzǵan týyndynyń biri. Bul týraly avtor óziniń ınstagram áleýmettik jelisinde «Jańa jyl túni qarsańynda túngi on ekide Qazaqstannyń Nur-Sultan qalasyndaǵy Esil ózeniniń eki jaǵalaýyn jalǵap jatqan Atyraý kópiriniń ústinde saltanatty otshashý boldy. Bul – álemdegi ekinshi sýyq astana», dep jazǵan edi. Odan basqa búkil álemdi sharlaǵan tańǵajaıyp sýretter Antonio Politano, Sasin Tipchai, Nıkıta Basov, Turar Qazanǵapov syndy National Geographic-tiń eńbek sińirgen fotograftary, sondaı-aq Batyrlan Tólegenov, Aleksandr Fılıpenko, Evgenıı Tkachenko, Aıbek Ahanov jáne basqa da tanymal otandyq fotograftar bar.
Elordanyń turmys-tirshiliginen syr shertetin kórme qaladaǵy demalys, iskerlik jáne mádenı ómir, jarqyn tulǵalar beınesin arqaý etken. Sonymen qatar astananyń erekshe gastronomııasy, sport álemi jáne zamanaýı shahardyń ozyq kelbetin jarysa sýretteıdi.
Ataýly kórmeniń maqsaty áıgili sheteldik jáne otandyq fotograftardyń fotokameralary arqyly shartarapqa Qazaqstannyń jańa ómiriniń shynaıy keskin-kelbeti men Arqa tósinde boı kótergen astananyń búgingi zamanaýı kelbetin nasıhattaýdy kózdeıdi.
Kórmeni «Han Shatyr» oıyn-saýyq ortalyǵy janyndaǵy alańnan tamashalaýǵa bolady. Is-shara barlyq sanıtarlyq normalardy saqtaı otyryp ótkiziledi. Uıymdastyrýshylar barlyq erejelerdi qatań saqtaý, maska taǵý, qashyqtyqty ustaý jáne sanıtaızerlerdi paıdalaný qajettigin eske salady.
Aıta keteıik, álem fotograftaryn shabyttandyrǵan kórikti astananyń tarıhyn arqaý etken kórme sýretterin nursultankorme.kz saıtynan onlaın kórýge bolady.
